সূক্ত 77

77.1

১১ কুরুসুতিঃ কাণ্বঃ। ইন্দ্রঃ ।গায়ত্রী, ১০ -১১ প্রগাথঃ= ( বৃহতী, সতোবৃহতী) ।

জজ্ঞানো নু শতক্রতুর্বি পৃচ্ছদিতি মাতরম্ । ক উগ্রাঃ কে হ শৃণ্বিরে ॥১॥

77.2

আদীং শবস্যব্রবীদৌর্ণবাভমহীশুবম্ । তে পুত্র সন্তু নিষ্টুরঃ ॥২॥

77.3

সমিত্তান্বৃত্রহাখিদত্খে অরাঁ ইব খেদয়া । প্রবৃদ্ধো দস্যুহাভবৎ ॥৩॥

77.4

একয়া প্রতিধাপিবত্সাকং সরাংসি ত্রিংশতম্ । ইন্দ্রঃ সোমস্য কাণুকা ॥৪॥

77.5

অভি গন্ধর্বমতৃণদবুধ্নেষু রজস্স্বা । ইন্দ্রো ব্রহ্মভ্য ইদ্বৃধে ॥৫॥

77.6

নিরাবিধ্যদ্গিরিভ্য আ ধারয়ত্পক্বমোদনম্ । ইন্দ্রো বুন্দং স্বাততম্ ॥৬॥

77.7

শতব্রধ্ন ইষুস্তব সহস্রপর্ণ এক ইৎ । যমিন্দ্র চকৃষে যুজম্ ॥৭॥

77.8

তেন স্তোতৃভ্য আ ভর নৃভ্যো নারিভ্যো অত্তবে । সদ্যো জাত ঋভুষ্ঠির ॥৮॥

77.9

এতা চ্যৌত্নানি তে কৃতা বর্ষিষ্ঠানি পরীণসা । হৃদা বীড্বধারয়ঃ ॥৯॥

77.10

বিশ্বেত্তা বিষ্ণুরাভরদুরুক্রমস্ত্বেষিতঃ । শতং মহিষান্ক্ষীরপাকমোদনং বরাহমিন্দ্র এমুষম্ ॥১০॥

77.11

তুবিক্ষং তে সুকৃতং সূময়ং ধনুঃ সাধুর্বুন্দো হিরণ্যয়ঃ । উভা তে বাহূ রণ্যা সুসংস্কৃত ঋদূপে চিদৃদূবৃধা ॥১১॥