সূক্ত 74

74.1

১৫ গোপবন আত্রেয়ঃ ।অগ্নিঃ, ১৩-১৫ আর্ক্ষঃ শ্রুতর্বা ।১-১২ অনুষ্টুম্মুখঃ প্রগাথঃ= ( অনুষ্টুপ্ + গায়ত্র্যৌ ) ১৩-১৫ অনুষ্টুপ্ ।

বিশোবিশো বো অতিথিং বাজয়ন্তঃ পুরুপ্রিয়ম্ । অগ্নিং বো দুর্যং বচঃ স্তুষে শূষস্য মন্মভিঃ ॥১॥

যং জনাসো হবিষ্মন্তো মিত্রং ন সর্পিরাসুতিম্ । প্রশংসন্তি প্রশস্তিভিঃ ॥২॥

পন্যাংসং জাতবেদসং যো দেবতাত্যুদ্যতা । হব্যান্যৈরয়দ্দিবি ॥৩॥

আগন্ম বৃত্রহন্তমং জ্যেষ্ঠমগ্নিমানবম্ । যস্য শ্রুতর্বা বৃহন্নার্ক্ষো অনীক এধতে ॥৪॥

অমৃতং জাতবেদসং তিরস্তমাংসি দর্শতম্ । ঘৃতাহবনমীড্যম্ ॥৫॥

সবাধো যং জনা ইমে৩ঽগ্নিং হব্যেভিরীলতে । জুহ্বানাসো যতস্রুচঃ ॥৬॥

ইয়ং তে নব্যসী মতিরগ্নে অধায্যস্মদা । মন্দ্র সুজাত সুক্রতোঽমূর দস্মাতিথে ॥৭॥

সা তে অগ্নে শংতমা চনিষ্ঠা ভবতু প্রিয়া । তয়া বর্ধস্ব সুষ্টুতঃ ॥৮॥

সা দ্যুম্নৈর্দ্যুম্নিনী বৃহদুপোপ শ্রবসি শ্রবঃ । দধীত বৃত্রতূর্যে ॥৯॥

অশ্বমিদ্গাং রথপ্রাং ত্বেষমিন্দ্রং ন সত্পতিম্ । যস্য শ্রবাংসি তূর্বথ পন্যম্পন্যং চ কৃষ্টয়ঃ ॥১০॥

যং ত্বা গোপবনো গিরা চনিষ্ঠদগ্নে অঙ্গিরঃ । স পাবক শ্রুধী হবম্ ॥১১॥

যং ত্বা জনাস ঈলতে সবাধো বাজসাতয়ে । স বোধি বৃত্রতূর্যে ॥১২॥

অহং হুবান আর্ক্ষে শ্রুতর্বণি মদচ্যুতি । শর্ধাংসীব স্তুকাবিনাং মৃক্ষা শীর্ষা চতুর্ণাম্ ॥১৩॥

মাং চত্বার আশবঃ শবিষ্ঠস্য দ্রবিত্নবঃ । সুরথাসো অভি প্রয়ো বক্ষন্বয়ো ন তুগ্র্যম্ ॥১৪॥

সত্যমিত্ত্বা মহেনদি পরুষ্ণ্যব দেদিশম্ । নেমাপো অশ্বদাতরঃ শবিষ্ঠাদস্তি মর্ত্যঃ ॥১৫॥