সূক্ত 75

75.1

১৬ বিরূপ আঙ্গিরসঃ ।অগ্নিঃ । গায়ত্রী ।

যুক্ষ্বা হি দেবহূতমাঁ অশ্বাঁ অগ্নে রথীরিব । নি হোতা পূর্ব্যঃ সদঃ ॥১॥

উত নো দেব দেবাঁ অচ্ছা বোচো বিদুষ্টরঃ । শ্রদ্বিশ্বা বার্যা কৃধি ॥২॥

ত্বং হ যদ্যবিষ্ঠ্য সহসঃ সূনবাহুত । ঋতাবা যজ্ঞিয়ো ভুবঃ ॥৩॥

অয়মগ্নিঃ সহস্রিণো বাজস্য শতিনস্পতিঃ । মূর্ধা কবী রয়ীণাম্ ॥৪॥

তং নেমিমৃভবো যথা ঽঽনমস্ব সহূতিভিঃ । নেদীয়ো যজ্ঞমঙ্গিরঃ ॥৫॥

তস্মৈ নূনমভিদ্যবে বাচা বিরূপ নিত্যয়া । বৃষ্ণে চোদস্ব সুষ্টুতিম্ ॥৬॥

কমু ষ্বিদস্য সেনয়াগ্নেরপাকচক্ষসঃ । পণিং গোষু স্তরামহে ॥৭॥

মা নো দেবানাং বিশঃ প্রস্নাতীরিবোস্রাঃ । কৃশং ন হাসুরঘ্ন্যাঃ ॥৮॥

মা নঃ সমস্য দূঢ্য১ঃ পরিদ্বেষসো অংহতিঃ । ঊর্মির্ন নাবমা বধীৎ ॥৯॥

নমস্তে অগ্ন ওজসে গৃণন্তি দেব কৃষ্টয়ঃ । অমৈরমিত্রমর্দয় ॥১০॥

কুবিত্সু নো গবিষ্টয়েঽগ্নে সংবেষিষো রয়িম্ । উরুকৃদুরু ণস্কৃধি ॥১১॥

মা নো অস্মিন্মহাধনে পরা বর্গ্ভারভৃদ্যথা । সংবর্গং সং রয়িং জয় ॥১২॥

অন্যমস্মদ্ভিয়া ইয়মগ্নে সিষক্তু দুচ্ছুনা । বর্ধা নো অমবচ্ছবঃ ॥১৩॥

যস্যাজুষন্নমস্বিনঃ শমীমদুর্মখস্য বা । তং ঘেদগ্নির্বৃধাবতি ॥১৪॥

পরস্যা অধি সংবতোঽবরাঁ অভ্যা তর । যত্রাহমস্মি তাঁ অব ॥১৫॥

বিদ্মা হি তে পুরা বয়মগ্নে পিতুর্যথাবসঃ । অধা তে সুম্নমীমহে ॥১৬॥