সূক্ত 92

92.1

৩৩ শ্রুতকক্ষঃ সুকক্ষো বা আঙ্গিরসঃ ।ইন্দ্রঃ । গায়ত্রী , ১ অনুষ্টুপ্ ।

পান্তমা বো অন্ধস ইন্দ্রমভি প্র গায়ত । বিশ্বাসাহং শতক্রতুং মংহিষ্ঠং চর্ষণীনাম্ ॥১॥

92.2

পুরুহূতং পুরুষ্টুতং গাথান্যং১ সনশ্রুতম্ । ইন্দ্র ইতি ব্রবীতন ॥২॥

92.3

ইন্দ্র ইন্নো মহানাং দাতা বাজানাং নৃতুঃ । মহাঁ অভিজ্ঞ্বা যমৎ ॥৩॥

92.4

অপাদু শিপ্র্যন্ধসঃ সুদক্ষস্য প্রহোষিণঃ । ইন্দোরিন্দ্রো যবাশিরঃ ॥৪॥

92.5

তম্বভি প্রার্চতেন্দ্রং সোমস্য পীতয়ে । তদিদ্ধ্যস্য বর্ধনম্ ॥৫॥

92.6

অস্য পীত্বা মদানাং দেবো দেবস্যৌজসা । বিশ্বাভি ভুবনা ভুবৎ ॥৬॥

92.7

ত্যমু বঃ সত্রাসাহং বিশ্বাসু গীর্ষ্বায়তম্ । আ চ্যাবয়স্যূতয়ে ॥৭॥

92.8

যুধ্মং সন্তমনর্বাণং সোমপামনপচ্যুতম্ । নরমবার্যক্রতুম্ ॥৮॥

92.9

শিক্ষা ণ ইন্দ্র রায় আ পুরু বিদ্বাঁ ঋচীষম । অবা নঃ পার্যে ধনে ॥৯॥

92.10

অতশ্চিদিন্দ্র ণ উপা ঽঽয়াহি শতবাজয়া । ইষা সহস্রবাজয়া ॥১০॥

92.11

অয়াম ধীবতো ধিয়োঽর্বদ্ভিঃ শক্র গোদরে । জয়েম পৃত্সু বজ্রিবঃ ॥১১॥

92.12

বয়মু ত্বা শতক্রতো গাবো ন যবসেষ্বা । উক্থেষু রণয়ামসি ॥১২॥

92.13

বিশ্বা হি মর্ত্যত্বনাঽনুকামা শতক্রতো । অগন্ম বজ্রিন্নাশসঃ ॥১৩॥

92.14

ত্বে সু পুত্র শবসোঽবৃত্রন্কামকাতয়ঃ । ন ত্বামিন্দ্রাতি রিচ্যতে ॥১৪॥

92.15

স নো বৃষন্ত্সনিষ্ঠয়া সং ঘোরয়া দ্রবিত্ন্বা । ধিয়াবিড্ঢি পুরংধ্যা ॥১৫॥

92.16

যস্তে নূনং শতক্রতবিন্দ্র দ্যুম্নিতমো মদঃ । তেন নূনং মদে মদেঃ ॥১৬॥

92.17

যস্তে চিত্রশ্রবস্তমো য ইন্দ্র বৃত্রহন্তমঃ । য ওজোদাতমো মদঃ ॥১৭॥

92.18

বিদ্মা হি যস্তে অদ্রিবস্ত্বাদত্তঃ সত্য সোমপাঃ । বিশ্বাসু দস্ম কৃষ্টিষু ॥১৮॥

92.19

ইন্দ্রায় মদ্বনে সুতং পরি ষ্টোভন্তু নো গিরঃ । অর্কমর্চন্তু কারবঃ ॥১৯॥

92.20

যস্মিন্বিশ্বা অধি শ্রিয়ো রণন্তি সপ্ত সংসদঃ । ইন্দ্রং সুতে হবামহে ॥২০॥

92.21

ত্রিকদ্রুকেষু চেতনং দেবাসো যজ্ঞমত্নত । তমিদ্বর্ধন্তু নো গিরঃ ॥২১॥

92.22

আ ত্বা বিশন্ত্বিন্দবঃ সমুদ্রমিব সিন্ধবঃ । ন ত্বামিন্দ্রাতি রিচ্যতে ॥২২॥

92.23

বিব্যক্থ মহিনা বৃষন্ভক্ষং সোমস্য জাগৃবে । য ইন্দ্র জঠরেষু তে ॥২৩॥

92.24

অরং ত ইন্দ্র কুক্ষয়ে সোমো ভবতু বৃত্রহন্ । অরং ধামভ্য ইন্দবঃ ॥২৪॥

92.25

অরমশ্বায় গায়তি শ্রুতকক্ষো অরং গবে । অরমিন্দ্রস্য ধাম্নে ॥২৫॥

92.26

অরং হি ষ্ম সুতেষু ণঃ সোমেষ্বিন্দ্র ভূষসি । অরং তে শক্র দাবনে ॥২৬॥

92.27

পরাকাত্তাচ্চিদদ্রিবস্ত্বাং নক্ষন্ত নো গিরঃ । অরং গমাম তে বয়ম্ ॥২৭॥

92.28

এবা হ্যসি বীরয়ুরেবা শূর উত স্থিরঃ । এবা তে রাধ্যং মনঃ ॥২৮॥

92.29

এবা রাতিস্তুবীমঘ বিশ্বেভির্ধায়ি ধাতৃভিঃ । অধা চিদিন্দ্র মে সচা ॥২৯॥

92.30

মো ষু ব্রহ্মেব তন্দ্রয়ুর্ভুবো বাজানাং পতে । মত্স্বা সুতস্য গোমতঃ ॥৩০॥

92.31

মা ন ইন্দ্রাভ্যা৩দিশঃ সূরো অক্তুষ্বা যমন্ । ত্বা যুজা বনেম তৎ ॥৩১॥

92.32

ত্বয়েদিন্দ্র যুজা বয়ং প্রতি ব্রুবীমহি স্পৃধঃ । ত্বমস্মাকং তব স্মসি ॥৩২॥

92.33

ত্বামিদ্ধি ত্বায়বোঽনুনোনুবতশ্চরান্ । সখায় ইন্দ্র কারবঃ ॥৩৩॥