সূক্ত 2

2.1

১১ বার্হস্পত্যো ভরদ্বাজঃ । অগ্নি : ।অনুষ্টুপ্ । ১১ শক্বরী ।

ত্বং হি ক্ষৈতবদ্ যশো ঽগ্নে মিত্রো ন পত্যসে । ত্বং বিচর্ষণে শ্রবো বসো পুষ্টিং ন পুষ্যসি ॥১॥

ত্বাং হি ষ্মা চর্ষণয়ো যজ্ঞেভির্গীর্ভিরীলতে । ত্বাং বাজী যাত্যবৃকো রজস্তূর্বিশ্বচর্ষণিঃ ॥২॥

সজোষস্ত্বা দিবো নরো যজ্ঞস্য কেতুমিন্ধতে । যদ্ধ স্য মানুষো জনঃ সুম্নায়ুর্জুহ্বে অধ্বরে ॥৩॥

ঋধদ্ যস্তে সুদানবে ধিয়া মর্তঃ শশমতে । ঊতী ষ বৃহতো দিবো দ্বিষো অংহো ন তরতি ॥৪॥

সমিধা যস্ত আহুতিং নিশিতিং মর্ত্যো নশৎ । বয়াবন্তং স পুষ্যতি ক্ষয়মগ্নে শতায়ুষম্ ॥৫॥

ত্বেষস্তে ধূম ঋণ্বতি দিবি ষঞ্ছুক্র আততঃ । সূরো ন হি দ্যুতা ত্বং কৃপা পাবক রোচসে ॥৬॥

অধা হি বিক্ষ্বীড্যো ঽসি প্রিয়ো নো অতিথিঃ । রণ্বঃ পুরীব জূর্যঃ সূনুর্ন ত্রয়য়ায্যঃ ॥৭॥

ক্রত্বা হি দ্রোণে অজ্যসে ঽগ্নে বাজী ন কৃত্ব্যঃ । পরিজ্মেব স্বধা গয়ো ঽত্যো ন হ্বার্যঃ শিশুঃ ॥৮॥

ত্বং ত্যা চিদচ্যুতা ঽগ্নে পশুর্ন যবসে । ধামা হ যৎ তে অজর বনা বৃশ্চন্তি শিক্বসঃ ॥৯॥

বেষি হ্যধ্বরীয়তামগ্নে হোতা দমে বিশাং । সমৃধো বিশ্পতে কৃণু জুষস্ব হব্যমঙ্গিরঃ ॥১০॥

অচ্ছা নো মিত্রমহো দেব দেবানগ্নে বোচঃ সুমতিং রোদস্যোঃ । বীহি স্বস্তিং সুক্ষিতিং দিবো নৄন্ দ্বিষো অংহাংসি দুরিতা তরেম তা তরেম তবাবসা তরেম ॥১১॥