সূক্ত 90

90.1

১৬ নারায়ণঃ। পুরুষঃ। অনুষ্টুপ্ , ১৬ ত্রিষ্টুপ্।

সহস্রশীর্ষা পুরুষঃ সহস্রাক্ষঃ সহস্রপাৎ । স ভূমিং বিশ্বতো বৃত্বাঽত্যতিষ্ঠদ্দশাঙ্গুলম্ ॥১॥

90.2

পুরুষ এবেদং সর্বং যদ্ভূতং যচ্চ ভব্যম্ । উতামৃতত্বস্যেশানো যদন্নেনাতিরোহতি ॥২॥

90.3

এতাবানস্য মহিমাঽতো জ্যায়াঁশ্চ পূরুষঃ । পাদোঽস্য বিশ্বা ভূতানি ত্রিপাদস্যামৃতং দিবি ॥৩॥

90.4

ত্রিপাদূর্ধ্ব উদৈত্পুরুষঃ পাদোঽস্যেহাভবত্পুনঃ । ততো বিষ্বঙ্ব্যক্রামত্সাশনানশনে অভি ॥৪॥

90.5

তস্মাদ্বিরালজায়ত বিরাজো অধি পূরুষঃ । স জাতো অত্যরিচ্যত পশ্চাদ্ভূমিমথো পুরঃ ॥৫॥

90.6

যত্পুরুষেণ হবিষা দেবা যজ্ঞমতন্বত । বসন্তো অস্যাসীদাজ্যং গ্রীষ্ম ইধ্মঃ শরদ্ধবিঃ ॥৬॥

90.7

তং যজ্ঞং বর্হিষি প্রৌক্ষন্পুরুষং জাতমগ্রতঃ । তেন দেবা অয়জন্ত সাধ্যা ঋষয়শ্চ যে ॥৭॥

90.8

তস্মাদ্যজ্ঞাত্সর্বহুতঃ সম্ভৃতং পৃষদাজ্যম্ । পশূন্তাঁশ্চক্রে বায়ব্যানারণ্যান্গ্রাম্যাশ্চ যে ॥৮॥

90.9

তস্মাদ্যজ্ঞাত্সর্বহুত ঋচঃ সামানি জজ্ঞিরে । ছন্দাংসি জজ্ঞিরে তস্মাদ্যজুস্তস্মাদজায়ত ॥৯॥

90.10

তস্মাদশ্বা অজায়ন্ত যে কে চোভয়াদতঃ । গাবো হ জজ্ঞিরে তস্মাত্তস্মাজ্জাতা অজাবয়ঃ ॥১০॥

90.11

যত্পুরুষং ব্যদধুঃ কতিধা ব্যকল্পয়ন্ । মুখং কিমস্য কৌ বাহূ কা ঊরূ পাদা উচ্যেতে ॥১১॥

90.12

ব্রাহ্মণোঽস্য মুখমাসীদ্বাহূ রাজন্যঃ কৃতঃ । ঊরূ তদস্য যদ্বৈশ্যঃ পদ্ভ্যাং শূদ্রো অজায়ত ॥১২॥

90.13

চন্দ্রমা মনসো জাতশ্চক্ষোঃ সূর্যো অজায়ত । মুখাদিন্দ্রশ্চাগ্নিশ্চ প্রাণাদ্বায়ুরজায়ত ॥১৩॥

90.14

নাভ্যা আসীদন্তরিক্ষং শীর্ষ্ণো দ্যৌঃ সমবর্তত । পদ্ভ্যাং ভূমির্দিশঃ শ্রোত্রাত্তথা লোকাঁ অকল্পয়ন্ ॥১৪॥

90.15

সপ্তাস্যাসন্পরিধয়স্ত্রিঃ সপ্ত সমিধঃ কৃতাঃ । দেবা যদ্যজ্ঞং তন্বানা অবধ্নন্পুরুষং পশুম্ ॥১৫॥

90.16

যজ্ঞেন যজ্ঞময়জন্ত দেবাস্তানি ধর্মাণি প্রথমান্যাসন্ ।
তে হ নাকং মহিমানঃ সচন্ত যত্র পূর্বে সাধ্যাঃ সন্তি দেবাঃ ॥১৬॥