Sukta 26

26.1

9 vasuyava atreyah, agnih, 9vishve devah, gayatri

अग्ने॑ पावक रो॒चिषा॑ म॒न्द्रया॑ देव जि॒ह्वया॑ । आ दे॒वान् व॑क्षि॒ यक्षि॑ च ॥१॥

Agne pavaka rochisha mandraya deva jihvaya, a devan vakshi yakshi cha

तं त्वा॑ घृतस्नवीमहे॒ चित्र॑भानो स्व॒र्दृश॑म् । दे॒वाँ आ वी॒तये॑ वह ॥२॥

Tam tva ghritasnavimahe chitrabhano svardrisham, devam a vitaye vaha

वी॒तिहो॑त्रं त्वा कवे द्यु॒मन्तं॒ समि॑धीमहि । अग्ने॑ बृ॒हन्त॑मध्व॒रे ॥३॥

Vitihotram tva kave dyumantam samidhimahi, agne brihantamadhvare

अग्ने॒ विश्वे॑भि॒रा ग॑हि दे॒वेभि॑र्ह॒व्यदा॑तये । होता॑रं त्वा वृणीमहे ॥४॥

Agne vishvebhira gahi devebhirhavyadataye, hotaram tva vrinimahe

यज॑मानाय सुन्व॒त आग्ने॑ सु॒वीर्यं॑ वह । दे॒वैरा स॑त्सि ब॒र्हिषि॑ ॥५॥

Yajamanaya sunvata agne suviryam vaha, devaira satsi barhishi

स॒मि॒धा॒नः स॑हस्रजि॒दग्ने॒ धर्मा॑णि पुष्यसि । दे॒वानां॑ दू॒त उ॒क्थ्य॑ः ॥६॥

Samidhanah sahasrajidagne dharmani pushyasi, devanam duta ukthyah

न्य१ग्निं जा॒तवे॑दसं होत्र॒वाहं॒ यवि॑ष्ठ्यम् । दधा॑ता दे॒वमृ॒त्विज॑म् ॥७॥

Nya1gnim jatavedasam hotravaham yavishthyam, dadhata devamritvijam

प्र य॒ज्ञ ए॑त्वानु॒षग॒द्या दे॒वव्य॑चस्तमः । स्तृ॒णी॒त ब॒र्हिरा॒सदे॑ ॥८॥

Pra yagya etvanushagadya devavyachastamah, strinita barhirasade

एदं म॒रुतो॑ अ॒श्विना॑ मि॒त्रः सी॑दन्तु॒ वरु॑णः । दे॒वास॒ः सर्व॑या वि॒शा ॥९॥

Edam maruto ashvina mitrah sidantu varunah, devasah sarvaya visha