সূক্ত 71

71.1

১৫ সুদীতি- পুরুমীলহাবাঙ্গিরসৌ, তয়োর্বান্যতরঃ । অগ্নিঃ । গায়ত্রী, ১০-১৫ প্রগাথঃ = ( বিষমা বৃহতী, সমা সতোবৃহতী ) ।

ত্বং নো অগ্নে মহোভিঃ পাহি বিশ্বস্যা অরাতেঃ । উত দ্বিষো মর্ত্যস্য ॥১॥

নহি মন্যুঃ পৌরুষেয় ঈশে হি বঃ প্রিয়জাত । ত্বমিদসি ক্ষপাবান্ ॥২॥

স নো বিশ্বেভির্দেবেভিরূর্জো নপাদ্ভদ্রশোচে । রয়িং দেহি বিশ্ববারম্ ॥৩॥

ন তমগ্নে অরাতয়ো মর্তং যুবন্ত রায়ঃ । যং ত্রায়সে দাশ্বাংসম্ ॥৪॥

যং ত্বং বিপ্র মেধসাতাবগ্নে হিনোষি ধনায় । স তবোতী গোষু গন্তা ॥৫॥

ত্বং রয়িং পুরুবীরমগ্নে দাশুষে মর্তায় । প্র ণো নয় বস্যো অচ্ছ ॥৬॥

উরুষ্যা ণো মা পরা দা অঘায়তে জাতবেদঃ । দুরাধ্যে৩ মর্তায় ॥৭॥

অগ্নে মাকিষ্টে দেবস্য রাতিমদেবো যুয়োত । ত্বমীশিষে বসূনাম্ ॥৮॥

স নো বস্ব উপ মাস্যূর্জো নপান্মাহিনস্য । সখে বসো জরিতৃভ্যঃ ॥৯॥

অচ্ছা নঃ শীরশোচিষং গিরো যন্তু দর্শতম্ । অচ্ছা যজ্ঞাসো নমসা পুরূবসুং পুরুপ্রশস্তমূতয়ে ॥১০॥

অগ্নিং সূনুং সহসো জাতবেদসং দানায় বার্যাণাম্ । দ্বিতা যো ভূদমৃতো মর্ত্যেষ্বা হোতা মন্দ্রতমো বিশি ॥১১॥

অগ্নিং বো দেবয়জ্যয়াঽগ্নিং প্রয়ত্যধ্বরে । অগ্নিং ধীষু প্রথমমগ্নিমর্বত্যগ্নিং ক্ষৈত্রায় সাধসে ॥১২॥

অগ্নিরিষাং সখ্যে দদাতু ন ঈশে যো বার্যাণাম্ । অগ্নিং তোকে তনয়ে শশ্বদীমহে বসুং সন্তং তনূপাম্ ॥১৩॥

অগ্নিমীলিষ্বাবসে গাথাভিঃ শীরশোচিষম্ । অগ্নিং রায়ে পুরুমীল্হ শ্রুতং নরোঽগ্নিং সুদীতয়ে ছর্দিঃ ॥১৪॥

অগ্নিং দ্বেষো যোতবৈ নো গৃণীমস্যগ্নিং শং যোশ্চ দাতবে । বিশ্বাসু বিক্ষ্ববিতেব হব্যো ভুবদ্বস্তুৠষূণাম্ ॥১৫॥