Sukta 2

2.1

15 gathino vishvamitrah, vaishvanarognih, jagati

वै॒श्वा॒न॒राय॑ धि॒षणा॑मृता॒वृधे॑ घृ॒तं न पू॒तम॒ग्नये॑ जनामसि ।
द्वि॒ता होता॑रं॒ मनु॑षश्च वा॒घतो॑ धि॒या रथं॒ न कुलि॑श॒ः समृ॑ण्वति ॥१॥

Vaishvanaraya dhishanamritavridhe ghritam na putamagnaye janamasi
Dvita hotaram manushashcha vaghato dhiya ratham na kulishah samrinvati

2.2

स रो॑चयज्ज॒नुषा॒ रोद॑सी उ॒भे स मा॒त्रोर॑भवत्पु॒त्र ईड्य॑ः ।
ह॒व्य॒वाळ॒ग्निर॒जर॒श्चनो॑हितो दू॒ळभो॑ वि॒शामति॑थिर्वि॒भाव॑सुः ॥२॥

Sa rochayajjanusha rodasi ubhe sa matrorabhavatputra idyah
Havyavalagnirajarashchanohito dulabho vishamatithirvibhavasuh

2.3

क्रत्वा॒ दक्ष॑स्य॒ तरु॑षो॒ विध॑र्मणि दे॒वासो॑ अ॒ग्निं ज॑नयन्त॒ चित्ति॑भिः ।
रु॒रु॒चा॒नं भा॒नुना॒ ज्योति॑षा म॒हामत्यं॒ न वाजं॑ सनि॒ष्यन्नुप॑ ब्रुवे ॥३॥

Kratva dakshasya tarusho vidharmani devaso agnim janayanta chittibhih
Ruruchanam bhanuna jyotisha mahamatyam na vajam sanishyannupa bruve

2.4

आ म॒न्द्रस्य॑ सनि॒ष्यन्तो॒ वरे॑ण्यं वृणी॒महे॒ अह्र॑यं॒ वाज॑मृ॒ग्मिय॑म् ।
रा॒तिं भृगू॑णामु॒शिजं॑ क॒विक्र॑तुम॒ग्निं राज॑न्तं दि॒व्येन॑ शो॒चिषा॑ ॥४॥

A mandrasya sanishyanto varenyam vrinimahe ahrayam vajamrigmiyam
Ratim bhrigunamushijam kavikratumagnim rajantam divyena shochisha

2.5

अ॒ग्निं सु॒म्नाय॑ दधिरे पु॒रो जना॒ वाज॑श्रवसमि॒ह वृ॒क्तब॑र्हिषः ।
य॒तस्रु॑चः सु॒रुचं॑ वि॒श्वदे॑व्यं रु॒द्रं य॒ज्ञानां॒ साध॑दिष्टिम॒पसा॑म् ॥५॥

Agnim sumnaya dadhire puro jana vajashravasamiha vriktabarhishah
Yatasruchah surucham vishvadevyam rudram yagyanam sadhadishtimapasam

2.6

पाव॑कशोचे॒ तव॒ हि क्षयं॒ परि॒ होत॑र्य॒ज्ञेषु॑ वृ॒क्तब॑र्हिषो॒ नर॑ः ।
अग्ने॒ दुव॑ इ॒च्छमा॑नास॒ आप्य॒मुपा॑सते॒ द्रवि॑णं धेहि॒ तेभ्य॑ः ॥६॥

Pavakashoche tava hi kshayam pari hotaryagyeshu vriktabarhisho narah
Agne duva ichchhamanasa apyamupasate dravinam dhehi tebhyah

2.7

आ रोद॑सी अपृण॒दा स्व॑र्म॒हज्जा॒तं यदे॑नम॒पसो॒ अधा॑रयन् ।
सो अ॑ध्व॒राय॒ परि॑ णीयते क॒विरत्यो॒ न वाज॑सातये॒ चनो॑हितः ॥७॥

A rodasi aprinada svarmahajjatam yadenamapaso adharayan
So adhvaraya pari niyate kaviratyo na vajasataye chanohitah

2.8

न॒म॒स्यत॑ ह॒व्यदा॑तिं स्वध्व॒रं दु॑व॒स्यत॒ दम्यं॑ जा॒तवे॑दसम् ।
र॒थीर्ऋ॒तस्य॑ बृह॒तो विच॑र्षणिर॒ग्निर्दे॒वाना॑मभवत् पु॒रोहि॑तः ॥८॥

Namasyata havyadatim svadhvaram duvasyata damyam jatavedasam
Rathirritasya brihato vicharshaniragnirdevanamabhavat purohitah

2.9

ति॒स्रो य॒ह्वस्य॑ स॒मिध॒ः परि॑ज्मनो॒ऽग्नेर॑पुनन्नु॒शिजो॒ अमृ॑त्यवः ।
तासा॒मेका॒मद॑धु॒र्मर्त्ये॒ भुज॑मु लो॒कमु॒ द्वे उप॑ जा॒मिमी॑यतुः ॥९॥

Tisro yahvasya samidhah parijmanognerapunannushijo amrityavah
Tasamekamadadhurmartye bhujamu lokamu dve upa jamimiyatuh

2.10

वि॒शां क॒विं वि॒श्पतिं॒ मानु॑षी॒रिष॒ः सं सी॑मकृण्व॒न् त्स्वधि॑तिं॒ न तेज॑से ।
स उ॒द्वतो॑ नि॒वतो॑ याति॒ वेवि॑ष॒त् स गर्भ॑मे॒षु भुव॑नेषु दीधरत् ॥१०॥

Visham kavim vishpatim manushirishah sam simakrinvan tsvadhitim na tejase
Sa udvato nivato yati vevishat sa garbhameshu bhuvaneshu didharat

2.11

स जि॑न्वते ज॒ठरे॑षु प्रजज्ञि॒वान् वृषा॑ चि॒त्रेषु॒ नान॑द॒न्न सिं॒हः ।
वै॒श्वा॒न॒रः पृ॑थु॒पाजा॒ अम॑र्त्यो॒ वसु॒ रत्ना॒ दय॑मानो॒ वि दा॒शुषे॑ ॥११॥

Sa jinvate jathareshu prajagyivan vrisha chitreshu nanadanna sinhah
Vaishvanarah prithupaja amartyo vasu ratna dayamano vi dashushe

2.12

वै॒श्वा॒न॒रः प्र॒त्नथा॒ नाक॒मारु॑हद् दि॒वस्पृ॒ष्ठं भन्द॑मानः सु॒मन्म॑भिः ।
स पू॑र्व॒वज्ज॒नय॑ञ्ज॒न्तवे॒ धनं॑ समा॒नमज्मं॒ पर्ये॑ति॒ जागृ॑विः ॥१२॥

Vaishvanarah pratnatha nakamaruhad divasprishtham bhandamanah sumanmabhih
Sa purvavajjanayanjantave dhanam samanamajmam paryeti jagrivih

2.13

ऋ॒तावा॑नं य॒ज्ञियं॒ विप्र॑मु॒क्थ्य१मा यं द॒धे मा॑त॒रिश्वा॑ दि॒वि क्षय॑म् ।
तं चि॒त्रया॑मं॒ हरि॑केशमीमहे सुदी॒तिम॒ग्निं सु॑वि॒ताय॒ नव्य॑से ॥१३॥

Ritavanam yagyiyam vipramukthya1ma yam dadhe matarishva divi kshayam
Tam chitrayamam harikeshamimahe suditimagnim suvitaya navyase

2.14

शुचिं॒ न याम॑न्निषि॒रं स्व॒र्दृशं॑ के॒तुं दि॒वो रो॑चन॒स्थामु॑ष॒र्बुध॑म् ।
अ॒ग्निं मू॒र्धानं॑ दि॒वो अप्र॑तिष्कुतं॒ तमी॑महे॒ नम॑सा वा॒जिनं॑ बृ॒हत् ॥१४॥

Shuchim na yamannishiram svardrisham ketum divo rochanasthamusharbudham
Agnim murdhanam divo apratishkutam tamimahe namasa vajinam brihat

2.15

म॒न्द्रं होता॑रं॒ शुचि॒मद्व॑याविनं॒ दमू॑नसमु॒क्थ्यं॑ वि॒श्वच॑र्षणिम् ।
रथं॒ न चि॒त्रं वपु॑षाय दर्श॒तं मनु॑र्हितं॒ सद॒मिद् रा॒य ई॑महे ॥१५॥

Mandram hotaram shuchimadvayavinam damunasamukthyam vishvacharshanim
Ratham na chitram vapushaya darshatam manurhitam sadamid raya imahe