সূক্ত 45

45.1

৩৩ শংয়ুর্বার্হস্পত্যঃ। ইন্দ্রঃ, ৩১-৩৩ বৃবুস্তক্ষা । গায়ত্রী, ২৯ অতিনিচৃত, ৩১ পাদনিচৃত, ৩৩ অনুষ্টুপ্ ।

য আনয়ত্পরাবতঃ সুনীতী তুর্বশং যদুম্ । ইন্দ্রঃ স নো যুবা সখা ॥১॥

45.2

অবিপ্রে চিদ্বয়ো দধদনাশুনা চিদর্বতা । ইন্দ্রো জেতা হিতং ধনম্ ॥২॥

45.3

মহীরস্য প্রণীতয়ঃ পূর্বীরুত প্রশস্তয়ঃ । নাস্য ক্ষীয়ন্ত ঊতয়ঃ ॥৩॥

45.4

সখায়ো ব্রহ্মবাহসেঽর্চত প্র চ গায়ত । স হি নঃ প্রমতির্মহী ॥৪॥

45.5

ত্বমেকস্য বৃত্রহন্নবিতা দ্বয়োরসি । উতেদৃশে যথা বয়ম্ ॥৫॥

45.6

নয়সীদ্বতি দ্বিষঃ কৃণোষ্যুক্থশংসিনঃ । নৃভিঃ সুবীর উচ্যসে ॥৬॥

45.7

ব্রহ্মাণং ব্রহ্মবাহসং গীর্ভিঃ সখায়মৃগ্মিয়ম্ । গাং ন দোহসে হুবে ॥৭॥

45.8

যস্য বিশ্বানি হস্তয়োরূচুর্বসূনি নি দ্বিতা । বীরস্য পৃতনাষহঃ ॥৮॥

45.9

বি দৃল্হানি চিদদ্রিবো জনানাং শচীপতে । বৃহ মায়া অনানত ॥৯॥

45.10

তমু ত্বা সত্য সোমপা ইন্দ্র বাজানাং পতে । অহূমহি শ্রবস্যবঃ ॥১০॥

45.11

তমু ত্বা যঃ পুরাসিথ যো বা নূনং হিতে ধনে । হব্যঃ স শ্রুধী হবম্ ॥১১॥

45.12

ধীভিরর্বদ্ভিরর্বতো বাজাঁ ইন্দ্র শ্রবায্যান্ । ত্বয়া জেষ্ম হিতং ধনম্ ॥১২॥

45.13

অভূরু বীর গির্বণো মহাঁ ইন্দ্র ধনে হিতে । ভরে বিতন্তসায্যঃ ॥১৩॥

45.14

যা ত ঊতিরমিত্রহন্মক্ষূজবস্তমাসতি । তয়া নো হিনুহী রথম্ ॥১৪॥

45.15

স রথেন রথীতমোঽস্মাকেনাভিয়ুগ্বনা । জেষি জিষ্ণো হিতং ধনম্ ॥১৫॥

45.16

য এক ইত্তমু ষ্টুহি কৃষ্টীনাং বিচর্ষণিঃ । পতির্জজ্ঞে বৃষক্রতুঃ ॥১৬॥

45.17

যো গৃণতামিদাসিথাঽঽপিরূতী শিবঃ সখা । স ত্বং ন ইন্দ্র মৃলয় ॥১৭॥

45.18

ধিষ্ব বজ্রং গভস্ত্যো রক্ষোহত্যায় বজ্রিবঃ । সাসহীষ্ঠা অভি স্পৃধঃ ॥১৮॥

45.19

প্রত্নং রয়ীণাং যুজং সখায়ং কীরিচোদনম্ । ব্রহ্মবাহস্তমং হুবে ॥১৯॥

45.20

স হি বিশ্বানি পার্থিবাঁ একো বসূনি পত্যতে । গির্বণস্তমো অধ্রিগুঃ ॥২০॥

45.21

স নো নিয়ুদ্ভিরা পৃণ কামং বাজেভিরশ্বিভিঃ । গোমদ্ভির্গোপতে ধৃষৎ ॥২১॥

45.22

তদ্বো গায় সুতে সচা পুরুহূতায় সত্বনে । শং যদ্গবে ন শাকিনে ॥২২॥

45.23

ন ঘা বসুর্নি যমতে দানং বাজস্য গোমতঃ । যত্সীমুপ শ্রবদ্গিরঃ ॥২৩॥

45.24

কুবিত্সস্য প্র হি ব্রজং গোমন্তং দস্যুহা গমৎ । শচীভিরপ নো বরৎ ॥২৪॥

45.25

ইমা উ ত্বা শতক্রতোঽভি প্র ণোনুবুর্গিরঃ । ইন্দ্র বত্সং ন মাতরঃ ॥২৫॥

45.26

দূণাশং সখ্যং তব গৌরসি বীর গব্যতে । অশ্বো অশ্বায়তে ভব ॥২৬॥

45.27

স মন্দস্বা হ্যন্ধসো রাধসে তন্বা মহে । ন স্তোতারং নিদে করঃ ॥২৭॥

45.28

ইমা উ ত্বা সুতেসুতে নক্ষন্তে গির্বণো গিরঃ । বত্সং গাবো ন ধেনবঃ ॥২৮॥

45.29

পুরূতমং পুরূণাং স্তোতৄণাং বিবাচি । বাজেভির্বাজয়তাম্ ॥২৯॥

45.30

অস্মাকমিন্দ্র ভূতু তে স্তোমো বাহিষ্ঠো অন্তমঃ । অস্মান্রায়ে মহে হিনু ॥৩০॥

45.31

অধি বৃবুঃ পণীনাং বর্ষিষ্ঠে মূর্ধন্নস্থাৎ । উরুঃ কক্ষো ন গাঙ্গ্যঃ ॥৩১॥

45.32

যস্য বায়োরিব দ্রবদ্ভদ্রা রাতিঃ সহস্রিণী । সদ্যো দানায় মংহতে ॥৩২॥

45.33

তত্সু নো বিশ্বে অর্য আ সদা গৃণন্তি কারবঃ । বৃবুং সহস্রদাতমং সূরিং সহস্রসাতমম্ ॥৩৩॥