সূক্ত 14

14.1

১৫ গোষূক্ত্যশ্বসূক্তিনৌ কাণ্বায়নৌ । ইন্দ্রঃ । গায়ত্রী ।

যদিন্দ্রাহং যথা ত্বমীশীয় বস্ব এক ইৎ । স্তোতা মে গোষখা স্যাৎ ॥১॥

শিক্ষেয়মস্মৈ দিত্সেয়ং শচীপতে মনীষিণে । যদহং গোপতিঃ স্যাম্ ॥২॥

ধেনুষ্ট ইন্দ্র সূনৃতা যজমানায় সুন্বতে । গামশ্বং পিপ্যুষী দুহে ॥৩॥

ন তে বর্তাস্তি রাধস ইন্দ্র দেবো ন মর্ত্যঃ । যদ্দিত্সসি স্তুতো মঘম্ ॥৪॥

যজ্ঞ ইন্দ্রমবর্ধয়দ্যদ্ভূমিং ব্যবর্তয়ৎ । চক্রাণ ওপশং দিবি ॥৫॥

বাবৃধানস্য তে বয়ং বিশ্বা ধনানি জিগ্যুষঃ । ঊতিমিন্দ্রা বৃণীমহে ॥৬॥

ব্য১ন্তরিক্ষমতিরন্মদে সোমস্য রোচনা । ইন্দ্রো যদভিনদ্বলম্ ॥৭॥

উদ্গা আজদঙ্গিরোভ্য আবিষ্কৃণ্বন্গুহা সতীঃ । অর্বাঞ্চং নুনুদে বলম্ ॥৮॥

ইন্দ্রেণ রোচনা দিবো দৃল্হানি দৃংহিতানি চ । স্থিরাণি ন পরাণুদে ॥৯॥

অপামূর্মির্মদন্নিব স্তোম ইন্দ্রাজিরায়তে । বি তে মদা অরাজিষুঃ ॥১০॥

ত্বং হি স্তোমবর্ধন ইন্দ্রাস্যুক্থবর্ধনঃ । স্তোতৄণামুত ভদ্রকৃৎ ॥১১॥

ইন্দ্রমিত্কেশিনা হরী সোমপেয়ায় বক্ষতঃ । উপ যজ্ঞং সুরাধসম্ ॥১২॥

অপাং ফেনেন নমুচেঃ শির ইন্দ্রোদবর্তয়ঃ । বিশ্বা যদজয়ঃ স্পৃধঃ ॥১৩॥

মায়াভিরুত্সিসৃপ্সত ইন্দ্র দ্যামারুরুক্ষতঃ । অব দস্যূঁরধূনুথাঃ ॥১৪॥

অসুন্বামিন্দ্র সংসদং বিষূচীং ব্যনাশয়ঃ । সোমপা উত্তরো ভবন্ ॥১৫॥