সূক্ত 5

5.1

১৫ বামদেবো গৌতমঃ। বৈশ্বানরোঽগ্নিঃ।ত্রিষ্টুপ্।

বৈশ্বানরায় মীলহুষে সজোষাঃ কথা দাশেমাগ্নয়ে বৃহদ্ভাঃ ।
অনূনেন বৃহতা বক্ষথেনোপ স্তভায়দুপমিন্ন রোধঃ ॥১॥

মা নিন্দত য ইমাং মহ্যং রাতিং দেবো দদৌ মর্ত্যায় স্বধাবান্ ।
পাকায় গৃত্সো অমৃতো বিচেতা বৈশ্বানরো নৃতমো যহ্বো অগ্নিঃ ॥২॥

সাম দ্বিবর্হা মহি তিগ্মভৃষ্টিঃ সহস্ররেতা বৃষভস্তুবিষ্মান্ ।
পদং ন গোরপগূলহং বিবিদ্বানগ্নির্মহ্যং প্রেদু বোচন্মনীষাম্ ॥৩॥

প্র তাঁ অগ্নির্বভসৎ তিগ্মজম্ভস্তপিষ্ঠেন শোচিষা যঃ সুরাধাঃ ।
প্র যে মিনন্তি বরুণস্য ধাম প্রিয়া মিত্রস্য চেততো ধ্রুবাণি ॥৪॥

অভ্রাতরো ন যোষণো ব্যন্তঃ পতিরিপো ন জনয়ো দুরেবাঃ ।
পাপাসঃ সন্তো অনৃতা অসত্যা ইদং পদমজনতা গভীরম্ ॥৫॥

ইদং মে অগ্নে কিয়তে পাবকাঽমিনতে গুরুং ভারং ন মন্ম ।
বৃহদ্ দধাথ ধৃষতা গভীরং যহ্বং পৃষ্ঠং প্রয়সা সপ্তধাতু ॥৬॥

তমিন্ন্বে৩ব সমনা সমানমভি ক্রত্বা পুনতী ধীতিরশ্যাঃ ।
সসস্য চর্মন্নধি চারু পৃশ্নেরগ্রে রুপ আরুপিতং জবারু ॥৭॥

প্রবাচ্যং বচসঃ কিং মে অস্য গুহা হিতমুপ নিণিগ্বদন্তি ।
যদুস্রিয়াণামপ বারিব ব্রন্ পাতি প্রিয়ং রুপো অগ্রং পদং বেঃ ॥৮॥

ইদমু ত্যন্মহি মহামনীকং যদুস্রিয়া সচত পূর্ব্যং গৌঃ ।
ঋতস্য পদে অধি দীদ্যানং গুহা রঘুষ্যদ্ রঘুয়দ্ বিবেদ ॥৯॥

অধ দ্যুতানঃ পিত্রোঃ সচাসামনুত গুহ্যং চারু পৃশ্নেঃ ।
মাতুষ্পদে পরমে অন্তি ষদ্ গোর্বৃষ্ণঃ শোচিষঃ প্রয়তস্য জিহ্বা ॥১০॥

ঋতং বোচে নমসা পৃচ্ছ্যমানস্তবাশসা জাতবেদো যদীদম্ ।
ত্বমস্য ক্ষয়সি যদ্ধ বিশ্বং দিবি যদু দ্রবিণং যৎ পৃথিব্যাম্ ॥১১॥

কিং নো অস্য দ্রবিণং কদ্ধ রত্নং বি নো বোচো জাতবেদশ্চিকিত্বান্ ।
গুহাধ্বনঃ পরমং যন্নো অস্য রেকু পদং ন নিদানা অগন্ম ॥১২॥

কা মর্যাদা বয়ুনা কদ্ধ বামমচ্ছা গমেম রঘবো ন বাজম্ ।
কদা নো দেবীরমৃতস্য পত্নীঃ সূরো বর্ণেন ততনন্নুষাসঃ ॥১৩॥

অনিরেণ বচসা ফল্গ্বেন প্রতীত্যেন কৃধুনাতৃপাসঃ ।
অধা তে অগ্নে কিমিহা বদন্ত্যনায়ুধাস আসতা সচন্তাম্ ॥১৪॥

অস্য শ্রিয়ে সমিধানস্য বৃষ্ণো বসোরনীকং দম আ রুরোচ ।
রুশদ্ বসানঃ সুদৃশীকরূপঃ ক্ষিতির্ন রায়া পুরুবারো অদ্যৌৎ ॥১৫॥