সূক্ত 33

33.1

১৪ (১-৯) মৈত্রাবরুণির্বসিষ্ঠঃ , ১০–১৪ বসিষ্ঠপুত্রাঃ। ১-৯ বসিষ্ঠপুত্রাঃ ইন্দ্রো বা ; ১০ – ১৪ বসিষ্ঠ : । ত্রিষ্টুপ্ ।

শ্বিত্যঞ্চো মা দক্ষিণতস্কপর্দা ধিয়ংজিন্বাসো অভি হি প্রমন্দুঃ ।
উত্তিষ্ঠন্বোচে পরি বর্হিষো নৄন্ন মে দূরাদবিতবে বসিষ্ঠাঃ ॥১॥

দূরাদিন্দ্রমনয়ন্না সুতেন তিরো বৈশন্তমতি পান্তমুগ্রম্ ।
পাশদ্যুম্নস্য বায়তস্য সোমাত্সুতাদিন্দ্রোঽবৃণীতা বসিষ্ঠান্ ॥২॥

এবেন্নু কং সিন্ধুমেভিস্ততারেবেন্নু কং ভেদমেভির্জঘান ।
এবেন্নু কং দাশরাজ্ঞে সুদাসং প্রাবদিন্দ্রো ব্রহ্মণা বো বসিষ্ঠাঃ ॥৩॥

জুষ্টী নরো ব্রহ্মণা বঃ পিতৄণামক্ষমব্যয়ং ন কিলা রিষাথ ।
যচ্ছক্বরীষু বৃহতা রবেণেন্দ্রে শুষ্মমদধাতা বসিষ্ঠাঃ ॥৪॥

উদ্দ্যামিবেত্তৃষ্ণজো নাথিতাসোঽদীধয়ুর্দাশরাজ্ঞে বৃতাসঃ ।
বসিষ্ঠস্য স্তুবত ইন্দ্রো অশ্রোদুরুং তৃত্সুভ্যো অকৃণোদু লোকম্ ॥৫॥

দণ্ডা ইবেদ্গোঅজনাস আসন্পরিচ্ছিন্না ভরতা অর্ভকাসঃ ।
অভবচ্চ পুরএতা বসিষ্ঠ আদিত্তৃত্সূনাং বিশো অপ্রথন্ত ॥৬॥

ত্রয়ঃ কৃণ্বন্তি ভুবনেষু রেতস্তিস্রঃ প্রজা আর্যা জ্যোতিরগ্রাঃ ।
ত্রয়ো ঘর্মাস উষসং সচন্তে সর্বাঁ ইত্তাঁ অনু বিদুর্বসিষ্ঠাঃ ॥৭॥

সূর্যস্যেব বক্ষথো জ্যোতিরেষাং সমুদ্রস্যেব মহিমা গভীরঃ ।
বাতস্যেব প্রজবো নান্যেন স্তোমো বসিষ্ঠা অন্বেতবে বঃ ॥৮॥

ত ইন্নিণ্যং হৃদয়স্য প্রকেতৈঃ সহস্রবল্শমভি সং চরন্তি ।
যমেন ততং পরিধিং বয়ন্তোঽপ্সরস উপ সেদুর্বসিষ্ঠাঃ ॥৯॥

বিদ্যুতো জ্যোতিঃ পরি সংজিহানং মিত্রাবরুণা যদপশ্যতাং ত্বা ।
তত্তে জন্মোতৈকং বসিষ্ঠাঽগস্ত্যো যত্ত্বা বিশ আজভার ॥১০॥

উতাসি মৈত্রাবরুণো বসিষ্ঠোর্বশ্যা ব্রহ্মন্মনসোঽধি জাতঃ ।
দ্রপ্সং স্কন্নং ব্রহ্মণা দৈব্যেন বিশ্বে দেবাঃ পুষ্করে ত্বাদদন্ত ॥১১॥

স প্রকেত উভয়স্য প্রবিদ্বান্ত্সহস্রদান উত বা সদানঃ ।
যমেন ততং পরিধিং বয়িষ্যন্নপ্সরসঃ পরি জজ্ঞে বসিষ্ঠঃ ॥১২॥

সত্রে হ জাতাবিষিতা নমোভিঃ কুম্ভে রেতঃ সিষিচতুঃ
সমানম্ । ততো হ মান উদিয়ায় মধ্যাত্ততো জাতমৃষিমাহুর্বসিষ্ঠম্ ॥১৩॥

উক্থভৃতং সামভৃতং বিভর্তি গ্রাবাণং বিভ্রত্প্র বদাত্যগ্রে ।
উপৈনমাধ্বং সুমনস্যমানা আ বো গচ্ছাতি প্রতৃদো বসিষ্ঠঃ ॥১৪॥