Sukta 25

25.1

9 vasuyava atreyah, agnih, anushtup

अच्छा॑ वो अ॒ग्निमव॑से दे॒वं गा॑सि॒ स नो॒ वसु॑ः ।
रास॑त् पु॒त्र ऋ॑षू॒णामृ॒तावा॑ पर्षति द्वि॒षः ॥१॥

Achchha vo agnimavase devam gasi sa no vasuh
Rasat putra rishunamritava parshati dvishah

स हि स॒त्यो यं पूर्वे॑ चिद् दे॒वास॑श्चि॒द् यमी॑धि॒रे ।
होता॑रं म॒न्द्रजि॑ह्व॒मित् सु॑दी॒तिभि॑र्वि॒भाव॑सुम् ॥२॥

Sa hi satyo yam purve chid devasashchid yamidhire
Hotaram mandrajihvamit suditibhirvibhavasum

स नो॑ धी॒ती वरि॑ष्ठया॒ श्रेष्ठ॑या च सुम॒त्या ।
अग्ने॑ रा॒यो दि॑दीहि नः सुवृ॒क्तिभि॑र्वरेण्य ॥३॥

Sa no dhiti varishthaya shreshthaya cha sumatya
Agne rayo didihi nah suvriktibhirvarenya

अ॒ग्निर्दे॒वेषु॑ राजत्य॒ग्निर्मर्ते॑ष्वावि॒शन् ।
अ॒ग्निर्नो॑ हव्य॒वाह॑नो॒ऽग्निं धी॒भिः स॑पर्यत ॥४॥

Agnirdeveshu rajatyagnirmarteshvavishan
Agnirno havyavahanognim dhibhih saparyata

अ॒ग्निस्तु॒विश्र॑वस्तमं तु॒विब्र॑ह्माणमुत्त॒मम् ।
अ॒तूर्तं॑ श्राव॒यत्प॑तिं पु॒त्रं द॑दाति दा॒शुषे॑ ॥५॥

Agnistuvishravastamam tuvibrahmanamuttamam
Aturtam shravayatpatim putram dadati dashushe

अ॒ग्निर्द॑दाति॒ सत्प॑तिं सा॒साह॒ यो यु॒धा नृभि॑ः ।
अ॒ग्निरत्यं॑ रघु॒ष्यदं॒ जेता॑र॒मप॑राजितम् ॥६॥

Agnirdadati satpatim sasaha yo yudha nribhih
Agniratyam raghushyadam jetaramaparajitam

यद् वाहि॑ष्ठं॒ तद॒ग्नये॑ बृ॒हद॑र्च विभावसो ।
महि॑षीव॒ त्वद् र॒यिस्त्वद् वाजा॒ उदी॑रते ॥७॥

Yad vahishtham tadagnaye brihadarcha vibhavaso
Mahishiva tvad rayistvad vaja udirate

तव॑ द्यु॒मन्तो॑ अ॒र्चयो॒ ग्रावे॑वोच्यते बृ॒हत् ।
उ॒तो ते॑ तन्य॒तुर्य॑था स्वा॒नो अ॑र्त॒ त्मना॑ दि॒वः ॥८॥

Tava dyumanto archayo gravevochyate brihat
Uto te tanyaturyatha svano arta tmana divah

ए॒वाँ अ॒ग्निं व॑सू॒यव॑ः सहसा॒नं व॑वन्दिम ।
स नो॒ विश्वा॒ अति॒ द्विष॒ः पर्ष॑न्ना॒वेव॑ सु॒क्रतु॑ः ॥९॥

Evam agnim vasuyavah sahasanam vavandima
Sa no vishva ati dvishah parshannaveva sukratuh