সূক্ত 71

71.1

৬ মৈত্রাবরুণির্বসিষ্ঠঃ। অশ্বিনৌ । ত্রিষ্টুপ্ ।

অপ স্বসুরুষসো নগ্জিহীতে রিণক্তি কৃষ্ণীররুষায় পন্থাম্ ।
অশ্বামঘা গোমঘা বাং হুবেম দিবা নক্তং শরুমস্মদ্যুয়োতম্ ॥১॥

71.2

উপায়াতং দাশুষে মর্ত্যায় রথেন বামমশ্বিনা বহন্তা ।
যুয়ুতমস্মদনিরামমীবাং দিবা নক্তং মাধ্বী ত্রাসীথাং নঃ ॥২॥

71.3

আ বাং রথমবমস্যাং ব্যুষ্টৌ সুম্নায়বো বৃষণো বর্তয়ন্তু ।
স্যূমগভস্তিমৃতয়ুগ্ভিরশ্বৈরাশ্বিনা বসুমন্তং বহেথাম্ ॥৩॥

71.4

যো বাং রথো নৃপতী অস্তি বোল্হা ত্রিবন্ধুরো বসুমাঁ উস্রয়ামা ।
আ ন এনা নাসত্যোপ যাতমভি যদ্বাং বিশ্বপ্স্ন্যো জিগাতি ॥৪॥

71.5

যুবং চ্যবানং জরসোঽমুমুক্তং নি পেদব ঊহথুরাশুমশ্বম্ ।
নিরংহসস্তমসঃ স্পর্তমত্রিং নি জাহুষং শিথিরে ধাতমন্তঃ ॥৫॥

71.6

ইয়ং মনীষা ইয়মশ্বিনা গীরিমাং সুবৃক্তিং বৃষণা জুষেথাম্ ।
ইমা ব্রহ্মাণি যুবয়ূন্যগ্মন্যূয়ং পাত স্বস্তিভিঃ সদা নঃ ॥৬॥