সূক্ত 97

97.1

১৫ রেভঃ কাশ্যপঃ । ইন্দ্রঃ । বৃহতী , ১০, ১৩ অতিজগতী, ১১-১২ উপরিষ্টাদ্বৃহতী, ১৪ ত্রিষ্টুপ্ , ১৫ জগতী ।

যা ইন্দ্র ভুজ আভরঃ স্বর্বাঁ অসুরেভ্যঃ । স্তোতারমিন্মঘবন্নস্য বর্ধয় যে চ ত্বে বৃক্তবর্হিষঃ ॥১॥

যমিন্দ্র দধিষে ত্বমশ্বং গাং ভাগমব্যয়ম্ । যজমানে সুন্বতি দক্ষিণাবতি তস্মিন্তং ধেহি মা পণৌ ॥২॥

য ইন্দ্র সস্ত্যব্রতোঽনুষ্বাপমদেবয়ুঃ । স্বৈঃ ষ এবৈর্মুমুরত্পোষ্যং রয়িং সনুতর্ধেহি তং ততঃ ॥৩॥

যচ্ছক্রাসি পরাবতি যদর্বাবতি বৃত্রহন্ । অতস্ত্বা গীর্ভির্দ্যুগদিন্দ্র কেশিভিঃ সুতাবাঁ আ বিবাসতি ॥৪॥

যদ্বাসি রোচনে দিবঃ সমুদ্রস্যাধি বিষ্টপি । যত্পার্থিবে সদনে বৃত্রহন্তম যদন্তরিক্ষ আ গহি ॥৫॥

স নঃ সোমেষু সোমপাঃ সুতেষু শবসস্পতে । মাদয়স্ব রাধসা সূনৃতাবতেন্দ্র রায়া পরীণসা ॥৬॥

মা ন ইন্দ্র পরা বৃণগ্ভবা নঃ সধমাদ্যঃ । ত্বং ন ঊতী ত্বমিন্ন আপ্যং মা ন ইন্দ্র পরা বৃণক্ ॥৭॥

অস্মে ইন্দ্র সচা সুতে নি ষদা পীতয়ে মধু । কৃধী জরিত্রে মঘবন্নবো মহদস্মে ইন্দ্র সচা সুতে ॥৮॥

ন ত্বা দেবাস আশত ন মর্ত্যাসো অদ্রিবঃ । বিশ্বা জাতানি শবসাভিভূরসি ন ত্বা দেবাস আশত ॥৯॥

বিশ্বাঃ পৃতনা অভিভূতরং নরং সজূস্ততক্ষুরিন্দ্রং জজনুশ্চ রাজসে ।
ক্রত্বা বরিষ্ঠং বর আমুরিমুতোগ্রমোজিষ্ঠং তবসং তরস্বিনম্ ॥১০॥

সমীং রেভাসো অস্বরন্নিন্দ্রং সোমস্য পীতয়ে । স্বর্পতিং যদীং বৃধে ধৃতব্রতো হ্যোজসা সমূতিভিঃ ॥১১॥

নেমিং নমন্তি চক্ষসা মেষং বিপ্রা অভিস্বরা । সুদীতয়ো বো অদ্রুহোঽপি কর্ণে তরস্বিনঃ সমৃক্বভিঃ ॥১২॥

তমিন্দ্রং জোহবীমি মঘবানমুগ্রং সত্রা দধানমপ্রতিষ্কুতং শবাংসি ।
মংহিষ্ঠো গীর্ভিরা চ যজ্ঞিয়ো ববর্তদ্রায়ে নো বিশ্বা সুপথা কৃণোতু বজ্রী ॥১৩॥

ত্বং পুর ইন্দ্র চিকিদেনা ব্যোজসা শবিষ্ঠ শক্র নাশয়ধ্যৈ ।
ত্বদ্বিশ্বানি ভুবনানি বজ্রিন্দ্যাবা রেজেতে পৃথিবী চ ভীষা ॥১৪॥

তন্ম ঋতমিন্দ্র শূর চিত্র পাত্বপো ন বজ্রিন্দুরিতাতি পর্ষি ভূরি ।
কদা ন ইন্দ্র রায় আ দশস্যের্বিশ্বপ্স্ন্যস্য স্পৃহয়ায্যস্য রাজন্ ॥১৫॥