সূক্ত 23

23.1

১৯ গৃত্সমদ (আঙ্গিরসঃ শৌনহোত্রঃ পশ্চাদ্) ভার্গবঃ শৌনকঃ। বৃহস্পতিঃ, ১, ৫, ৯, ১১, ১৭, ১৯, ব্রহ্মণস্পতিঃ। জগতী, ১৫, ১৯ ত্রিষ্টুপ্।

গণানাং ত্বা গণপতিং হবামহে কবিং কবীনামুপমশ্রবস্তমম্ ।
জ্যেষ্ঠরাজং ব্রহ্মণাং ব্রহ্মণস্পত আ নঃ শৃণ্বন্নূতিভিঃ সীদ সাদনম্ ॥১॥

দেবাশ্চিৎ তে অসুর্য প্রচেতসো বৃহস্পতে যজ্ঞিয়ং ভাগমানশুঃ ।
উস্রা ইব সূর্যো জ্যোতিষা মহো বিশ্বেষামিজ্জনিতা ব্রহ্মণামসি ॥২॥

আ বিবাধ্যা পরিরাপস্তমাংসি চ জ্যোতিষ্মন্তং রথমৃতস্য তিষ্ঠসি ।
বৃহস্পতে ভীমমমিত্রদম্ভনং রক্ষোহণং গোত্রভিদং স্বর্বিদম্ ॥৩॥

সুনীতিভির্নয়সি ত্রায়সে জনং যস্তুভ্যং দাশান্ন তমংহো অশ্নবৎ ।
ব্রহ্মদ্বিষস্তপনো মন্যুমীরসি বৃহস্পতে মহি তৎ তে মহিত্বনম্ ॥৪॥

ন তমংহো ন দুরিতং কুতশ্চন নারাতয়স্তিতিরুর্ন দ্বয়াবিনঃ ।
বিশ্বা ইদস্মাদ্ ধ্বরসো বি বাধসে যং সুগোপা রক্ষসি ব্রহ্মণস্পতে ॥৫॥

ত্বং নো গোপাঃ পথিকৃদ্ বিচক্ষণস্তব ব্রতায় মতিভির্জরামহে ।
বৃহস্পতে যো নো অভি হ্বরো দধে স্বা তং মর্মর্তু দুচ্ছুনা হরস্বতী ॥৬॥

উত বা যো নো মর্চয়াদনাগসো ঽরাতীবা মর্তঃ সানুকো বৃকঃ ।
বৃহস্পতে অপ তং বর্তয়া পথঃ সুগং নো অস্যৈ দেববীতয়ে কৃধি ॥৭॥

ত্রাতারং ত্বা তনূনাং হবামহে ঽবস্পর্তরধিবক্তারমস্ময়ুম্ ।
বৃহস্পতে দেবনিদো নি বর্হয় মা দুরেবা উত্তরং সুম্নমুন্নশন্ ॥৮॥

ত্বয়া বয়ং সুবৃধা ব্রহ্মণস্পতে স্পার্হা বসু মনুষ্যা দদীমহি ।
যা নো দূরে তলিতো যা অরাতয়ো ঽভি সন্তি জম্ভয়া তা অনপ্নসঃ ॥৯॥

ত্বয়া বয়মুত্তমং ধীমহে বয়ো বৃহস্পতে পপ্রিণা সস্নিনা যুজা ।
মা নো দুঃশংসো অভিদিপ্সুরীশত প্র সুশংসা মতিভিস্তারিষীমহি ॥১০॥

অনানুদো বৃষভো জগ্মিরাহবং নিষ্টপ্তা শত্রুং পৃতনাসু সাসহিঃ ।
অসি সত্য ঋণয়া ব্রহ্মণস্পত উগ্রস্য চিদ্ দমিতা বীলুহর্ষিণঃ ॥১১॥

অদেবেন মনসা যো রিষণ্যতি শাসামুগ্রো মন্যমানো জিঘাংসতি ।
বৃহস্পতে মা প্রণক্ তস্য নো বধো নি কর্ম মন্যুং দুরেবস্য শর্ধতঃ ॥১২॥

ভরেষু হব্যো নমসোপসদ্যো গন্তা বাজেষু সনিতা ধনংধনম্ ।
বিশ্বা ইদর্যো অভিদিপ্স্বো৩ মৃধো বৃহস্পতির্বি ববর্হা রথাঁ ইব ॥১৩॥

তেজিষ্ঠয়া তপনী রক্ষসস্তপ যে ত্বা নিদে দধিরে দৃষ্টবীর্যম্ ।
আবিস্তৎ কৃষ্ব যদসৎ ত উক্থ্যং১বৃহস্পতে বি পরিরাপো অর্দয় ॥১৪॥

বৃহস্পতে অতি যদর্যো অর্হাদ্ দ্যুমদ্বিভাতি ক্রতুমজ্জনেষু ।
যদ্ দীদয়চ্ছবস ঋতপ্রজাত তদস্মাসু দ্রবিণং ধেহি চিত্রম্ ॥১৫॥

মা নঃ স্তেনেভ্যো যে অভি দ্রুহস্পদে নিরামিণো রিপবোঽন্নেষু জাগৃধুঃ ।
আ দেবানামোহতে বি ব্রয়ো হৃদি বৃহস্পতে ন পরঃ সাম্নো বিদুঃ ॥১৬॥

বিশ্বেভ্যো হি ত্বা ভুবনেভ্যস্পরি ত্বষ্টাজনৎ সাম্নঃসাম্নঃ কবিঃ ।
স ঋণচিদৃণয়া ব্রহ্মণস্পতির্দ্রুহো হন্তা মহ ঋতস্য ধর্তরি ॥১৭॥

তব শ্রিয়ে ব্যজিহীত পর্বতো গবাং গোত্রমুদসৃজো যদঙ্গিরঃ ।
ইন্দ্রেণ যুজা তমসা পরীবৃতং বৃহস্পতে নিরপামৌব্জো অর্ণবম্ ॥১৮॥

ব্রহ্মণস্পতে ত্বমস্য যন্তা সূক্তস্য বোধি তনয়ং চ জিন্ব ।
বিশ্বং তদ্ভদ্রং যদবন্তি দেবা বৃহদ্ বদেম বিদথে সুবীরাঃ ॥১৯॥