সূক্ত 21

21.1

৫ গাথী কৌশিকঃ। অগ্নিঃ,। ১ত্রিষ্টুপ্, ২-৩ অনুষ্টুপ্, ৪ বিরাড্ রূপা, ৫ সতোবৃহতী।

ইমং নো যজ্ঞমমৃতেষু ধেহীমা হব্যা জাতবেদো জুষস্ব ।
স্তোকানামগ্নে মেদসো ঘৃতস্য হোতঃ প্রাশান প্রথমো নিষদ্য ॥১॥

ঘৃতবন্তঃ পাবক তে স্তোকাঃ শ্চোতন্তি মেদসঃ ।
স্বধর্মন্ দেববীতয়ে শ্রেষ্ঠং নো ধেহি বার্যম্ ॥২॥

তুভ্যং স্তোকা ঘৃতশ্চুতোঽগ্নে বিপ্রায় সন্ত্য ।
ঋষিঃ শ্রেষ্ঠঃ সমিধ্যসে যজ্ঞস্য প্রাবিতা ভব ॥৩॥

তুভ্যং শ্চোতন্ত্যধ্রিগো শচীবঃ স্তোকাসো অগ্নে মেদসো ঘৃতস্য ।
কবিশস্তো বৃহতা ভানুনাগা হব্যা জুষস্ব মেধির ॥৪॥

ওজিষ্ঠং তে মধ্যতো মেদ উদ্ভৃতং প্র তে বয়ং দদামহে ।
শ্চোতন্তি তে বসো স্তোকা অধি ত্বচি প্রতি তান্ দেবশো বিহি ॥৫॥