সূক্ত 2

2.1

১৫ গাথিনো বিশ্বামিত্রঃ। বৈশ্বানরোঽগ্নিঃ। জগতী।

বৈশ্বানরায় ধিষণামৃতাবৃধে ঘৃতং ন পূতমগ্নয়ে জনামসি ।
দ্বিতা হোতারং মনুষশ্চ বাঘতো ধিয়া রথং ন কুলিশঃ সমৃণ্বতি ॥১॥

2.2

স রোচয়জ্জনুষা রোদসী উভে স মাত্রোরভবত্পুত্র ঈড্যঃ ।
হব্যবালগ্নিরজরশ্চনোহিতো দূলভো বিশামতিথির্বিভাবসুঃ ॥২॥

2.3

ক্রত্বা দক্ষস্য তরুষো বিধর্মণি দেবাসো অগ্নিং জনয়ন্ত চিত্তিভিঃ ।
রুরুচানং ভানুনা জ্যোতিষা মহামত্যং ন বাজং সনিষ্যন্নুপ ব্রুবে ॥৩॥

2.4

আ মন্দ্রস্য সনিষ্যন্তো বরেণ্যং বৃণীমহে অহ্রয়ং বাজমৃগ্মিয়ম্ ।
রাতিং ভৃগূণামুশিজং কবিক্রতুমগ্নিং রাজন্তং দিব্যেন শোচিষা ॥৪॥

2.5

অগ্নিং সুম্নায় দধিরে পুরো জনা বাজশ্রবসমিহ বৃক্তবর্হিষঃ ।
যতস্রুচঃ সুরুচং বিশ্বদেব্যং রুদ্রং যজ্ঞানাং সাধদিষ্টিমপসাম্ ॥৫॥

2.6

পাবকশোচে তব হি ক্ষয়ং পরি হোতর্যজ্ঞেষু বৃক্তবর্হিষো নরঃ ।
অগ্নে দুব ইচ্ছমানাস আপ্যমুপাসতে দ্রবিণং ধেহি তেভ্যঃ ॥৬॥

2.7

আ রোদসী অপৃণদা স্বর্মহজ্জাতং যদেনমপসো অধারয়ন্ ।
সো অধ্বরায় পরি ণীয়তে কবিরত্যো ন বাজসাতয়ে চনোহিতঃ ॥৭॥

2.8

নমস্যত হব্যদাতিং স্বধ্বরং দুবস্যত দম্যং জাতবেদসম্ ।
রথীর্ঋতস্য বৃহতো বিচর্ষণিরগ্নির্দেবানামভবৎ পুরোহিতঃ ॥৮॥

2.9

তিস্রো যহ্বস্য সমিধঃ পরিজ্মনোঽগ্নেরপুনন্নুশিজো অমৃত্যবঃ ।
তাসামেকামদধুর্মর্ত্যে ভুজমু লোকমু দ্বে উপ জামিমীয়তুঃ ॥৯॥

2.10

বিশাং কবিং বিশ্পতিং মানুষীরিষঃ সং সীমকৃণ্বন্ ত্স্বধিতিং ন তেজসে ।
স উদ্বতো নিবতো যাতি বেবিষৎ স গর্ভমেষু ভুবনেষু দীধরৎ ॥১০॥

2.11

স জিন্বতে জঠরেষু প্রজজ্ঞিবান্ বৃষা চিত্রেষু নানদন্ন সিংহঃ ।
বৈশ্বানরঃ পৃথুপাজা অমর্ত্যো বসু রত্না দয়মানো বি দাশুষে ॥১১॥

2.12

বৈশ্বানরঃ প্রত্নথা নাকমারুহদ্ দিবস্পৃষ্ঠং ভন্দমানঃ সুমন্মভিঃ ।
স পূর্ববজ্জনয়ঞ্জন্তবে ধনং সমানমজ্মং পর্যেতি জাগৃবিঃ ॥১২॥

2.13

ঋতাবানং যজ্ঞিয়ং বিপ্রমুক্থ্য১মা যং দধে মাতরিশ্বা দিবি ক্ষয়ম্ ।
তং চিত্রয়ামং হরিকেশমীমহে সুদীতিমগ্নিং সুবিতায় নব্যসে ॥১৩॥

2.14

শুচিং ন যামন্নিষিরং স্বর্দৃশং কেতুং দিবো রোচনস্থামুষর্বুধম্ ।
অগ্নিং মূর্ধানং দিবো অপ্রতিষ্কুতং তমীমহে নমসা বাজিনং বৃহৎ ॥১৪॥

2.15

মন্দ্রং হোতারং শুচিমদ্বয়াবিনং দমূনসমুক্থ্যং বিশ্বচর্ষণিম্ ।
রথং ন চিত্রং বপুষায় দর্শতং মনুর্হিতং সদমিদ্ রায় ঈমহে ॥১৫॥