সূক্ত 89

89.1

১৮ রেণুর্বৈশ্বামিত্রঃ। ইন্দ্রঃ, ৫ ইন্দ্রাসোমৌ। ত্রিষ্টুপ্।

ইন্দ্রং স্তবা নৃতমং যস্য মহ্না বিববাধে রোচনা বি জ্মো অন্তান্ ।
আ যঃ পপ্রৌ চর্ষণীধৃদ্বরোভিঃ প্র সিন্ধুভ্যো রিরিচানো মহিত্বা ॥১॥

89.2

স সূর্যঃ পর্যুরূ বরাংস্যেন্দ্রো ববৃত্যাদ্রথ্যেব চক্রা ।
অতিষ্ঠন্তমপস্যং১ ন সর্গং কৃষ্ণা তমাংসি ত্বিষ্যা জঘান ॥২॥

89.3

সমানমস্মা অনপাবৃদর্চ ক্ষ্ময়া দিবো অসমং ব্রহ্ম নব্যম্ ।
বি যঃ পৃষ্ঠেব জনিমান্যর্য ইন্দ্রশ্চিকায় ন সখায়মীষে ॥৩॥

89.4

ইন্দ্রায় গিরো অনিশিতসর্গা অপঃ প্রেরয়ং সগরস্য বুধ্নাৎ ।
যো অক্ষেণেব চক্রিয়া শচীভির্বিষ্বক্তস্তম্ভ পৃথিবীমুত দ্যাম্ ॥৪॥

89.5

আপান্তমন্যুস্তৃপলপ্রভর্মা ধুনিঃ শিমীবাঞ্ছরুমাঁ ঋজীষী ।
সোমো বিশ্বান্যতসা বনানি নার্বাগিন্দ্রং প্রতিমানানি দেভুঃ ॥৫॥

89.6

ন যস্য দ্যাবাপৃথিবী ন ধন্ব নান্তরিক্ষং নাদ্রয়ঃ সোমো অক্ষাঃ ।
যদস্য মন্যুরধিনীয়মানঃ শৃণাতি বীলু রুজতি স্থিরাণি ॥৬॥

89.7

জঘান বৃত্রং স্বধিতির্বনেব রুরোজ পুরো অরদন্ন সিন্ধূন্ ।
বিভেদ গিরিং নবমিন্ন কুম্ভমা গা ইন্দ্রো অকৃণুত স্বয়ুগ্ভিঃ ॥৭॥

89.8

ত্বং হ ত্যদৃণয়া ইন্দ্র ধীরোঽসির্ন পর্ব বৃজিনা শৃণাসি ।
প্র যে মিত্রস্য বরুণস্য ধাম যুজং ন জনা মিনন্তি মিত্রম্ ॥৮॥

89.9

প্র যে মিত্রং প্রার্যমণং দুরেবাঃ প্র সংগিরঃ প্র বরুণং মিনন্তি ।
ন্য১মিত্রেষু বধমিন্দ্র তুম্রং বৃষন্বৃষাণমরুষং শিশীহি ॥৯॥

89.10

ইন্দ্রো দিব ইন্দ্র ঈশে পৃথিব্যা ইন্দ্রো অপামিন্দ্র ইত্পর্বতানাম্ ।
ইন্দ্রো বৃধামিন্দ্র ইন্মেধিরাণামিন্দ্রঃ ক্ষেমে যোগে হব্য ইন্দ্রঃ ॥১০॥

89.11

প্রাক্তুভ্য ইন্দ্রঃ প্র বৃধো অহভ্যঃ প্রান্তরিক্ষাত্প্র সমুদ্রস্য ধাসেঃ ।
প্র বাতস্য প্রথসঃ প্র জ্মো অন্তাত্প্র সিন্ধুভ্যো রিরিচে প্র ক্ষিতিভ্যঃ ॥১১॥

89.12

প্র শোশুচত্যা উষসো ন কেতুরসিন্বা তে বর্ততামিন্দ্র হেতিঃ ।
অশ্মেব বিধ্য দিব আ সৃজানস্তপিষ্ঠেন হেষসা দ্রোঘমিত্রান্ ॥১২॥

89.13

অন্বহ মাসা অন্বিদ্বনান্যন্বোষধীরনু পর্বতাসঃ ।
অন্বিন্দ্রং রোদসী বাবশানে অন্বাপো অজিহত জায়মানম্ ॥১৩॥

89.14

কর্হি স্বিত্সা ত ইন্দ্র চেত্যাসদঘস্য যদ্ভিনদো রক্ষ এষৎ ।
মিত্রক্রুবো যচ্ছসনে ন গাবঃ পৃথিব্যা আপৃগমুয়া শয়ন্তে ॥১৪॥

89.15

শত্রূয়ন্তো অভি যে নস্ততস্রে মহি ব্রাধন্ত ওগণাস ইন্দ্র ।
অন্ধেনামিত্রাস্তমসা সচন্তাং সুজ্যোতিষো অক্তবস্তাঁ অভি ষ্যুঃ ॥১৫॥

89.16

পুরূণি হি ত্বা সবনা জনানাং ব্রহ্মাণি মন্দন্গৃণতামৃষীণাম্ ।
ইমামাঘোষন্নবসা সহূতিং তিরো বিশ্বাঁ অর্চতো যাহ্যর্বাঙ্ ॥১৬॥

89.17

এবা তে বয়মিন্দ্র ভুঞ্জতীনাং বিদ্যাম সুমতীনাং নবানাম্ ।
বিদ্যাম বস্তোরবসা গৃণন্তো বিশ্বামিত্রা উত ত ইন্দ্র নূনম্ ॥১৭॥

89.18

শুনং হুবেম মঘবানমিন্দ্রমস্মিন্ভরে নৃতমং বাজসাতৌ ।
শৃণ্বন্তমুগ্রমূতয়ে সমত্সু ঘ্নন্তং বৃত্রাণি সংজিতং ধনানাম্ ॥১৮॥