সূক্ত 32

32.1

২৭ (১-২৫) মৈত্রাবরুণির্বসিষ্ঠঃ , ২৬ পূর্বার্ধর্চস্য শক্তির্বাসিষ্ঠো বা (শাট্যায়নে ব্রাহ্মণে),২৬-২৭ শক্তির্বাসিষ্ঠো বা (তাণ্ডকে ব্রাহ্মণে) । ইন্দ্রঃ । প্রগাথঃ – (বৃহতী , সতোবৃহতী),৩ দ্বিপদা বিরাট্ ।

মো ষু ত্বা বাঘতশ্চনাঽঽরে অস্মন্নি রীরমন্ ।
আরাত্তাচ্চিত্সধমাদং ন আ গহীহ বা সন্নুপ শ্রুধি ॥১॥

32.2

ইমে হি তে ব্রহ্মকৃতঃ সুতে সচা মধৌ ন মক্ষ আসতে ।
ইন্দ্রে কামং জরিতারো বসূয়বো রথে ন পাদমা দধুঃ ॥২॥

32.3

রায়স্কামো বজ্রহস্তং সুদক্ষিণং পুত্রো ন পিতরং হুবে ॥৩॥

32.4

ইম ইন্দ্রায় সুন্বিরে সোমাসো দধ্যাশিরঃ ।
তাঁ আ মদায় বজ্রহস্ত পীতয়ে হরিভ্যাং যাহ্যোক আ ॥৪॥

32.5

শ্রবচ্ছ্রুত্কর্ণ ঈয়তে বসূনাং নূ চিন্নো মর্ধিষদ্গিরঃ ।
সদ্যশ্চিদ্যঃ সহস্রাণি শতা দদন্নকির্দিত্সন্তমা মিনৎ ॥৫॥

32.6

স বীরো অপ্রতিষ্কুত ইন্দ্রেণ শূশুবে নৃভিঃ ।
যস্তে গভীরা সবনানি বৃত্রহন্ত্সুনোত্যা চ ধাবতি ॥৬॥

32.7

ভবা বরূথং মঘবন্মঘোনাং যত্সমজাসি শর্ধতঃ ।
বি ত্বাহতস্য বেদনং ভজেমহ্যা দূণাশো ভরা গয়ম্ ॥৭॥

32.8

সুনোতা সোমপাব্নে সোমমিন্দ্রায় বজ্রিণে ।
পচতা পক্তীরবসে কৃণুধ্বমিত্পৃণন্নিত্পৃণতে ময়ঃ ॥৮॥

32.9

মা স্রেধত সোমিনো দক্ষতা মহে কৃণুধ্বং রায় আতুজে ।
তরণিরিজ্জয়তি ক্ষেতি পুষ্যতি ন দেবাসঃ কবত্নবে ॥৯॥

32.10

নকিঃ সুদাসো রথং পর্যাস ন রীরমৎ ।
ইন্দ্রো যস্যাবিতা যস্য মরুতো গমত্স গোমতি ব্রজে ॥১০॥

32.11

গমদ্বাজং বাজয়ন্নিন্দ্র মর্ত্যো যস্য ত্বমবিতা ভুবঃ ।
অস্মাকং বোধ্যবিতা রথানামস্মাকং শূর নৃণাম্ ॥১১॥

32.12

উদিন্ন্বস্য রিচ্যতেংঽশো ধনং ন জিগ্যুষঃ ।
য ইন্দ্রো হরিবান্ন দভন্তি তং রিপো দক্ষং দধাতি সোমিনি ॥১২॥

32.13

মন্ত্রমখর্বং সুধিতং সুপেশসং দধাত যজ্ঞিয়েষ্বা ।
পূর্বীশ্চন প্রসিতয়স্তরন্তি তং য ইন্দ্রে কর্মণা ভুবৎ ॥১৩॥

32.14

কস্তমিন্দ্র ত্বাবসুমা মর্ত্যো দধর্ষতি ।
শ্রদ্ধা ইত্তে মঘবন্পার্যে দিবি বাজী বাজং সিষাসতি ॥১৪॥

32.15

মঘোনঃ স্ম বৃত্রহত্যেষু চোদয় যে দদতি প্রিয়া বসু ।
তব প্রণীতী হর্যশ্ব সূরিভির্বিশ্বা তরেম দুরিতা ॥১৫॥

32.16

তবেদিন্দ্রাবমং বসু ত্বং পুষ্যসি মধ্যমম্ ।
সত্রা বিশ্বস্য পরমস্য রাজসি নকিষ্ট্বা গোষু বৃণ্বতে ॥১৬॥

32.17

ত্বং বিশ্বস্য ধনদা অসি শ্রুতো য ঈং ভবন্ত্যাজয়ঃ ।
তবায়ং বিশ্বঃ পুরুহূত পার্থিবোঽবস্যুর্নাম ভিক্ষতে ॥১৭॥

32.18

যদিন্দ্র যাবতস্ত্বমেতাবদহমীশীয় ।
স্তোতারমিদ্দিধিষেয় রদাবসো ন পাপত্বায় রাসীয় ॥১৮॥

32.19

শিক্ষেয়মিন্মহয়তে দিবেদিবে রায় আ কুহচিদ্বিদে ।
নহি ত্বদন্যন্মঘবন্ন আপ্যং বস্যো অস্তি পিতা চন ॥১৯॥

32.20

তরণিরিত্সিষাসতি বাজং পুরংধ্যা যুজা ।
আ ব ইন্দ্রং পুরুহূতং নমে গিরা নেমিং তষ্টেব সুদ্র্বম্ ॥২০॥

32.21

ন দুঃষ্টুতী মর্ত্যো বিন্দতে বসু ন স্রেধন্তং রয়ির্নশৎ ।
সুশক্তিরিন্মঘবন্তুভ্যং মাবতে দেষ্ণং যত্পার্যে দিবি ॥২১॥

32.22

অভি ত্বা শূর নোনুমোঽদুগ্ধা ইব ধেনবঃ ।
ঈশানমস্য জগতঃ স্বর্দৃশমীশানমিন্দ্র তস্থুষঃ ॥২২॥

32.23

ন ত্বাবাঁ অন্যো দিব্যো ন পার্থিবো ন জাতো ন জনিষ্যতে ।
অশ্বায়ন্তো মঘবন্নিন্দ্র বাজিনো গব্যন্তস্ত্বা হবামহে ॥২৩॥

32.24

অভী ষতস্তদা ভরেন্দ্র জ্যায়ঃ কনীয়সঃ । পুরূবসুর্হি মঘবন্ত্সনাদসি ভরেভরে চ হব্যঃ ॥২৪॥

32.25

পরা ণুদস্ব মঘবন্নমিত্রান্ত্সুবেদা নো বসূ কৃধি ।
অস্মাকং বোধ্যবিতা মহাধনে ভবা বৃধঃ সখীনাম্ ॥২৫॥

32.26

ইন্দ্র ক্রতুং ন আ ভর পিতা পুত্রেভ্যো যথা ।
শিক্ষা ণো অস্মিন্পুরুহূত যামনি জীবা জ্যোতিরশীমহি ॥২৬॥

32.27

মা নো অজ্ঞাতা বৃজনা দুরাধ্যো৩ মাশিবাসো অব ক্রমুঃ ।
ত্বয়া বয়ং প্রবতঃ শশ্বতীরপোঽতি শূর তরামসি ॥২৭॥