সূক্ত 61

61.1

১৯ শ্যাবাশ্ব আত্রেয়ঃ। ১-৪, ১১-১৬ মরুতঃ, ৫-৮ তরন্তমহিষী শশীয়সী, ৯ বৈদদশ্বিঃ পুরুমীলহঃ, ১০ বৈদদশ্বিস্তরন্তঃ, ১৭-১৯ দার্ভ্যো রথবীতিঃ। গায়ত্রী, ৩ নিচৃৎ, ৫ অনুষ্টুপ্, ৯ সতোবৃহতী ।

কে ষ্ঠা নরঃ শ্রেষ্ঠতমা য একএক আয়য় । পরমস্যাঃ পরাবতঃ ॥১॥

61.2

ক্ব১ বোঽশ্বাঃ ক্বা৩ভীশবঃ কথং শেক কথা যয় । পৃষ্ঠে সদো নসোর্যমঃ ॥২॥

61.3

জঘনে চোদ এষাং বি সক্থানি নরো যমুঃ । পুত্রকৃথে ন জনয়ঃ ॥৩॥

61.4

পরা বীরাস এতন মর্যাসো ভদ্রজানয়ঃ । অগ্নিতপো যথাসথ ॥৪॥

61.5

সনৎ সাশ্ব্যং পশুমুত গব্যং শতাবয়ম্ । শ্যাবাশ্বস্তুতায় যা দোর্বীরায়োপবর্বৃহৎ ॥৫॥

61.6

উত ত্বা স্ত্রী শশীয়সী পুংসো ভবতি বস্যসী । অদেবত্রাদরাধসঃ ॥৬॥

61.7

বি যা জানাতি জসুরিং বি তৃষ্যন্তং বি কামিনম্ । দেবত্রা কৃণুতে মনঃ ॥৭॥

61.8

উত ঘা নেমো অস্তুতঃ পুমাঁ ইতি ব্রুবে পণিঃ । স বৈরদেয় ইৎ সমঃ ॥৮॥

61.9

উত মেঽরপদ্ যুবতির্মমন্দুষী প্রতি শ্যাবায় বর্তনিম্ ।
বি রোহিতা পুরুমীলহায় যেমতুর্বিপ্রায় দীর্ঘয়শসে ॥৯॥

61.10

যো মে ধেনূনাং শতং বৈদদশ্বির্যথা দদৎ । তরন্ত ইব মংহনা ॥১০॥

61.11

য ঈং বহন্ত আশুভিঃ পিবন্তো মদিরং মধু । অত্র শ্রবাংসি দধিরে ॥১১॥

61.12

যেষাং শ্রিয়াধি রোদসী বিভ্রাজন্তে রথেষ্বা । দিবি রুক্ম ইবোপরি ॥১২॥

61.13

যুবা স মারুতো গণস্ত্বেষরথো অনেদ্যঃ । শুভংয়াবাপ্রতিষ্কুতঃ ॥১৩॥

61.14

কো বেদ নূনমেষাং যত্রা মদন্তি ধূতয়ঃ । ঋতজাতা অরেপসঃ ॥১৪॥

61.15

যূয়ং মর্তং বিপন্যবঃ প্রণেতার ইত্থা ধিয়া । শ্রোতারো যামহূতিষু ॥১৫॥

61.16

তে নো বসূনি কাম্যা পুরুশ্চন্দ্রা রিশাদসঃ । আ যজ্ঞিয়াসো ববৃত্তন ॥১৬॥

61.17

এতং মে স্তোমমূর্ম্যে দার্ভ্যায় পরা বহ । গিরো দেবি রথীরিব ॥১৭॥

61.18

উত মে বোচতাদিতি সুতসোমে রথবীতৌ । ন কামো অপ বেতি মে ॥১৮॥

61.19

এষ ক্ষেতি রথবীতির্মঘবা গোমতীরনু । পর্বতেষ্বপশ্রিতঃ ॥১৯॥