সূক্ত 1

1.1

১৩ বার্হস্পত্যো ভরদ্বাজঃ । অগ্নি : । ত্রিষ্টুপ্ ।

ত্বং হ্যগ্নে প্রথমো মনোতা ঽস্যা ধিয়ো অভবো দস্ম হোতা ।
ত্বং সীং বৃষন্নকৃণোর্দুষ্টরীতু সহো বিশ্বস্মৈ সহসে সহধ্যৈ ॥১॥

অধা হোতা ন্যসীদো যজীয়ানিলস্পদ ইষয়ন্নীড্যঃ সন্ ।
তং ত্বা নরঃ প্রথমং দেবয়ন্তো মহো রায়ে চিতয়ন্তো অনু গ্মন্ ॥২॥

বৃতেব যন্তং বহুভির্বসব্যৈ৩স্ত্বে রয়িং জাগৃবাংসো অনু গ্মন্ ।
রুশন্তমগ্নিং দর্শত বৃহন্তং বপাবন্তং বিশ্বহা দীদিবাংসম্ ॥৩॥

পদং দেবস্য নমসা ব্যন্তঃ শ্রবস্যবঃ শ্রব আপন্নমৃক্তম্ ।
নামানি চিদ্ দধিরে যজ্ঞিয়ানি ভদ্রায়াং তে রণয়ন্ত সংদৃষ্টৌ ॥৪॥

ত্বাং বর্ধন্তি ক্ষিতয়ঃ পৃথিব্যাং ত্বাং রায় উভয়াসো জনানাম্ ।
ত্বং ত্রাতা তরণে চেত্যো ভূঃ পিতা মাতা সদমিন্মানুষাণাম্ ॥৫॥

সপর্যেণ্যঃ স প্রিয়ো বিক্ষ্ব১গ্নির্হোতা মন্দ্রো নি ষসাদা যজীয়ান্ ।
তং ত্বা বয়ং দম আ দীদিবাংসমুপ জ্ঞুবাধো নমসা সদেম ॥৬॥

তং ত্বা বয়ং সুধ্যো৩ নব্যমগ্নে সুম্নায়ব ঈমহে দেবয়ন্তঃ ।
ত্বং বিশো অনয়ো দীদ্যানো দিবো অগ্নে বৃহতা রোচনেন ॥৭॥

বিশাং কবিং বিশ্পতিং শশ্বতীনাং নিতোশনং বৃষভং চর্ষণীনাম্ ।
প্রেতীষণিমিষয়ন্তং পাবকং রাজন্তমগ্নিং যজতং রয়ীণাম্ ॥৮॥

সো অগ্ন ঈজে শশমে চ মর্তো যস্ত আনট্ সমিধা হব্যদাতিম্ ।
য আহুতিং পরি বেদা নমোভির্বিশ্বেৎ স বামা দধতে ত্বাতঃ ॥৯॥

অস্মা উ তে মহি মহে বিধেম নমোভিরগ্নে সমিধোত হব্যৈঃ ।
বেদী সূনো সহসো গীর্ভিরুক্থৈরা তে ভদ্রায়াং সুমতৌ যতেম ॥১০॥

আ যস্ততন্থ রোদসী বি ভাসা শ্রবোভিশ্চ শ্রবস্য১স্তরুত্রঃ ।
বৃহদ্ভির্বাজৈঃ স্থবিরেভিরস্মে রেবদ্ভিরগ্নে বিতরং বি ভাহি ॥১১॥

নৃবদ্ বসো সদমিদ্ধেহ্যস্মে ভূরি তোকায় তনয়ায় পশ্বঃ ।
পূর্বীরিষো বৃহতীরারেঅঘা অস্মে ভদ্রা সৌশ্রবসানি সন্তু ॥১২॥

পুরূণ্যগ্নে পুরুধা ত্বায়া বসূনি রাজন্ বসুতা তে অশ্যাম্ ।
পুরূণি হি ত্বে পুরুবার সন্ত্যগ্নে বসু বিধতে রাজনি ত্বে ॥১৩॥