সূক্ত 93

93.1

৩৪ সুকক্ষ আঙ্গিরসঃ । ইন্দ্রঃ, ৩৪ ইন্দ্র-ঋভবশ্চ । গায়ত্রী ।

উদ্ঘেদভি শ্রুতামঘং বৃষভং নর্যাপসম্ । অস্তারমেষি সূর্য ॥১॥

93.2

নব যো নবতিং পুরো বিভেদ বাহ্বোজসা । অহিং চ বৃত্রহাবধীৎ ॥২॥

93.3

স ন ইন্দ্রঃ শিবঃ সখাঽশ্বাবদ্গোমদ্যবমৎ । উরুধারেব দোহতে ॥৩॥

93.4

যদদ্য কচ্চ বৃত্রহন্নুদগা অভি সূর্য । সর্বং তদিন্দ্র তে বশে ॥৪॥

93.5

যদ্বা প্রবৃদ্ধ সত্পতে ন মরা ইতি মন্যসে । উতো তত্সত্যমিত্তব ॥৫॥

93.6

যে সোমাসঃ পরাবতি যে অর্বাবতি সুন্বিরে । সর্বাঁস্তাঁ ইন্দ্র গচ্ছসি ॥৬॥

93.7

তমিন্দ্রং বাজয়ামসি মহে বৃত্রায় হন্তবে । স বৃষা বৃষভো ভুবৎ ॥৭॥

93.8

ইন্দ্রঃ স দামনে কৃত ওজিষ্ঠঃ স মদে হিতঃ । দ্যুম্নী শ্লোকী স সোম্যঃ ॥৮॥

93.9

গিরা বজ্রো ন সম্ভৃতঃ সবলো অনপচ্যুতঃ । ববক্ষ ঋষ্বো অস্তৃতঃ ॥৯॥

93.10

দুর্গে চিন্নঃ সুগং কৃধি গৃণান ইন্দ্র গির্বণঃ । ত্বং চ মঘবন্বশঃ ॥১০॥

93.11

যস্য তে নূ চিদাদিশং ন মিনন্তি স্বরাজ্যম্ । ন দেবো নাধ্রিগুর্জনঃ ॥১১॥

93.12

অধা তে অপ্রতিষ্কুতং দেবী শুষ্মং সপর্যতঃ । উভে সুশিপ্র রোদসী ॥১২॥

93.13

ত্বমেতদধারয়ঃ কৃষ্ণাসু রোহিণীষু চ । পরুষ্ণীষু রুশত্পয়ঃ ॥১৩॥

93.14

বি যদহেরধ ত্বিষো বিশ্বে দেবাসো অক্রমুঃ । বিদন্মৃগস্য তাঁ অমঃ ॥১৪॥

93.15

আদু মে নিবরো ভুবদ্বৃত্রহাদিষ্ট পৌংস্যম্ । অজাতশত্রুরস্তৃতঃ ॥১৫॥

93.16

শ্রুতং বো বৃত্রহন্তমং প্র শর্ধং চর্ষণীনাম্ । আ শুষে রাধসে মহে ॥১৬॥

93.17

অয়া ধিয়া চ গব্যয়া পুরুণামন্পুরুষ্টুত । যত্সোমেসোম আভবঃ ॥১৭॥

93.18

বোধিন্মনা ইদস্তু নো বৃত্রহা ভূর্যাসুতিঃ । শৃণোতু শক্র আশিষম্ ॥১৮॥

93.19

কয়া ত্বং ন ঊত্যাঽভি প্র মন্দসে বৃষন্ । কয়া স্তোতৃভ্য আ ভর ॥১৯॥

93.20

কস্য বৃষা সুতে সচা নিয়ুত্বান্বৃষভো রণৎ । বৃত্রহা সোমপীতয়ে ॥২০॥

93.21

অভী ষু ণস্ত্বং রয়িং মন্দসানঃ সহস্রিণম্ । প্রয়ন্তা বোধি দাশুষে ॥২১॥

93.22

পত্নীবন্তঃ সুতা ইম উশন্তো যন্তি বীতয়ে । অপাং জগ্মির্নিচুম্পুণঃ ॥২২॥

93.23

ইষ্টা হোত্রা অসৃক্ষতেন্দ্রং বৃধাসো অধ্বরে । অচ্ছাবভৃথমোজসা ॥২৩॥

93.24

ইহ ত্যা সধমাদ্যা হরী হিরণ্যকেশ্যা । বোল্হামভি প্রয়ো হিতম্ ॥২৪॥

93.25

তুভ্যং সোমাঃ সুতা ইমে স্তীর্ণং বর্হির্বিভাবসো । স্তোতৃভ্য ইন্দ্রমা বহ ॥২৫॥

93.26

আ তে দক্ষং বি রোচনা দধদ্রত্না বি দাশুষে । স্তোতৃভ্য ইন্দ্রমর্চত ॥২৬॥

93.27

আ তে দধামীন্দ্রিয়মুক্থা বিশ্বা শতক্রতো । স্তোতৃভ্য ইন্দ্র মৃলয় ॥২৭॥

93.28

ভদ্রম্ভদ্রং ন আ ভরেষমূর্জং শতক্রতো । যদিন্দ্র মৃলয়াসি নঃ ॥২৮॥

93.29

স নো বিশ্বান্যা ভর সুবিতানি শতক্রতো । যদিন্দ্র মৃলয়াসি নঃ ॥২৯॥

93.30

ত্বামিদ্বৃত্রহন্তম সুতাবন্তো হবামহে । যদিন্দ্র মৃলয়াসি নঃ ॥৩০॥

93.31

উপ নো হরিভিঃ সুতং যাহি মদানাং পতে । উপ নো হরিভিঃ সুতম্ ॥৩১॥

93.32

দ্বিতা যো বৃত্রহন্তমো বিদ ইন্দ্রঃ শতক্রতুঃ । উপ নো হরিভিঃ সুতম্ ॥৩২॥

93.33

ত্বং হি বৃত্রহন্নেষাং পাতা সোমানামসি । উপ নো হরিভিঃ সুতম্ ॥৩৩॥

93.34

ইন্দ্র ইষে দদাতু ন ঋভুক্ষণমৃভুং রয়িম্ । বাজী দদাতু বাজিনম্ ॥৩৪॥