সূক্ত 104

104.1

২৫ মৈত্রাবরুণির্বসিষ্ঠঃ। {রাক্ষোঘ্নং} ইন্দ্রাসোমৌ , ৮ ,১৬ ,১৯ -২২ ইন্দ্রঃ, ৯, ১২-১৩ সোমঃ, ১০-১৪ অগ্নিঃ,১১ দেবাঃ, ১৭ গ্রাবাণঃ, ১৮ মরুতঃ, ২৩ {পূর্বার্ধস্য} বসিষ্ঠাশীঃ, {উত্তরার্ধস্য} পৃথিব্যন্তরিক্ষে। ত্রিষ্টুপ্ , ১-৬,১৮, ২১ ,২৩ জগতী ; ৭ জগতী ত্রিষ্টুব্বা, ২৫ অনুষ্টুপ্ ।

ইন্দ্রাসোমা তপতং রক্ষ উব্জতং ন্যর্পয়তং বৃষণা তমোবৃধঃ ।
পরা শৃণীতমচিতো ন্যোষতং হতং নুদেথাং নি শিশীতমত্রিণঃ ॥১॥

104.2

ইন্দ্রাসোমা সমঘশংসমভ্য১ঘং তপুর্যয়স্তু চরুরগ্নিবাঁ ইব ।
ব্রহ্মদ্বিষে ক্রব্যাদে ঘোরচক্ষসে দ্বেষো ধত্তমনবায়ং কিমীদিনে ॥২॥

104.3

ইন্দ্রাসোমা দুষ্কৃতো বব্রে অন্তরনারম্ভণে তমসি প্র বিধ্যতম্ ।
যথা নাতঃ পুনরেকশ্চনোদয়ত্তদ্বামস্তু সহসে মন্যুমচ্ছবঃ ॥৩॥

104.4

ইন্দ্রাসোমা বর্তয়তং দিবো বধং সং পৃথিব্যা অঘশংসায় তর্হণম্ ।
উত্তক্ষতং স্বর্যং১ পর্বতেভ্যো যেন রক্ষো বাবৃধানং নিজূর্বথঃ ॥৪॥

104.5

ইন্দ্রাসোমা বর্তয়তং দিবস্পর্যগ্নিতপ্তেভির্যুবমশ্মহন্মভিঃ ।
তপুর্বধেভিরজরেভিরত্রিণো নি পর্শানে বিধ্যতং যন্তু নিস্বরম্ ॥৫॥

104.6

ইন্দ্রাসোমা পরি বাং ভূতু বিশ্বত ইয়ং মতিঃ কক্ষ্যাশ্বেব বাজিনা ।
যাং বাং হোত্রাং পরিহিনোমি মেধয়েমা ব্রহ্মাণি নৃপতীব জিন্বতম্ ॥৬॥

104.7

প্রতি স্মরেথাং তুজয়দ্ভিরেবৈর্হতং দ্রুহো রক্ষসো ভঙ্গুরাবতঃ ।
ইন্দ্রাসোমা দুষ্কৃতে মা সুগং ভূদ্যো নঃ কদা চিদভিদাসতি দ্রুহা ॥৭॥

104.8

যো মা পাকেন মনসা চরন্তমভিচষ্টে অনৃতেভির্বচোভিঃ ।
আপ ইব কাশিনা সংগৃভীতা অসন্নস্ত্বাসত ইন্দ্র বক্তা ॥৮॥

104.9

যে পাকশংসং বিহরন্ত এবৈর্যে বা ভদ্রং দূষয়ন্তি স্বধাভিঃ ।
অহয়ে বা তান্প্রদদাতু সোম আ বা দধাতু নিৠতেরুপস্থে ॥৯॥

104.10

যো নো রসং দিপ্সতি পিত্বো অগ্নে যো অশ্বানাং যো গবাং যস্তনূনাম্ ।
রিপুঃ স্তেনঃ স্তেয়কৃদ্দভ্রমেতু নি ষ হীয়তাং তন্বা৩ তনা চ ॥১০॥

104.11

পরঃ সো অস্তু তন্বা৩ তনা চ তিস্রঃ পৃথিবীরধো অস্তু বিশ্বাঃ ।
প্রতি শুষ্যতু যশো অস্য দেবা যো নো দিবা দিপ্সতি যশ্চ নক্তম্ ॥১১॥

104.12

সুবিজ্ঞানং চিকিতুষে জনায় সচ্চাসচ্চ বচসী পস্পৃধাতে ।
তয়োর্যত্সত্যং যতরদৃজীয়স্তদিত্সোমোঽবতি হন্ত্যাসৎ ॥১২॥

104.13

ন বা উ সোমো বৃজিনং হিনোতি ন ক্ষত্রিয়ং মিথুয়া ধারয়ন্তম্ ।
হন্তি রক্ষো হন্ত্যাসদ্বদন্তমুভাবিন্দ্রস্য প্রসিতৌ শয়াতে ॥১৩॥

104.14

যদি বাহমনৃতদেব আস মোঘং বা দেবাঁ অপ্যূহে অগ্নে ।
কিমস্মভ্যং জাতবেদো হৃণীষে দ্রোঘবাচস্তে নিৠথং সচন্তাম্ ॥১৪॥

104.15

অদ্যা মুরীয় যদি যাতুধানো অস্মি যদি বায়ুস্ততপ পূরুষস্য ।
অধা স বীরৈর্দশভির্বি যূয়া যো মা মোঘং যাতুধানেত্যাহ ॥১৫॥

104.16

যো মায়াতুং যাতুধানেত্যাহ যো বা রক্ষাঃ শুচিরস্মীত্যাহ ।
ইন্দ্রস্তং হন্তু মহতা বধেন বিশ্বস্য জন্তোরধমস্পদীষ্ট ॥১৬॥

104.17

প্র যা জিগাতি খর্গলেব নক্তমপ দ্রুহা তন্বং১ গূহমানা ।
বব্রাঁ অনন্তাঁ অব সা পদীষ্ট গ্রাবাণো ঘ্নন্তু রক্ষস উপব্দৈঃ ॥১৭॥

104.18

বি তিষ্ঠধ্বং মরুতো বিক্ষ্বি১চ্ছত গৃভায়ত রক্ষসঃ সং পিনষ্টন ।
বয়ো যে ভূত্বী পতয়ন্তি নক্তভির্যে বা রিপো দধিরে দেবে অধ্বরে ॥১৮॥

104.19

প্র বর্তয় দিবো অশ্মানমিন্দ্র সোমশিতং মঘবন্ত্সং শিশাধি ।
প্রাক্তাদপাক্তাদধরাদুদক্তাদভি জহি রক্ষসঃ পর্বতেন ॥১৯॥

104.20

এত উ ত্যে পতয়ন্তি শ্বয়াতব ইন্দ্রং দিপ্সন্তি দিপ্সবোঽদাভ্যম্ ।
শিশীতে শক্রঃ পিশুনেভ্যো বধং নূনং সৃজদশনিং যাতুমদ্ভ্যঃ ॥২০॥

104.21

ইন্দ্রো যাতূনামভবত্পরাশরো হবির্মথীনামভ্যা৩বিবাসতাম্ ।
অভীদু শক্রঃ পরশুর্যথা বনং পাত্রেব ভিন্দন্ত্সত এতি রক্ষসঃ ॥২১॥

104.22

উলূকয়াতুং শুশুলূকয়াতুং জহি শ্বয়াতুমুত কোকয়াতুম্ ।
সুপর্ণয়াতুমুত গৃধ্রয়াতুং দৃষদেব প্র মৃণ রক্ষ ইন্দ্র ॥২২॥

104.23

মা নো রক্ষো অভি নড্যাতুমাবতামপোচ্ছতু মিথুনা যা কিমীদিনা ।
পৃথিবী নঃ পার্থিবাত্পাত্বংহসোঽন্তরিক্ষং দিব্যাত্পাত্বস্মান্ ॥২৩॥

104.24

ইন্দ্র জহি পুমাংসং যাতুধানমুত স্ত্রিয়ং মায়য়া শাশদানাম্ ।
বিগ্রীবাসো মূরদেবা ঋদন্তু মা তে দৃশন্ত্সূর্যমুচ্চরন্তম্ ॥২৪॥

104.25

প্রতি চক্ষ্ব বি চক্ষ্বেন্দ্রশ্চ সোম জাগৃতম্ । রক্ষোভ্যো বধমস্যতমশনিং যাতুমদ্ভ্যঃ ॥২৫॥