সূক্ত 6

6.1

১১ গাথিনো বিশ্বামিত্রঃ। অগ্নিঃ। ত্রিষ্টুপ্।

প্র কারবো মননা বচ্যমানা দেবদ্রীচীং নয়ত দেবয়ন্তঃ ।
দক্ষিণাবাড্ বাজিনী প্রাচ্যেতি হবির্ভরন্ত্যগ্নয়ে ঘৃতাচী ॥১॥

6.2

আ রোদসী অপৃণা জায়মান উত প্র রিক্থা অধ নু প্রয়জ্যো ।
দিবশ্চিদগ্নে মহিনা পৃথিব্যা বচ্যন্তাং তে বহ্নয়ঃ সপ্তজিহ্বাঃ ॥২॥

6.3

দ্যৌশ্চ ত্বা পৃথিবী যজ্ঞিয়াসো নি হোতারং সাদয়ন্তে দমায় ।
যদী বিশো মানুষীর্দেবয়ন্তীঃ প্রয়স্বতীরীলতে শুক্রমর্চিঃ ॥৩॥

6.4

মহান্ ত্সধস্থে ধ্রুব আ নিষত্তোঽন্তর্দ্যাবা মাহিনে হর্যমাণঃ ।
আস্ক্রে সপত্নী অজরে অমৃক্তে সবর্দুঘে উরুগায়স্য ধেনূ ॥৪॥

6.5

ব্রতা তে অগ্নে মহতো মহানি তব ক্রত্বা রোদসী আ ততন্থ ।
ত্বং দূতো অভবো জায়মানস্ত্বং নেতা বৃষভ চর্ষণীনাম্ ॥৫॥

6.6

ঋতস্য বা কেশিনা যোগ্যাভির্ঘৃতস্নুবা রোহিতা ধুরি ধিষ্ব ।
অথা বহ দেবান্ দেব বিশ্বান্ ত্স্বধ্বরা কৃণুহি জাতবেদঃ ॥৬॥

6.7

দিবশ্চিদা তে রুচয়ন্ত রোকা উষো বিভাতীরনু ভাসি পূর্বীঃ ।
অপো যদগ্ন উশধগ্বনেষু হোতুর্মন্দ্রস্য পনয়ন্ত দেবাঃ ॥৭॥

6.8

উরৌ বা যে অন্তরিক্ষে মদন্তি দিবো বা যে রোচনে সন্তি দেবাঃ ।
ঊমা বা যে সুহবাসো যজত্রা আয়েমিরে রথ্যো অগ্নে অশ্বাঃ ॥৮॥

6.9

ঐভিরগ্নে সরথং যাহ্যর্বাঙ্ নানারথং বা বিভবো হ্যশ্বাঃ ।
পত্নীবতস্ত্রিংশতং ত্রীঁশ্চ দেবাননুষ্বধমা বহ মাদয়স্ব ॥৯॥

6.10

স হোতা যস্য রোদসী চিদুর্বী যজ্ঞংয়জ্ঞমভি বৃধে গৃণীতঃ ।
প্রাচী অধ্বরেব তস্থতুঃ সুমেকে ঋতাবরী ঋতজাতস্য সত্যে ॥১০॥

6.11

ইলামগ্নে পুরুদংসং সনিং গোঃ শশ্বত্তমং হবমানায় সাধ ।
স্যান্নঃ সূনুস্তনয়ো বিজাবা ঽগ্নে সা তে সুমতির্ভূত্বস্মে ॥১১॥