Sukta 60

60.1

15 barhaspatyo bharadvajah, indragni, gayatri;1-3, 13 trishtup, 14 brihati, 15 anushtap

श्नथ॑द्वृ॒त्रमु॒त स॑नोति॒ वाज॒मिन्द्रा॒ यो अ॒ग्नी सहु॑री सप॒र्यात् ।
इ॒र॒ज्यन्ता॑ वस॒व्य॑स्य॒ भूरे॒ः सह॑स्तमा॒ सह॑सा वाज॒यन्ता॑ ॥१॥

Shnathadvritramuta sanoti vajamindra yo agni sahuri saparyat
Irajyanta vasavyasya bhureh sahastama sahasa vajayanta

ता यो॑धिष्टम॒भि गा इ॑न्द्र नू॒नम॒पः स्व॑रु॒षसो॑ अग्न ऊ॒ळ्हाः ।
दिश॒ः स्व॑रु॒षस॑ इन्द्र चि॒त्रा अ॒पो गा अ॑ग्ने युवसे नि॒युत्वा॑न् ॥२॥

Ta yodhishtamabhi ga indra nunamapah svarushaso agna ulhah
Dishah svarushasa indra chitra apo ga agne yuvase niyutvan

आ वृ॑त्रहणा वृत्र॒हभि॒ः शुष्मै॒रिन्द्र॑ या॒तं नमो॑भिरग्ने अ॒र्वाक् ।
यु॒वं राधो॑भि॒रक॑वेभिरि॒न्द्राग्ने॑ अ॒स्मे भ॑वतमुत्त॒मेभि॑ः ॥३॥

A vritrahana vritrahabhih shushmairindra yatam namobhiragne arvak
Yuvam radhobhirakavebhirindragne asme bhavatamuttamebhih

ता हु॑वे॒ ययो॑रि॒दं प॒प्ने विश्वं॑ पु॒रा कृ॒तम् । इ॒न्द्रा॒ग्नी न म॑र्धतः ॥४॥

Ta huve yayoridam papne vishvam pura kritam, indragni na mardhatah

उ॒ग्रा वि॑घ॒निना॒ मृध॑ इन्द्रा॒ग्नी ह॑वामहे । ता नो॑ मृळात ई॒दृशे॑ ॥५॥

Ugra vighanina mridha indragni havamahe, ta no mrilata idrishe

ह॒तो वृ॒त्राण्यार्या॑ ह॒तो दासा॑नि॒ सत्प॑ती । ह॒तो विश्वा॒ अप॒ द्विष॑ः ॥६॥

Hato vritranyarya hato dasani satpati, hato vishva apa dvishah

इन्द्रा॑ग्नी यु॒वामि॒मे॒३ऽभि स्तोमा॑ अनूषत । पिब॑तं शम्भुवा सु॒तम् ॥७॥

Indragni yuvamime3bhi stoma anushata, pibatam shambhuva sutam

या वां॒ सन्ति॑ पुरु॒स्पृहो॑ नि॒युतो॑ दा॒शुषे॑ नरा । इन्द्रा॑ग्नी॒ ताभि॒रा ग॑तम् ॥८॥

Ya vam santi puruspriho niyuto dashushe nara, indragni tabhira gatam

ताभि॒रा ग॑च्छतं न॒रोपे॒दं सव॑नं सु॒तम् । इन्द्रा॑ग्नी॒ सोम॑पीतये ॥९॥

Tabhira gachchhatam naropedam savanam sutam, indragni somapitaye

तमी॑ळिष्व॒ यो अ॒र्चिषा॒ वना॒ विश्वा॑ परि॒ष्वज॑त् । कृ॒ष्णा कृ॒णोति॑ जि॒ह्वया॑ ॥१०॥

Tamilishva yo archisha vana vishva parishvajat, krishna krinoti jihvaya

य इ॒द्ध आ॒विवा॑सति सु॒म्नमिन्द्र॑स्य॒ मर्त्य॑ः । द्यु॒म्नाय॑ सु॒तरा॑ अ॒पः ॥११॥

Ya iddha avivasati sumnamindrasya martyah, dyumnaya sutara apah

ता नो॒ वाज॑वती॒रिष॑ आ॒शून्पि॑पृत॒मर्व॑तः । इन्द्र॑म॒ग्निं च॒ वोळ्ह॑वे ॥१२॥

Ta no vajavatirisha ashunpipritamarvatah, indramagnim cha volhave

उ॒भा वा॑मिन्द्राग्नी आहु॒वध्या॑ उ॒भा राध॑सः स॒ह मा॑द॒यध्यै॑ ।
उ॒भा दा॒तारा॑वि॒षां र॑यी॒णामु॒भा वाज॑स्य सा॒तये॑ हुवे वाम् ॥१३॥

Ubha vamindragni ahuvadhya ubha radhasah saha madayadhyai
Ubha dataravisham rayinamubha vajasya sataye huve vam

आ नो॒ गव्ये॑भि॒रश्व्यै॑र्वस॒व्यै॒३रुप॑ गच्छतम् ।
सखा॑यौ दे॒वौ स॒ख्याय॑ श॒म्भुवे॑न्द्रा॒ग्नी ता ह॑वामहे ॥१४॥

A no gavyebhirashvyairvasavyai3rupa gachchhatam
Sakhayau devau sakhyaya shambhuvendragni ta havamahe

इन्द्रा॑ग्नी शृणु॒तं हवं॒ यज॑मानस्य सुन्व॒तः । वी॒तं ह॒व्यान्या ग॑तं॒ पिब॑तं सो॒म्यं मधु॑ ॥१५॥

Indragni shrinutam havam yajamanasya sunvatah, vitam havyanya gatam pibatam somyam madhu