সূক্ত 60

60.1

১৫ বার্হস্পত্যো ভরদ্বাজঃ। ইন্দ্রাগ্নী ।গায়ত্রী;১-৩, ১৩ ত্রিষ্টুপ্ ,১৪ বৃহতী,১৫ অনুষ্টপ্।

শ্নথদ্বৃত্রমুত সনোতি বাজমিন্দ্রা যো অগ্নী সহুরী সপর্যাৎ ।
ইরজ্যন্তা বসব্যস্য ভূরেঃ সহস্তমা সহসা বাজয়ন্তা ॥১॥

তা যোধিষ্টমভি গা ইন্দ্র নূনমপঃ স্বরুষসো অগ্ন ঊল্হাঃ ।
দিশঃ স্বরুষস ইন্দ্র চিত্রা অপো গা অগ্নে যুবসে নিয়ুত্বান্ ॥২॥

আ বৃত্রহণা বৃত্রহভিঃ শুষ্মৈরিন্দ্র যাতং নমোভিরগ্নে অর্বাক্ ।
যুবং রাধোভিরকবেভিরিন্দ্রাগ্নে অস্মে ভবতমুত্তমেভিঃ ॥৩॥

তা হুবে যয়োরিদং পপ্নে বিশ্বং পুরা কৃতম্ । ইন্দ্রাগ্নী ন মর্ধতঃ ॥৪॥

উগ্রা বিঘনিনা মৃধ ইন্দ্রাগ্নী হবামহে । তা নো মৃলাত ঈদৃশে ॥৫॥

হতো বৃত্রাণ্যার্যা হতো দাসানি সত্পতী । হতো বিশ্বা অপ দ্বিষঃ ॥৬॥

ইন্দ্রাগ্নী যুবামিমে৩ঽভি স্তোমা অনূষত । পিবতং শম্ভুবা সুতম্ ॥৭॥

যা বাং সন্তি পুরুস্পৃহো নিয়ুতো দাশুষে নরা । ইন্দ্রাগ্নী তাভিরা গতম্ ॥৮॥

তাভিরা গচ্ছতং নরোপেদং সবনং সুতম্ । ইন্দ্রাগ্নী সোমপীতয়ে ॥৯॥

তমীলিষ্ব যো অর্চিষা বনা বিশ্বা পরিষ্বজৎ । কৃষ্ণা কৃণোতি জিহ্বয়া ॥১০॥

য ইদ্ধ আবিবাসতি সুম্নমিন্দ্রস্য মর্ত্যঃ । দ্যুম্নায় সুতরা অপঃ ॥১১॥

তা নো বাজবতীরিষ আশূন্পিপৃতমর্বতঃ । ইন্দ্রমগ্নিং চ বোল্হবে ॥১২॥

উভা বামিন্দ্রাগ্নী আহুবধ্যা উভা রাধসঃ সহ মাদয়ধ্যৈ ।
উভা দাতারাবিষাং রয়ীণামুভা বাজস্য সাতয়ে হুবে বাম্ ॥১৩॥

আ নো গব্যেভিরশ্ব্যৈর্বসব্যৈ৩রুপ গচ্ছতম্ ।
সখায়ৌ দেবৌ সখ্যায় শম্ভুবেন্দ্রাগ্নী তা হবামহে ॥১৪॥

ইন্দ্রাগ্নী শৃণুতং হবং যজমানস্য সুন্বতঃ । বীতং হব্যান্যা গতং পিবতং সোম্যং মধু ॥১৫॥