সূক্ত 8

8.1

১১ গাথিনো বিশ্বামিত্রঃ। যূপঃ, ৬-১০ যূপাঃ, ৮ বিশ্বে দেবা বা, ১১ ব্রশ্চনঃ । ত্রিষ্টুপ্, ৩, ৭ অনুষ্টুপ্।

অঞ্জন্তি ত্বামধ্বরে দেবয়ন্তো বনস্পতে মধুনা দৈব্যেন ।
যদূর্ধ্বস্তিষ্ঠা দ্রবিণেহ ধত্তাদ্ যদ্ বা ক্ষয়ো মাতুরস্যা উপস্থে ॥১॥

সমিদ্ধস্য শ্রয়মাণঃ পুরস্তাদ্ ব্রহ্ম বন্বানো অজরং সুবীরম্ ।
আরে অস্মদমতিং বাধমান উচ্ছ্রয়স্ব মহতে সৌভগায় ॥২॥

উচ্ছ্রয়স্ব বনস্পতে বর্ষ্মন্পৃ পৃথিব্যা অধি ।
সুমিতী মীয়মানো বর্চো ধা যজ্ঞবাহসে ॥৩॥

যুবা সুবাসাঃ পরিবীত আগাৎ স উ শ্রেয়ান্ ভবতি জায়মানঃ ।
তং ধীরাসঃ কবয় উন্নয়ন্তি স্বাধ্যো৩ মনসা দেবয়ন্তঃ ॥৪॥

জাতো জায়তে সুদিনত্বে অহ্নাং সমর্য আ বিদথে বর্ধমানঃ ।
পুনন্তি ধীরা অপসো মনীষা দেবয়া বিপ্র উদিয়র্তি বাচম্ ॥৫॥

যান্ বো নরো দেবয়ন্তো নিমিম্যুর্বনস্পতে স্বধিতির্বা ততক্ষ ।
তে দেবাসঃ স্বরবস্তস্থিবাংসঃ প্রজাবদস্মে দিধিষন্তু রত্নম্ ॥৬॥

যে বৃক্ণাসো অধি ক্ষমি নিমিতাসো যতস্রুচঃ ।
তে নো ব্যন্তু বার্যং দেবত্রা ক্ষেত্রসাধসঃ ॥৭॥

আদিত্যা রুদ্রা বসবঃ সুনীথা দ্যাবাক্ষামা পৃথিবী অন্তরিক্ষম্ ।
সজোষসো যজ্ঞমবন্তু দেবা ঊর্ধ্বং কৃণ্বন্ত্বধ্বরস্য কেতুম্ ॥৮॥

হংসা ইব শ্রেণিশো যতানাঃ শুক্রা বসানাঃ স্বরবো ন আগুঃ ।
উন্নীয়মানাঃ কবিভিঃ পুরস্তাদ্ দেবা দেবানামপি যন্তি পাথঃ ॥৯॥

শৃঙ্গাণীবেচ্ছৃঙ্গিণাং সং দদৃশ্রে চষালবন্তঃ স্বরবঃ পৃথিব্যাম্ ।
বাঘদ্ভির্বা বিহবে শ্রোষমাণা অস্মাঁ অবন্তু পৃতনাজ্যেষু ॥১০॥

বনস্পতে শতবল্শো বি রোহ সহস্রবল্শা বি বয়ং রুহেম ।
যং ত্বাময়ং স্বধিতিস্তেজমানঃ প্রণিনায় মহতে সৌভগায় ॥১১॥