সূক্ত 13

13.1

৩৩ নারদঃ কাণ্বঃ । ইন্দ্রঃ । উষ্ণিক্ ।

ইন্দ্রঃ সুতেষু সোমেষু ক্রতুং পুনীত উক্থ্যম্ । বিদে বৃধস্য দক্ষসো মহান্হি ষঃ ॥১॥

13.2

স প্রথমে ব্যোমনি দেবানাং সদনে বৃধঃ । সুপারঃ সুশ্রবস্তমঃ সমপ্সুজিৎ ॥২॥

13.3

তমহ্বে বাজসাতয় ইন্দ্রং ভরায় শুষ্মিণম্ । ভবা নঃ সুম্নে অন্তমঃ সখা বৃধে ॥৩॥

13.4

ইয়ং ত ইন্দ্র গির্বণো রাতিঃ ক্ষরতি সুন্বতঃ । মন্দানো অস্য বর্হিষো বি রাজসি ॥৪॥

13.5

নূনং তদিন্দ্র দদ্ধি নো যত্ত্বা সুন্বন্ত ঈমহে । রয়িং নশ্চিত্রমা ভরা স্বর্বিদম্ ॥৫॥

13.6

স্তোতা যত্তে বিচর্ষণিরতিপ্রশর্ধয়দ্গিরঃ । বয়া ইবানু রোহতে জুষন্ত যৎ ॥৬॥

13.7

প্রত্নবজ্জনয়া গিরঃ শৃণুধী জরিতুর্হবম্ । মদেমদে ববক্ষিথা সুকৃত্বনে ॥৭॥

13.8

ক্রীলন্ত্যস্য সূনৃতা আপো ন প্রবতা যতীঃ । অয়া ধিয়া য উচ্যতে পতির্দিবঃ ॥৮॥

13.9

উতো পতির্য উচ্যতে কৃষ্টীনামেক ইদ্বশী । নমোবৃধৈরবস্যুভিঃ সুতে রণ ॥৯॥

13.10

স্তুহি শ্রুতং বিপশ্চিতং হরী যস্য প্রসক্ষিণা । গন্তারা দাশুষো গৃহং নমস্বিনঃ ॥১০॥

13.11

তূতুজানো মহেমতেঽশ্বেভিঃ প্রুষিতপ্সুভিঃ । আ যাহি যজ্ঞমাশুভিঃ শমিদ্ধি তে ॥১১॥

13.12

ইন্দ্র শবিষ্ঠ সত্পতে রয়িং গৃণত্সু ধারয় । শ্রবঃ সূরিভ্যো অমৃতং বসুত্বনম্ ॥১২॥

13.13

হবে ত্বা সূর উদিতে হবে মধ্যংদিনে দিবঃ । জুষাণ ইন্দ্র সপ্তিভির্ন আ গহি ॥১৩॥

13.14

আ তূ গহি প্র তু দ্রব মত্স্বা সুতস্য গোমতঃ । তন্তুং তনুষ্ব পূর্ব্যং যথা বিদে ॥১৪॥

13.15

যচ্ছক্রাসি পরাবতি যদর্বাবতি বৃত্রহন্ । যদ্বা সমুদ্রে অন্ধসোঽবিতেদসি ॥১৫॥

13.16

ইন্দ্রং বর্ধন্তু নো গির ইন্দ্রং সুতাস ইন্দবঃ । ইন্দ্রে হবিষ্মতীর্বিশো অরাণিষুঃ ॥১৬॥

13.17

তমিদ্বিপ্রা অবস্যবঃ প্রবত্বতীভিরূতিভিঃ । ইন্দ্রং ক্ষোণীরবর্ধয়ন্বয়া ইব ॥১৭॥

13.18

ত্রিকদ্রুকেষু চেতনং দেবাসো যজ্ঞমত্নত । তমিদ্বর্ধন্তু নো গিরঃ সদাবৃধম্ ॥১৮॥

13.19

স্তোতা যত্তে অনুব্রত উক্থান্যৃতুথা দধে । শুচিঃ পাবক উচ্যতে সো অদ্ভুতঃ ॥১৯॥

13.20

তদিদ্রুদ্রস্য চেততি যহ্বং প্রত্নেষু ধামসু । মনো যত্রা বি তদ্দধুর্বিচেতসঃ ॥২০॥

13.21

যদি মে সখ্যমাবর ইমস্য পাহ্যন্ধসঃ । যেন বিশ্বা অতি দ্বিষো অতারিম ॥২১॥

13.22

কদা ত ইন্দ্র গির্বণঃ স্তোতা ভবাতি শংতমঃ । কদা নো গব্যে অশ্ব্যে বসৌ দধঃ ॥২২॥

13.23

উত তে সুষ্টুতা হরী বৃষণা বহতো রথম্ । অজুর্যস্য মদিন্তমং যমীমহে ॥২৩॥

13.24

তমীমহে পুরুষ্টুতং যহ্বং প্রত্নাভিরূতিভিঃ । নি বর্হিষি প্রিয়ে সদদধ দ্বিতা ॥২৪॥

13.25

বর্ধস্বা সু পুরুষ্টুত ঋষিষ্টুতাভিরূতিভিঃ । ধুক্ষস্ব পিপ্যুষীমিষমবা চ নঃ ॥২৫॥

13.26

ইন্দ্র ত্বমবিতেদসীত্থা স্তুবতো অদ্রিবঃ । ঋতাদিয়র্মি তে ধিয়ং মনোয়ুজম্ ॥২৬॥

13.27

ইহ ত্যা সধমাদ্যা যুজানঃ সোমপীতয়ে । হরী ইন্দ্র প্রতদ্বসূ অভি স্বর ॥২৭॥

13.28

অভি স্বরন্তু যে তব রুদ্রাসঃ সক্ষত শ্রিয়ম্ । উতো মরুত্বতীর্বিশো অভি প্রয়ঃ ॥২৮॥

13.29

ইমা অস্য প্রতূর্তয়ঃ পদং জুষন্ত যদ্দিবি । নাভা যজ্ঞস্য সং দধুর্যথা বিদে ॥২৯॥

13.30

অয়ং দীর্ঘায় চক্ষসে প্রাচি প্রয়ত্যধ্বরে । মিমীতে যজ্ঞমানুষগ্বিচক্ষ্য ॥৩০॥

13.31

বৃষায়মিন্দ্র তে রথ উতো তে বৃষণা হরী । বৃষা ত্বং শতক্রতো বৃষা হবঃ ॥৩১॥

13.32

বৃষা গ্রাবা বৃষা মদো বৃষা সোমো অয়ং সুতঃ । বৃষা যজ্ঞো যমিন্বসি বৃষা হবঃ ॥৩২॥

13.33

বৃষা ত্বা বৃষণং হুবে বজ্রিঞ্চিত্রাভিরূতিভিঃ । বাবন্থ হি প্রতিষ্টুতিং বৃষা হবঃ ॥৩৩॥