সূক্ত 25

25.1

৯ বসূয়ব আত্রেয়াঃ। অগ্নিঃ । অনুষ্টুপ্।

অচ্ছা বো অগ্নিমবসে দেবং গাসি স নো বসুঃ ।
রাসৎ পুত্র ঋষূণামৃতাবা পর্ষতি দ্বিষঃ ॥১॥

স হি সত্যো যং পূর্বে চিদ্ দেবাসশ্চিদ্ যমীধিরে ।
হোতারং মন্দ্রজিহ্বমিৎ সুদীতিভির্বিভাবসুম্ ॥২॥

স নো ধীতী বরিষ্ঠয়া শ্রেষ্ঠয়া চ সুমত্যা ।
অগ্নে রায়ো দিদীহি নঃ সুবৃক্তিভির্বরেণ্য ॥৩॥

অগ্নির্দেবেষু রাজত্যগ্নির্মর্তেষ্বাবিশন্ ।
অগ্নির্নো হব্যবাহনোঽগ্নিং ধীভিঃ সপর্যত ॥৪॥

অগ্নিস্তুবিশ্রবস্তমং তুবিব্রহ্মাণমুত্তমম্ ।
অতূর্তং শ্রাবয়ত্পতিং পুত্রং দদাতি দাশুষে ॥৫॥

অগ্নির্দদাতি সত্পতিং সাসাহ যো যুধা নৃভিঃ ।
অগ্নিরত্যং রঘুষ্যদং জেতারমপরাজিতম্ ॥৬॥

যদ্ বাহিষ্ঠং তদগ্নয়ে বৃহদর্চ বিভাবসো ।
মহিষীব ত্বদ্ রয়িস্ত্বদ্ বাজা উদীরতে ॥৭॥

তব দ্যুমন্তো অর্চয়ো গ্রাবেবোচ্যতে বৃহৎ ।
উতো তে তন্যতুর্যথা স্বানো অর্ত ত্মনা দিবঃ ॥৮॥

এবাঁ অগ্নিং বসূয়বঃ সহসানং ববন্দিম ।
স নো বিশ্বা অতি দ্বিষঃ পর্ষন্নাবেব সুক্রতুঃ ॥৯॥