সূক্ত 12

12.1

৩৩ পর্বতঃ কাণ্বঃ । ইন্দ্রঃ ।উষ্ণিক্ , ৩৩ শংকুমতী ( পিংগলমতেন ) ।

য ইন্দ্র সোমপাতমো মদঃ শবিষ্ঠ চেততি । যেনা হংসি ন্য১ত্রিণং তমীমহে ॥১॥

12.2

যেনা দশগ্বমধ্রিগুং বেপয়ন্তং স্বর্ণরম্ । যেনা সমুদ্রমাবিথা তমীমহে ॥২॥

12.3

যেন সিন্ধুং মহীরপো রথাঁ ইব প্রচোদয়ঃ । পন্থামৃতস্য যাতবে তমীমহে ॥৩॥

12.4

ইমং স্তোমমভিষ্টয়ে ঘৃতং ন পূতমদ্রিবঃ । যেনা নু সদ্য ওজসা ববক্ষিথ ॥৪॥

12.5

ইমং জুষস্ব গির্বণঃ সমুদ্র ইব পিন্বতে । ইন্দ্র বিশ্বাভিরূতিভির্ববক্ষিথ ॥৫॥

12.6

যো নো দেবঃ পরাবতঃ সখিত্বনায় মামহে । দিবো ন বৃষ্টিং প্রথয়ন্ববক্ষিথ ॥৬॥

12.7

ববক্ষুরস্য কেতবো উত বজ্রো গভস্ত্যোঃ । যত্সূর্যো ন রোদসী অবর্ধয়ৎ ॥৭॥

12.8

যদি প্রবৃদ্ধ সত্পতে সহস্রং মহিষাঁ অঘঃ । আদিত্ত ইন্দ্রিয়ং মহি প্র বাবৃধে ॥৮॥

12.9

ইন্দ্রঃ সূর্যস্য রশ্মিভির্ন্যর্শসানমোষতি । অগ্নির্বনেব সাসহিঃ প্র বাবৃধে ॥৯॥

12.10

ইয়ং ত ঋত্বিয়াবতী ধীতিরেতি নবীয়সী । সপর্যন্তী পুরুপ্রিয়া মিমীত ইৎ ॥১০॥

12.11

গর্ভো যজ্ঞস্য দেবয়ুঃ ক্রতুং পুনীত আনুষক্ । স্তোমৈরিন্দ্রস্য বাবৃধে মিমীত ইৎ ॥১১॥

12.12

সনির্মিত্রস্য পপ্রথ ইন্দ্রঃ সোমস্য পীতয়ে । প্রাচী বাশীব সুন্বতে মিমীত ইৎ ॥১২॥

12.13

যং বিপ্রা উক্থবাহসোঽভিপ্রমন্দুরায়বঃ । ঘৃতং ন পিপ্য আসন্যৃতস্য যৎ ॥১৩॥

12.14

উত স্বরাজে অদিতিঃ স্তোমমিন্দ্রায় জীজনৎ । পুরুপ্রশস্তমূতয় ঋতস্য যৎ ॥১৫॥

12.15

অভি বহ্নয় ঊতয়েঽনূষত প্রশস্তয়ে । ন দেব বিব্রতা হরী ঋতস্য যৎ ॥১৫॥

12.16

যত্সোমমিন্দ্র বিষ্ণবি যদ্বা ঘ ত্রিত আপ্ত্যে । যদ্বা মরুত্সু মন্দসে সমিন্দুভিঃ ॥১৬॥

12.17

যদ্বা শক্র পরাবতি সমুদ্রে অধি মন্দসে । অস্মাকমিত্সুতে রণা সমিন্দুভিঃ ॥১৭॥

12.18

যদ্বাসি সুন্বতো বৃধো যজমানস্য সত্পতে । উক্থে বা যস্য রণ্যসি সমিন্দুভিঃ ॥১৮॥

12.19

দেবংদেবং বোঽবস ইন্দ্রমিন্দ্রং গৃণীষণি । অধা যজ্ঞায় তুর্বণে ব্যানশুঃ ॥১৯॥

12.20

যজ্ঞেভির্যজ্ঞবাহসং সোমেভিঃ সোমপাতমম্ । হোত্রাভিরিন্দ্রং বাবৃধুর্ব্যানশুঃ ॥২০॥

12.21

মহীরস্য প্রণীতয়ঃ পূর্বীরুত প্রশস্তয়ঃ । বিশ্বা বসূনি দাশুষে ব্যানশুঃ ॥২১॥

12.22

ইন্দ্রং বৃত্রায় হন্তবে দেবাসো দধিরে পুরঃ । ইন্দ্রং বাণীরনূষতা সমোজসে ॥২২॥

12.23

মহান্তং মহিনা বয়ং স্তোমেভির্হবনশ্রুতম্ । অর্কৈরভি প্র ণোনুমঃ সমোজসে ॥২৩॥

12.24

ন যং বিবিক্তো রোদসী নান্তরিক্ষাণি বজ্রিণম্ । অমাদিদস্য তিত্বিষে সমোজসঃ ॥২৪॥

12.25

যদিন্দ্র পৃতনাজ্যে দেবাস্ত্বা দধিরে পুরঃ । আদিত্তে হর্যতা হরী ববক্ষতুঃ ॥২৫॥

12.26

যদা বৃত্রং নদীবৃতং শবসা বজ্রিন্নবধীঃ । আদিত্তে হর্যতা হরী ববক্ষতুঃ ॥২৬॥

12.27

যদা তে বিষ্ণুরোজসা ত্রীণি পদা বিচক্রমে । আদিত্তে হর্যতা হরী ববক্ষতুঃ ॥২৭॥

12.28

যদা তে হর্যতা হরী বাবৃধাতে দিবেদিবে । আদিত্তে বিশ্বা ভুবনানি যেমিরে ॥২৮॥

12.29

যদা তে মারুতীর্বিশস্তুভ্যমিন্দ্র নিয়েমিরে । আদিত্তে বিশ্বা ভুবনানি যেমিরে ॥২৯॥

12.30

যদা সূর্যমমুং দিবি শুক্রং জ্যোতিরধারয়ঃ । আদিত্তে বিশ্বা ভুবনানি যেমিরে ॥৩০॥

12.31

ইমাং ত ইন্দ্র সুষ্টুতিং বিপ্র ইয়র্তি ধীতিভিঃ । জামিং পদেব পিপ্রতীং প্রাধ্বরে ॥৩১॥

12.32

যদস্য ধামনি প্রিয়ে সমীচীনাসো অস্বরন্ । নাভা যজ্ঞস্য দোহনা প্রাধ্বরে ॥৩২॥

12.33

সুবীর্যং স্বশ্ব্যং সুগব্যমিন্দ্র দদ্ধি নঃ । হোতেব পূর্বচিত্তয়ে প্রাধ্বরে ॥৩৩॥