সূক্ত 68

68.1

১৯ প্রিয়মেধ আঙ্গিরসঃ । ইন্দ্রঃ; ১৪-১৯ ঋক্ষাশ্বমেধৌ । গায়ত্রী , অনুষ্টুম্মুখঃ প্রগাথঃ= ( অনুষ্টুপ্ + গায়ত্র্যৌ ) ১,৪,৭,১০ অনুষ্টুপ্ , ১৬ শংকুমতী ।

আ ত্বা রথং যথোতয়ে সুম্নায় বর্তয়ামসি । তুবিকূর্মিমৃতীষহমিন্দ্র শবিষ্ঠ সত্পতে ॥১॥

তুবিশুষ্ম তুবিক্রতো শচীবো বিশ্বয়া মতে । আ পপ্রাথ মহিত্বনা ॥২॥

যস্য তে মহিনা মহঃ পরি জ্মায়ন্তমীয়তুঃ । হস্তা বজ্রং হিরণ্যয়ম্ ॥৩॥

বিশ্বানরস্য বস্পতিমনানতস্য শবসঃ । এবৈশ্চ চর্ষণীনামূতী হুবে রথানাম্ ॥৪॥

অভিষ্টয়ে সদাবৃধং স্বর্মীল্হেষু যং নরঃ । নানা হবন্ত ঊতয়ে ॥৫॥

পরোমাত্রমৃচীষমমিন্দ্রমুগ্রং সুরাধসম্ । ঈশানং চিদ্বসূনাম্ ॥৬॥

তংতমিদ্রাধসে মহ ইন্দ্রং চোদামি পীতয়ে । যঃ পূর্ব্যামনুষ্টুতিমীশে কৃষ্টীনাং নৃতুঃ ॥৭॥

ন যস্য তে শবসান সখ্যমানংশ মর্ত্যঃ । নকিঃ শবাংসি তে নশৎ ॥৮॥

ত্বোতাসস্ত্বা যুজাঽপ্সু সূর্যে মহদ্ধনম্ । জয়েম পৃত্সু বজ্রিবঃ ॥৯॥

তং ত্বা যজ্ঞেভিরীমহে তং গীর্ভির্গির্বণস্তম । ইন্দ্র যথা চিদাবিথ বাজেষু পুরুমায্যম্ ॥১০॥

যস্য তে স্বাদু সখ্যং স্বাদ্বী প্রণীতিরদ্রিবঃ । যজ্ঞো বিতন্তসায্যঃ ॥১১॥

উরু ণস্তন্বে৩ তন উরু ক্ষয়ায় নস্কৃধি । উরু ণো যন্ধি জীবসে ॥১২॥

উরুং নৃভ্য উরুং গব উরুং রথায় পন্থাম্ । দেববীতিং মনামহে ॥১৩॥

উপ মা ষড্দ্বাদ্বা নরঃ সোমস্য হর্ষ্যা । তিষ্ঠন্তি স্বাদুরাতয়ঃ ॥১৪॥

ঋজ্রাবিন্দ্রোত আ দদে হরী ঋক্ষস্য সূনবি । আশ্বমেধস্য রোহিতা ॥১৫॥

সুরথাঁ আতিথিগ্বে স্বভীশূঁরার্ক্ষে । আশ্বমেধে সুপেশসঃ ॥১৬॥

ষলশ্বাঁ আতিথিগ্ব ইন্দ্রোতে বধূমতঃ । সচা পূতক্রতৌ সনম্ ॥১৭॥

ঐষু চেতদ্বৃষণ্বত্যন্তৠজ্রেষ্বরুষী । স্বভীশুঃ কশাবতী ॥১৮॥

ন যুষ্মে বাজবন্ধবো নিনিত্সুশ্চন মর্ত্যঃ । অবদ্যমধি দীধরৎ ॥১৯॥