সূক্ত 27

27.1

১৫ গাথিনো বিশ্বামিত্রঃ। অগ্নিঃ, ১ ঋতবো বা। গায়ত্রী।

প্র বো বাজা অভিদ্যবো হবিষ্মন্তো ঘৃতাচ্যা । দেবাঞ্জিগাতি সুম্নয়ুঃ ॥১॥

ঈলে অগ্নিং বিপশ্চিতং গিরা যজ্ঞস্য সাধনম্ । শ্রুষ্টীবানং ধিতাবানম্ ॥২॥

অগ্নে শকেম তে বয়ং যমং দেবস্য বাজিনঃ । অতি দ্বেষাংসি তরেম ॥৩॥

সমিধ্যমানো অধ্বরে৩ঽগ্নিঃ পাবক ঈড্যঃ । শোচিষ্কেশস্তমীমহে ॥৪॥

পৃথুপাজা অমর্ত্যো ঘৃতনির্ণিক্ স্বাহুতঃ । অগ্নির্যজ্ঞস্য হব্যবাট্ ॥৫॥

তং সবাধো যতস্রুচ ইত্থা ধিয়া যজ্ঞবন্তঃ । আ চক্রুরগ্নিমূতয়ে ॥৬॥

হোতা দেবো অমর্ত্যঃ পুরস্তাদেতি মায়য়া । বিদথানি প্রচোদয়ন্ ॥৭॥

বাজী বাজেষু ধীয়তেঽধ্বরেষু প্র ণীয়তে । বিপ্রো যজ্ঞস্য সাধনঃ ॥৮॥

ধিয়া চক্রে বরেণ্যো ভূতানাং গর্ভমা দধে । দক্ষস্য পিতরং তনা ॥৯॥

নি ত্বা দধে বরেণ্যং দক্ষস্যেলা সহস্কৃত । অগ্নে সুদীতিমুশিজম্ ॥১০॥

অগ্নিং যন্তুরমপ্তুরমৃতস্য যোগে বনুষঃ । বিপ্রা বাজৈঃ সমিন্ধতে ॥১১॥

ঊর্জো নপাতমধ্বরে দীদিবাংসমুপ দ্যবি । অগ্নিমীলে কবিক্রতুম্ ॥১২॥

ঈলেন্যো নমস্যস্তিরস্তমাংসি দর্শতঃ । সমগ্নিরিধ্যতে বৃষা ॥১৩॥

বৃষো অগ্নিঃ সমিধ্যতেঽশ্বো ন দেববাহনঃ । তং হবিষ্মন্ত ঈলতে ॥১৪॥

বৃষণং ত্বা বয়ং বৃষন্ বৃষণঃ সমিধীমহি । অগ্নে দীদ্যতং বৃহৎ ॥১৫॥