সূক্ত 89

89.1

৭ নৃমেধ-পুরুমেধাবাঙ্গিরসৌ । ইন্দ্রঃ । ১-৪ প্রগাথঃ = ( বিষমা বৃহতী, সমা সতোবৃহতী ) । ৫-৬ অনুষ্টুপ্

বৃহদিন্দ্রায় গায়ত মরুতো বৃত্রহন্তমম্ । যেন জ্যোতিরজনয়ন্নৃতাবৃধো দেবং দেবায় জাগৃবি ॥১॥

89.2

অপাধমদভিশস্তীরশস্তিহাঽথেন্দ্রো দ্যুম্ন্যাভবৎ । দেবাস্ত ইন্দ্র সখ্যায় যেমিরে বৃহদ্ভানো মরুদ্গণ ॥২॥

89.3

প্র ব ইন্দ্রায় বৃহতে মরুতো ব্রহ্মার্চত । বৃত্রং হনতি বৃত্রহা শতক্রতুর্বজ্রেণ শতপর্বণা ॥৩॥

89.4

অভি প্র ভর ধৃষতা ধৃষন্মনঃ শ্রবশ্চিত্তে অসদ্বৃহৎ । অর্ষন্ত্বাপো জবসা বি মাতরো হনো বৃত্রং জয়া স্বঃ ॥৪॥

89.5

যজ্জায়থা অপূর্ব্য মঘবন্বৃত্রহত্যায় । তত্পৃথিবীমপ্রথয়স্তদস্তভ্না উত দ্যাম্ ॥৫॥

89.6

তত্তে যজ্ঞো অজায়ত তদর্ক উত হস্কৃতিঃ । তদ্বিশ্বমভিভূরসি যজ্জাতং যচ্চ জন্ত্বম্ ॥৬॥

89.7

আমাসু পক্বমৈরয় আ সূর্যং রোহয়ো দিবি । ঘর্মং ন সামন্তপতা সুবৃক্তিভির্জুষ্টং গির্বণসে বৃহৎ ॥৭॥