সূক্ত 33

33.1

১৯ মেধ্যাতিথি : কাণ্বঃ। ইন্দ্রঃ । বৃহতী , ১৬-১৮ গায়ত্রী , ১৯ অনুষ্টুপ্ ।

বয়ং ঘ ত্বা সুতাবন্ত আপো ন বৃক্তবর্হিষঃ । পবিত্রস্য প্রস্রবণেষু বৃত্রহন্পরি স্তোতার আসতে ॥১॥

স্বরন্তি ত্বা সুতে নরো বসো নিরেক উক্থিনঃ । কদা সুতং তৃষাণ ওক আ গম ইন্দ্র স্বব্দীব বংসগঃ ॥২॥

কণ্বেভির্ধৃষ্ণবা ধৃষদ্বাজং দর্ষি সহস্রিণম্ । পিশঙ্গরূপং মঘবন্বিচর্ষণে মক্ষূ গোমন্তমীমহে ॥৩॥

পাহি গায়ান্ধসো মদ ইন্দ্রায় মেধ্যাতিথে । যঃ সম্মিশ্লো হর্যোর্যঃ সুতে সচা বজ্রী রথো হিরণ্যয়ঃ ॥৪॥

যঃ সুষব্যঃ সুদক্ষিণ ইনো যঃ সুক্রতুর্গৃণে । য আকরঃ সহস্রা যঃ শতামঘ ইন্দ্রো যঃ পূর্ভিদারিতঃ ॥৫॥

যো ধৃষিতো যোঽবৃতো যো অস্তি শ্মশ্রুষু শ্রিতঃ । বিভূতদ্যুম্নশ্চ্যবনঃ পুরুষ্টুতঃ ক্রত্বা গৌরিব শাকিনঃ ॥৬॥

ক ঈং বেদ সুতে সচা পিবন্তং কদ্বয়ো দধে । অয়ং যঃ পুরো বিভিনত্ত্যোজসা মন্দানঃ শিপ্র্যন্ধসঃ ॥৭॥

দানা মৃগো ন বারণঃ পুরুত্রা চরথং দধে । নকিষ্ট্বা নি যমদা সুতে গমো মহাঁশ্চরস্যোজসা ॥৮॥

য উগ্রঃ সন্ননিষ্টৃতঃ স্থিরো রণায় সংস্কৃতঃ । যদি স্তোতুর্মঘবা শৃণবদ্ধবং নেন্দ্রো যোষত্যা গমৎ ॥৯॥

সত্যমিত্থা বৃষেদসি বৃষজূতির্নোঽবৃতঃ । বৃষা হ্যুগ্র শৃণ্বিষে পরাবতি বৃষো অর্বাবতি শ্রুতঃ ॥১০॥

বৃষণস্তে অভীশবো বৃষা কশা হিরণ্যয়ী । বৃষা রথো মঘবন্বৃষণা হরী বৃষা ত্বং শতক্রতো ॥১১॥

বৃষা সোতা সুনোতু তে বৃষন্নৃজীপিন্না ভর । বৃষা দধন্বে বৃষণং নদীষ্বা তুভ্যং স্থাতর্হরীণাম্ ॥১২॥

এন্দ্র যাহি পীতয়ে মধু শবিষ্ঠ সোম্যম্ । নায়মচ্ছা মঘবা শৃণবদ্গিরো ব্রহ্মোক্থা চ সুক্রতুঃ ॥১৩॥

বহন্তু ত্বা রথেষ্ঠামা হরয়ো রথয়ুজঃ । তিরশ্চিদর্যং সবনানি বৃত্রহন্নন্যেষাং যা শতক্রতো ॥১৪॥

অস্মাকমদ্যান্তমং স্তোমং ধিষ্ব মহামহ । অস্মাকং তে সবনা সন্তু শংতমা মদায় দ্যুক্ষ সোমপাঃ ॥১৫॥

নহি ষস্তব নো মম শাস্ত্রে অন্যস্য রণ্যতি । যো অস্মান্বীর আনয়ৎ ॥১৬॥

ইন্দ্রশ্চিদ্ঘা তদব্রবীত্স্ত্রিয়া অশাস্যং মনঃ । উতো অহ ক্রতুং রঘুম্ ॥১৭॥

সপ্তী চিদ্ঘা মদচ্যুতা মিথুনা বহতো রথম্ । এবেদ্ধূর্বৃষ্ণ উত্তরা ॥১৮॥

অধঃ পশ্যস্ব মোপরি সংতরাং পাদকৌ হর । মা তে কশপ্লকৌ দৃশন্ত্স্ত্রী হি ব্রহ্মা বভূবিথ ॥১৯॥