সূক্ত 69

69.1

১৮ প্রিয়মেধ আঙ্গিরসঃ । ইন্দ্রঃ, ১১ ( অর্ধর্চস্য ) বিশ্বে দেবা :, ১১ ( উত্তরার্ধস্য ) – ১২ বরুণঃ । অনুষ্টুপ্ , ২ উষ্ণিক্ ,৪-৬ গায়ত্রী , ১১,১৬ পংক্তিঃ, ১৭- ১৮ বৃহতী ।

প্রপ্র বস্ত্রিষ্টুভমিষং মন্দদ্বীরায়েন্দবে । ধিয়া বো মেধসাতয়ে পুরংধ্যা বিবাসতি ॥১॥

69.2

নদং ব ওদতীনাং নদং যোয়ুবতীনাম্ । পতিং বো অঘ্ন্যানাং ধেনূনামিষুধ্যসি ॥২॥

69.3

তা অস্য সূদদোহসঃ সোমং শ্রীণন্তি পৃশ্নয়ঃ । জন্মন্দেবানাং বিশস্ত্রিষ্বা রোচনে দিবঃ ॥৩॥

69.4

অভি প্র গোপতিং গিরেন্দ্রমর্চ যথা বিদে । সূনুং সত্যস্য সত্পতিম্ ॥৪॥

69.5

আ হরয়ঃ সসৃজ্রিরেঽরুষীরধি বর্হিষি । যত্রাভি সংনবামহে ॥৫॥

69.6

ইন্দ্রায় গাব আশিরং দুদুহ্রে বজ্রিণে মধু । যত্সীমুপহ্বরে বিদৎ ॥৬॥

69.7

উদ্যদ্ব্রধ্নস্য বিষ্টপং গৃহমিন্দ্রশ্চ গন্বহি । মধ্বঃ পীত্বা সচেবহি ত্রিঃ সপ্ত সখ্যুঃ পদে ॥৭॥

69.8

অর্চত প্রার্চত প্রিয়মেধাসো অর্চত । অর্চন্তু পুত্রকা উত পুরং ন ধৃষ্ণ্বর্চত ॥৮॥

69.9

অব স্বরাতি গর্গরো গোধা পরি সনিষ্বণৎ । পিঙ্গা পরি চনিষ্কদদিন্দ্রায় ব্রহ্মোদ্যতম্ ॥৯॥

69.10

আ যত্পতন্ত্যেন্যঃ সুদুঘা অনপস্ফুরঃ । অপস্ফুরং গৃভায়ত সোমমিন্দ্রায় পাতবে ॥১০॥

69.11

অপাদিন্দ্রো অপাদগ্নির্বিশ্বে দেবা অমত্সত । বরুণ ইদিহ ক্ষয়ত্তমাপো অভ্যনূষত বত্সং সংশিশ্বরীরিব ॥১১॥

69.12

সুদেবো অসি বরুণ যস্য তে সপ্ত সিন্ধবঃ । অনুক্ষরন্তি কাকুদং সূর্ম্যং সুষিরামিব ॥১২॥

69.13

যো ব্যতীঁরফাণয়ত্সুয়ুক্তাঁ উপ দাশুষে । তক্বো নেতা তদিদ্বপুরুপমা যো অমুচ্যত ॥১৩॥

69.14

অতীদু শক্র ওহত ইন্দ্রো বিশ্বা অতি দ্বিষঃ । ভিনত্কনীন ওদনং পচ্যমানং পরো গিরা ॥১৪॥

69.15

অর্ভকো ন কুমারকোঽধি তিষ্ঠন্নবং রথম্ । স পক্ষন্মহিষং মৃগং পিত্রে মাত্রে বিভুক্রতুম্ ॥১৫॥

69.16

আ তূ সুশিপ্র দম্পতে রথং তিষ্ঠা হিরণ্যয়ম্ । অধ দ্যুক্ষং সচেবহি সহস্রপাদমরুষং স্বস্তিগামনেহসম্ ॥১৬॥

69.17

তং ঘেমিত্থা নমস্বিন উপ স্বরাজমাসতে । অর্থং চিদস্য সুধিতং যদেতব আবর্তয়ন্তি দাবনে ॥১৭॥

69.18

অনু প্রত্নস্যৌকসঃ প্রিয়মেধাস এষাম্ । পূর্বামনু প্রয়তিং বৃক্তবর্হিষো হিতপ্রয়স আশত ॥১৮॥