Sukta 104

104.1

25 maitravarunirvasishthah, {rakshoghnam} indrasomau, 8, 16, 19 -22 indrah, 9, 12-13 somah, 10-14 agnih, 11 devah, 17 gravanah, 18 marutah, 23 {purvardhasya} vasishthashih, {uttarardhasya} prithivyantarikshe, trishtup, 1-6, 18, 21, 23 jagati ; 7 jagati trishtubva, 25 anushtup

इन्द्रा॑सोमा॒ तप॑तं॒ रक्ष॑ उ॒ब्जतं॒ न्य॑र्पयतं वृषणा तमो॒वृध॑ः ।
परा॑ शृणीतम॒चितो॒ न्यो॑षतं ह॒तं नु॒देथां॒ नि शि॑शीतम॒त्रिण॑ः ॥१॥

Indrasoma tapatam raksha ubjatam nyarpayatam vrishana tamovridhah
Para shrinitamachito nyoshatam hatam nudetham ni shishitamatrinah

104.2

इन्द्रा॑सोमा॒ सम॒घशं॑सम॒भ्य१घं तपु॑र्ययस्तु च॒रुर॑ग्नि॒वाँ इ॑व ।
ब्र॒ह्म॒द्विषे॑ क्र॒व्यादे॑ घो॒रच॑क्षसे॒ द्वेषो॑ धत्तमनवा॒यं कि॑मी॒दिने॑ ॥२॥

Indrasoma samaghashansamabhya1gham tapuryayastu charuragnivam iva
Brahmadvishe kravyade ghorachakshase dvesho dhattamanavayam kimidine

104.3

इन्द्रा॑सोमा दु॒ष्कृतो॑ व॒व्रे अ॒न्तर॑नारम्भ॒णे तम॑सि॒ प्र वि॑ध्यतम् ।
यथा॒ नात॒ः पुन॒रेक॑श्च॒नोदय॒त्तद्वा॑मस्तु॒ सह॑से मन्यु॒मच्छव॑ः ॥३॥

Indrasoma dushkrito vavre antaranarambhane tamasi pra vidhyatam
Yatha natah punarekashchanodayattadvamastu sahase manyumachchhavah

104.4

इन्द्रा॑सोमा व॒र्तय॑तं दि॒वो व॒धं सं पृ॑थि॒व्या अ॒घशं॑साय॒ तर्ह॑णम् ।
उत्त॑क्षतं स्व॒र्यं१ पर्व॑तेभ्यो॒ येन॒ रक्षो॑ वावृधा॒नं नि॒जूर्व॑थः ॥४॥

Indrasoma vartayatam divo vadham sam prithivya aghashansaya tarhanam
Uttakshatam svaryan1 parvatebhyo yena raksho vavridhanam nijurvathah

104.5

इन्द्रा॑सोमा व॒र्तय॑तं दि॒वस्पर्य॑ग्नित॒प्तेभि॑र्यु॒वमश्म॑हन्मभिः ।
तपु॑र्वधेभिर॒जरे॑भिर॒त्रिणो॒ नि पर्शा॑ने विध्यतं॒ यन्तु॑ निस्व॒रम् ॥५॥

Indrasoma vartayatam divasparyagnitaptebhiryuvamashmahanmabhih
Tapurvadhebhirajarebhiratrino ni parshane vidhyatam yantu nisvaram

104.6

इन्द्रा॑सोमा॒ परि॑ वां भूतु वि॒श्वत॑ इ॒यं म॒तिः क॒क्ष्याश्वे॑व वा॒जिना॑ ।
यां वां॒ होत्रां॑ परिहि॒नोमि॑ मे॒धये॒मा ब्रह्मा॑णि नृ॒पती॑व जिन्वतम् ॥६॥

Indrasoma pari vam bhutu vishvata iyam matih kakshyashveva vajina
Yam vam hotram parihinomi medhayema brahmani nripativa jinvatam

104.7

प्रति॑ स्मरेथां तु॒जय॑द्भि॒रेवै॑र्ह॒तं द्रु॒हो र॒क्षसो॑ भङ्गु॒राव॑तः ।
इन्द्रा॑सोमा दु॒ष्कृते॒ मा सु॒गं भू॒द्यो न॑ः क॒दा चि॑दभि॒दास॑ति द्रु॒हा ॥७॥

Prati smaretham tujayadbhirevairhatam druho rakshaso bhanguravatah
Indrasoma dushkrite ma sugam bhudyo nah kada chidabhidasati druha

104.8

यो मा॒ पाके॑न॒ मन॑सा॒ चर॑न्तमभि॒चष्टे॒ अनृ॑तेभि॒र्वचो॑भिः ।
आप॑ इव का॒शिना॒ संगृ॑भीता॒ अस॑न्न॒स्त्वास॑त इन्द्र व॒क्ता ॥८॥

Yo ma pakena manasa charantamabhichashte anritebhirvachobhih
Apa iva kashina sangribhita asannastvasata indra vakta

104.9

ये पा॑कशं॒सं वि॒हर॑न्त॒ एवै॒र्ये वा॑ भ॒द्रं दू॒षय॑न्ति स्व॒धाभि॑ः ।
अह॑ये वा॒ तान्प्र॒ददा॑तु॒ सोम॒ आ वा॑ दधातु॒ निॠ॑तेरु॒पस्थे॑ ॥९॥

Ye pakashansam viharanta evairye va bhadram dushayanti svadhabhih
Ahaye va tanpradadatu soma a va dadhatu niriterupasthe

104.10

यो नो॒ रसं॒ दिप्स॑ति पि॒त्वो अ॑ग्ने॒ यो अश्वा॑नां॒ यो गवां॒ यस्त॒नूना॑म् ।
रि॒पुः स्ते॒नः स्ते॑य॒कृद्द॒भ्रमे॑तु॒ नि ष ही॑यतां त॒न्वा॒३ तना॑ च ॥१०॥

Yo no rasam dipsati pitvo agne yo ashvanam yo gavam yastanunam
Ripuh stenah steyakriddabhrametu ni sha hiyatam tanva3 tana cha

104.11

प॒रः सो अ॑स्तु त॒न्वा॒३ तना॑ च ति॒स्रः पृ॑थि॒वीर॒धो अ॑स्तु॒ विश्वा॑ः ।
प्रति॑ शुष्यतु॒ यशो॑ अस्य देवा॒ यो नो॒ दिवा॒ दिप्स॑ति॒ यश्च॒ नक्त॑म् ॥११॥

Parah so astu tanva3 tana cha tisrah prithiviradho astu vishvah
Prati shushyatu yasho asya deva yo no diva dipsati yashcha naktam

104.12

सु॒वि॒ज्ञा॒नं चि॑कि॒तुषे॒ जना॑य॒ सच्चास॑च्च॒ वच॑सी पस्पृधाते ।
तयो॒र्यत्स॒त्यं य॑त॒रदृजी॑य॒स्तदित्सोमो॑ऽवति॒ हन्त्यास॑त् ॥१२॥

Suvigyanam chikitushe janaya sachchasachcha vachasi paspridhate
Tayoryatsatyam yataradrijiyastaditsomovati hantyasat

104.13

न वा उ॒ सोमो॑ वृजि॒नं हि॑नोति॒ न क्ष॒त्रियं॑ मिथु॒या धा॒रय॑न्तम् ।
हन्ति॒ रक्षो॒ हन्त्यास॒द्वद॑न्तमु॒भाविन्द्र॑स्य॒ प्रसि॑तौ शयाते ॥१३॥

Na va u somo vrijinam hinoti na kshatriyam mithuya dharayantam
Hanti raksho hantyasadvadantamubhavindrasya prasitau shayate

104.14

यदि॑ वा॒हमनृ॑तदेव॒ आस॒ मोघं॑ वा दे॒वाँ अ॑प्यू॒हे अ॑ग्ने ।
किम॒स्मभ्यं॑ जातवेदो हृणीषे द्रोघ॒वाच॑स्ते निॠ॒थं स॑चन्ताम् ॥१४॥

Yadi vahamanritadeva asa mogham va devam apyuhe agne
Kimasmabhyam jatavedo hrinishe droghavachaste niritham sachantam

104.15

अ॒द्या मु॑रीय॒ यदि॑ यातु॒धानो॒ अस्मि॒ यदि॒ वायु॑स्त॒तप॒ पूरु॑षस्य ।
अधा॒ स वी॒रैर्द॒शभि॒र्वि यू॑या॒ यो मा॒ मोघं॒ यातु॑धा॒नेत्याह॑ ॥१५॥

Adya muriya yadi yatudhano asmi yadi vayustatapa purushasya
Adha sa virairdashabhirvi yuya yo ma mogham yatudhanetyaha

104.16

यो माया॑तुं॒ यातु॑धा॒नेत्याह॒ यो वा॑ र॒क्षाः शुचि॑र॒स्मीत्याह॑ ।
इन्द्र॒स्तं ह॑न्तु मह॒ता व॒धेन॒ विश्व॑स्य ज॒न्तोर॑ध॒मस्प॑दीष्ट ॥१६॥

Yo mayatum yatudhanetyaha yo va rakshah shuchirasmityaha
Indrastam hantu mahata vadhena vishvasya jantoradhamaspadishta

104.17

प्र या जिगा॑ति ख॒र्गले॑व॒ नक्त॒मप॑ द्रु॒हा त॒न्वं१ गूह॑माना ।
व॒व्राँ अ॑न॒न्ताँ अव॒ सा प॑दीष्ट॒ ग्रावा॑णो घ्नन्तु र॒क्षस॑ उप॒ब्दैः ॥१७॥

Pra ya jigati khargaleva naktamapa druha tanvan1 guhamana
Vavram anantam ava sa padishta gravano ghnantu rakshasa upabdaih

104.18

वि ति॑ष्ठध्वं मरुतो वि॒क्ष्वि१च्छत॑ गृभा॒यत॑ र॒क्षस॒ः सं पि॑नष्टन ।
वयो॒ ये भू॒त्वी प॒तय॑न्ति न॒क्तभि॒र्ये वा॒ रिपो॑ दधि॒रे दे॒वे अ॑ध्व॒रे ॥१८॥

Vi tishthadhvam maruto vikshvi1chchhata gribhayata rakshasah sam pinashtana
Vayo ye bhutvi patayanti naktabhirye va ripo dadhire deve adhvare

104.19

प्र व॑र्तय दि॒वो अश्मा॑नमिन्द्र॒ सोम॑शितं मघव॒न्त्सं शि॑शाधि ।
प्राक्ता॒दपा॑क्तादध॒रादुद॑क्ताद॒भि ज॑हि र॒क्षस॒ः पर्व॑तेन ॥१९॥

Pra vartaya divo ashmanamindra somashitam maghavantsam shishadhi
Praktadapaktadadharadudaktadabhi jahi rakshasah parvatena

104.20

ए॒त उ॒ त्ये प॑तयन्ति॒ श्वया॑तव॒ इन्द्रं॑ दिप्सन्ति दि॒प्सवोऽदा॑भ्यम् ।
शिशी॑ते श॒क्रः पिशु॑नेभ्यो व॒धं नू॒नं सृ॑जद॒शनिं॑ यातु॒मद्भ्य॑ः ॥२०॥

Eta u tye patayanti shvayatava indram dipsanti dipsavodabhyam
Shishite shakrah pishunebhyo vadham nunam srijadashanim yatumadbhyah

104.21

इन्द्रो॑ यातू॒नाम॑भवत्पराश॒रो ह॑वि॒र्मथी॑नाम॒भ्या॒३विवा॑सताम् ।
अ॒भीदु॑ श॒क्रः प॑र॒शुर्यथा॒ वनं॒ पात्रे॑व भि॒न्दन्त्स॒त ए॑ति र॒क्षस॑ः ॥२१॥

Indro yatunamabhavatparasharo havirmathinamabhya3vivasatam
Abhidu shakrah parashuryatha vanam patreva bhindantsata eti rakshasah

104.22

उलू॑कयातुं शुशु॒लूक॑यातुं ज॒हि श्वया॑तुमु॒त कोक॑यातुम् ।
सु॒प॒र्णया॑तुमु॒त गृध्र॑यातुं दृ॒षदे॑व॒ प्र मृ॑ण॒ रक्ष॑ इन्द्र ॥२२॥

Ulukayatum shushulukayatum jahi shvayatumuta kokayatum
Suparnayatumuta gridhrayatum drishadeva pra mrina raksha indra

104.23

मा नो॒ रक्षो॑ अ॒भि न॑ड्यातु॒माव॑ता॒मपो॑च्छतु मिथु॒ना या कि॑मी॒दिना॑ ।
पृ॒थि॒वी न॒ः पार्थि॑वात्पा॒त्वंह॑सो॒ऽन्तरि॑क्षं दि॒व्यात्पा॑त्व॒स्मान् ॥२३॥

Ma no raksho abhi nadyatumavatamapochchhatu mithuna ya kimidina
Prithivi nah parthivatpatvanhasontariksham divyatpatvasman

104.24

इन्द्र॑ ज॒हि पुमां॑सं यातु॒धान॑मु॒त स्त्रियं॑ मा॒यया॒ शाश॑दानाम् ।
विग्री॑वासो॒ मूर॑देवा ऋदन्तु॒ मा ते दृ॑श॒न्त्सूर्य॑मु॒च्चर॑न्तम् ॥२४॥

Indra jahi pumansam yatudhanamuta striyam mayaya shashadanam
Vigrivaso muradeva ridantu ma te drishantsuryamuchcharantam

104.25

प्रति॑ चक्ष्व॒ वि च॒क्ष्वेन्द्र॑श्च सोम जागृतम् । रक्षो॑भ्यो व॒धम॑स्यतम॒शनिं॑ यातु॒मद्भ्य॑ः ॥२५॥

Prati chakshva vi chakshvendrashcha soma jagritam, rakshobhyo vadhamasyatamashanim yatumadbhyah