সূক্ত 31

31.1

১২ মৈত্রাবরুণির্বসিষ্ঠঃ। ইন্দ্রঃ ।গায়ত্রী, ১০-১২ বিরাট্ ।

প্র ব ইন্দ্রায় মাদনং হর্যশ্বায় গায়ত । সখায়ঃ সোমপাব্নে ॥১॥

31.2

শংসেদুক্থং সুদানব উত দ্যুক্ষং যথা নরঃ । চকৃমা সত্যরাধসে ॥২॥

31.3

ত্বং ন ইন্দ্র বাজয়ুস্ত্বং গব্যুঃ শতক্রতো । ত্বং হিরণ্যয়ুর্বসো ॥৩॥

31.4

বয়মিন্দ্র ত্বায়বোঽভি প্র ণোনুমো বৃষন্ । বিদ্ধী ত্ব১স্য নো বসো ॥৪॥

31.5

মা নো নিদে চ বক্তবেঽর্যো রন্ধীররাব্ণে । ত্বে অপি ক্রতুর্মম ॥৫॥

31.6

ত্বং বর্মাসি সপ্রথঃ পুরোয়োধশ্চ বৃত্রহন্ । ত্বয়া প্রতি ব্রুবে যুজা ॥৬॥

31.7

মহাঁ উতাসি যস্য তেঽনু স্বধাবরী সহঃ । মম্নাতে ইন্দ্র রোদসী ॥৭॥

31.8

তং ত্বা মরুত্বতী পরি ভুবদ্বাণী সয়াবরী । নক্ষমাণা সহ দ্যুভিঃ ॥৮॥

31.9

ঊর্ধ্বাসস্ত্বান্বিন্দবো ভুবন্দস্মমুপ দ্যবি । সং তে নমন্ত কৃষ্টয়ঃ ॥৯॥

31.10

প্র বো মহে মহিবৃধে ভরধ্বং প্রচেতসে প্র সুমতিং কৃণুধ্বম্ । বিশঃ পূর্বীঃ প্র চরা চর্ষণিপ্রাঃ ॥১০॥

31.11

উরুব্যচসে মহিনে সুবৃক্তিমিন্দ্রায় ব্রহ্ম জনয়ন্ত বিপ্রাঃ । তস্য ব্রতানি ন মিনন্তি ধীরাঃ ॥১১॥

31.12

ইন্দ্রং বাণীরনুত্তমন্যুমেব সত্রা রাজানং দধিরে সহধ্যৈ । হর্যশ্বায় বর্হয়া সমাপীন্ ॥১২॥