সূক্ত 1

1.1

২৩ গাথিনো বিশ্বামিত্রঃ। অগ্নিঃ। ত্রিষ্টুপ্।

সোমস্য মা তবসং বক্ষ্যগ্নে বহ্নিং চকর্থ বিদথে যজধ্যৈ ।
দেবাঁ অচ্ছা দীদ্যদ্ যুঞ্জে অদ্রিং শমায়ে অগ্নে তন্বং জুষস্ব ॥১॥

প্রাঞ্চং যজ্ঞং চকৃম বর্ধতাং গীঃ সমিদ্ভিরগ্নিং নমসা দুবস্যন্ ।
দিবঃ শশাসুর্বিদথা কবীনাং গৃত্সায় চিৎ তবসে গাতুমীষুঃ ॥২॥

ময়ো দধে মেধিরঃ পূতদক্ষো দিবঃ সুবন্ধুর্জনুষা পৃথিব্যাঃ ।
অবিন্দন্নু দর্শতমপ্স্ব১ন্তর্দেবাসো অগ্নিমপসি স্বসৄণাম্ ॥৩॥

অবর্ধয়ন্ ত্সুভগং সপ্ত যহ্বীঃ শ্বেতং জজ্ঞানমরুষং মহিত্বা ।
শিশুং ন জাতমভ্যারুরশ্বা দেবাসো অগ্নিং জনিমন্ বপুষ্যন্ ॥৪॥

শুক্রেভিরঙ্গৈ রজ আততন্বান্ ক্রতুং পুনানঃ কবিভিঃ পবিত্রৈঃ ।
শোচির্বসানঃ পর্যায়ুরপাং শ্রিয়ো মিমীতে বৃহতীরনূনাঃ ॥৫॥

বব্রাজা সীমনদতীরদব্ধা দিবো যহ্বীরবসানা অনগ্নাঃ ।
সনা অত্র যুবতয়ঃ সয়োনীরেকং গর্ভং দধিরে সপ্ত বাণীঃ ॥৬॥

স্তীর্ণা অস্য সংহতো বিশ্বরূপা ঘৃতস্য যোনৌ স্রবথে মধূনাম্ ।
অস্থুরত্র ধেনবঃ পিন্বমানা মহী দস্মস্য মাতরা সমীচী ॥৭॥

বভ্রাণঃ সূনো সহসো ব্যদ্যৌদ্ দধানঃ শুক্রা রভসা বপূংষি ।
শ্চোতন্তি ধারা মধুনো ঘৃতস্য বৃষা যত্র বাবৃধে কাব্যেন ॥৮॥

পিতুশ্চিদূধর্জনুষা বিবেদ ব্যস্য ধারা অসৃজদ্বি ধেনাঃ ।
গুহা চরন্তং সখিভিঃ শিবেভির্দিবো যহ্বীভির্ন গুহা বভূব ॥৯॥

পিতুশ্চ গর্ভং জনিতুশ্চ বভ্রে পূর্বীরেকো অধয়ত্পী পীপ্যানাঃ ।
বৃষ্ণে সপত্নী শুচয়ে সবন্ধূ উভে অস্মৈ মনুষ্যে৩ নি পাহি ॥১০॥

উরৌ মহাঁ অনিবাধে ববর্ধাঽঽপো অগ্নিং যশসঃ সং হি পূর্বীঃ ।
ঋতস্য যোনাবশয়দ্ দমূনা জামীনামগ্নিরপসি স্বসৄণাম্ ॥১১॥

অক্রো ন বভ্রিঃ সমিথে মহীনাং দিদৃক্ষেয়ঃ সূনবে ভাঋজীকঃ ।
উদুস্রিয়া জনিতা যো জজানাঽপাং গর্ভো নৃতমো যহ্বো অগ্নিঃ ॥১২॥

অপাং গর্ভং দর্শতমোষধীনাং বনা জজান সুভগা বিরূপম্ ।
দেবাসশ্চিন্মনসা সং হি জগ্মুঃ পনিষ্ঠং জাতং তবসং দুবস্যন্ ॥১৩॥

বৃহন্ত ইদ্ ভানবো ভাঋজীকমগ্নিং সচন্ত বিদ্যুতো ন শুক্রাঃ ।
গুহেব বৃদ্ধং সদসি স্বে অন্তরপার ঊর্বে অমৃতং দুহানাঃ ॥১৪॥

ঈলে চ ত্বা যজমানো হবির্ভিরীলে সখিত্বং সুমতিং নিকামঃ ।
দেবৈরবো মিমীহি সং জরিত্রে রক্ষা চ নো দম্যেভিরনীকৈঃ ॥১৫॥

উপক্ষেতারস্তব সুপ্রণীতেঽগ্নে বিশ্বানি ধন্যা দধানাঃ ।
সুরেতসা শ্রবসা তুঞ্জমানা অভি ষ্যাম পৃতনায়ূঁরদেবান্ ॥১৬॥

আ দেবানামভবঃ কেতুরগ্নে মন্দ্রো বিশ্বানি কাব্যানি বিদ্বান্ ।
প্রতি মর্তাঁ অবাসয়ো দমূনা অনু দেবান্ রথিরো যাসি সাধন্ ॥১৭॥

নি দুরোণে অমৃতো মর্ত্যানাং রাজা সসাদ বিদথানি সাধন্ ।
ঘৃতপ্রতীক উর্বিয়া ব্যদ্যৌদগ্নির্বিশ্বানি কাব্যানি বিদ্বান্ ॥১৮॥

আ নো গহি সখ্যেভিঃ শিবেভির্মহান্ মহীভিরূতিভিঃ সরণ্যন্ ।
অস্মে রয়িং বহুলং সংতরুত্রং সুবাচং ভাগং যশসং কৃধী নঃ ॥১৯॥

এতা তে অগ্নে জনিমা সনানি প্র পূর্ব্যায় নূতনানি বোচম্ ।
মহান্তি বৃষ্ণে সবনা কৃতেমা জন্মঞ্জন্মন্ নিহিতো জাতবেদাঃ ॥২০॥

জন্মঞ্জন্মন্ নিহিতো জাতবেদা বিশ্বামিত্রেভিরিধ্যতে অজস্রঃ ।
তস্য বয়ং সুমতৌ যজ্ঞিয়স্যাঽপি ভদ্রে সৌমনসে স্যাম ॥২১॥

ইমং যজ্ঞং সহসাবন্ ত্বং নো দেবত্রা ধেহি সুক্রতো ররাণঃ ।
প্র যংসি হোতর্বৃহতীরিষো নোঽগ্নে মহি দ্রবিণমা যজস্ব ॥২২॥

ইলামগ্নে পুরুদংসং সনিং গোঃ শশ্বত্তমং হবমানায় সাধ ।
স্যান্নঃ সূনুস্তনয়ো বিজাবা ঽগ্নে সা তে সুমতির্ভূত্বস্মে ॥২৩॥