সূক্ত 75

75.1

৯ অবস্যুরাত্রেয়ঃ। অশ্বিনৌ। পঙ্ক্তিঃ।

প্রতি প্রিয়তমং রথং বৃষণং বসুবাহনম্ ।
স্তোতা বামশ্বিনাবৃষিঃ স্তোমেন প্রতি ভূষতি মাধ্বী মম শ্রুতং হবম্ ॥১॥

অত্যায়াতমশ্বিনা তিরো বিশ্বা অহং সনা ।
দস্রা হিরণ্যবর্তনী সুষুম্না সিন্ধুবাহসা মাধ্বী মম শ্রুতং হবম্ ॥২॥

আ নো রত্নানি বিভ্রতাবশ্বিনা গচ্ছতং যুবম্ ।
রুদ্রা হিরণ্যবর্তনী জুষাণা বাজিনীবসূ মাধ্বী মম শ্রুতং হবম্ ॥৩॥

সুষ্টুভো বাং বৃষণ্বসূ রথে বাণীচ্যাহিতা ।
উত বাং ককুহো মৃগঃ পৃক্ষঃ কৃণোতি বাপুষো মাধ্বী মম শ্রুতং হবম্ ॥৪॥

বোধিন্মনসা রথ্যেষিরা হবনশ্রুতা ।
বিভিশ্চ্যবানমশ্বিনা নি যাথো অদ্বয়াবিনং মাধ্বী মম শ্রুতং হবম্ ॥৫॥

আ বাং নরা মনোয়ুজোঽশ্বাসঃ প্রুষিতপ্সবঃ ।
বয়ো বহন্তু পীতয়ে সহ সুম্নেভিরশ্বিনা মাধ্বী মম শ্রুতং হবম্ ॥৬॥

অশ্বিনাবেহ গচ্ছতং নাসত্যা মা বি বেনতম্ ।
তিরশ্চিদর্যয়া পরি বর্তির্যাতমদাভ্যা মাধ্বী মম শ্রুতং হবম্ ॥৭॥

অস্মিন্ যজ্ঞে অদাভ্যা জরিতারং শুভস্পতী ।
অবস্যুমশ্বিনা যুবং গৃণন্তমুপ ভূষথো মাধ্বী মম শ্রুতং হবম্ ॥৮॥

অভূদুষা রুশৎ পশুরাগ্নিরধায্যৃত্বিয়ঃ ।
অয়োজি বাং বৃষণ্বসূ রথো দস্রাবমর্ত্যো মাধ্বী মম শ্রুতং হবম্ ॥৯॥