সূক্ত 98

98.1

১২ নৃমেধ আঙ্গিরসঃ । ইন্দ্রঃ । উষ্ণিক্ ; ৭, ১০-১১ ককুপ্ ; ৯,১২ পুরউষ্ণিক্ ।

ইন্দ্রায় সাম গায়ত বিপ্রায় বৃহতে বৃহৎ । ধর্মকৃতে বিপশ্চিতে পনস্যবে ॥১॥

98.2

ত্বমিন্দ্রাভিভূরসি ত্বং সূর্যমরোচয়ঃ । বিশ্বকর্মা বিশ্বদেবো মহাঁ অসি ॥২॥

98.3

বিভ্রাজঞ্জ্যোতিষা স্ব১রগচ্ছো রোচনং দিবঃ । দেবাস্ত ইন্দ্র সখ্যায় যেমিরে ॥৩॥

98.4

এন্দ্র নো গধি প্রিয়ঃ সত্রাজিদগোহ্যঃ । গিরির্ন বিশ্বতস্পৃথুঃ পতির্দিবঃ ॥৪॥

98.5

অভি হি সত্য সোমপা উভে বভূথ রোদসী । ইন্দ্রাসি সুন্বতো বৃধঃ পতির্দিবঃ ॥৫॥

98.6

ত্বং হি শশ্বতীনামিন্দ্র দর্তা পুরামসি । হন্তা দস্যোর্মনোর্বৃধঃ পতির্দিবঃ ॥৬॥

98.7

অধা হীন্দ্র গির্বণ উপ ত্বা কামান্মহঃ সসৃজ্মহে । উদেব যন্ত উদভিঃ ॥৭॥

98.8

বার্ণ ত্বা যব্যাভির্বর্ধন্তি শূর ব্রহ্মাণি । বাবৃধ্বাংসং চিদদ্রিবো দিবেদিবে ॥৮॥

98.9

যুঞ্জন্তি হরী ইষিরস্য গাথয়োরৌ রথ উরুয়ুগে । ইন্দ্রবাহা বচোয়ুজা ॥৯॥

98.10

ত্বং ন ইন্দ্রা ভরঁ ওজো নৃম্ণং শতক্রতো বিচর্ষণে । আ বীরং পৃতনাষহম্ ॥১০॥

98.11

ত্বং হি নঃ পিতা বসো ত্বং মাতা শতক্রতো বভূবিথ । অধা তে সুম্নমীমহে ॥১১॥

98.12

ত্বাং শুষ্মিন্পুরুহূত বাজয়ন্তমুপ ব্রুবে শতক্রতো । স নো রাস্ব সুবীর্যম্ ॥১২॥