সূক্ত 88

88.1

১৯ আংগিরসো মূর্ধন্বান্ , বামদেব্যো বা। সূর্য-বৈশ্বানরোঽগ্নিঃ। ত্রিষ্টুপ্।

হবিষ্পান্তমজরং স্বর্বিদি দিবিস্পৃশ্যাহুতং জুষ্টমগ্নৌ ।
তস্য ভর্মণে ভুবনায় দেবা ধর্মণে কং স্বধয়া পপ্রথন্ত ॥১॥

গীর্ণং ভুবনং তমসাপগূল্হমাবিঃ স্বরভবজ্জাতে অগ্নৌ ।
তস্য দেবাঃ পৃথিবী দ্যৌরুতাপোঽরণয়ন্নোষধীঃ সখ্যে অস্য ॥২॥

দেবেভির্ন্বিষিতো যজ্ঞিয়েভিরগ্নিং স্তোষাণ্যজরং বৃহন্তম্ ।
যো ভানুনা পৃথিবীং দ্যামুতেমামাততান রোদসী অন্তরিক্ষম্ ॥৩॥

যো হোতাসীত্প্রথমো দেবজুষ্টো যং সমাঞ্জন্নাজ্যেনা বৃণানাঃ ।
স পতত্রীত্বরং স্থা জগদ্যচ্ছ্বাত্রমগ্নিরকৃণোজ্জাতবেদাঃ ॥৪॥

যজ্জাতবেদো ভুবনস্য মূর্ধন্নতিষ্ঠো অগ্নে সহ রোচনেন ।
তং ত্বাহেম মতিভির্গীর্ভিরুক্থৈঃ স যজ্ঞিয়ো অভবো রোদসিপ্রাঃ ॥৫॥

মূর্ধা ভুবো ভবতি নক্তমগ্নিস্ততঃ সূর্যো জায়তে প্রাতরুদ্যন্ ।
মায়ামূ তু যজ্ঞিয়ানামেতামপো যত্তূর্ণিশ্চরতি প্রজানন্ ॥৬॥

দৃশেন্যো যো মহিনা সমিদ্ধোঽরোচত দিবিয়োনির্বিভাবা ।
তস্মিন্নগ্নৌ সূক্তবাকেন দেবা হবির্বিশ্ব আজুহবুস্তনূপাঃ ॥৭॥

সূক্তবাকং প্রথমমাদিদগ্নিমাদিদ্ধবিরজনয়ন্ত দেবাঃ ।
স এষাং যজ্ঞো অভবত্তনূপাস্তং দ্যৌর্বেদ তং পৃথিবী তমাপঃ ॥৮॥

যং দেবাসোঽজনয়ন্তাগ্নিং যস্মিন্নাজুহবুর্ভুবনানি বিশ্বা ।
সো অর্চিষা পৃথিবীং দ্যামুতেমামৃজূয়মানো অতপন্মহিত্বা ॥৯॥

স্তোমেন হি দিবি দেবাসো অগ্নিমজীজনঞ্ছক্তিভী রোদসিপ্রাম্ ।
তমূ অকৃণ্বন্ত্রেধা ভুবে কং স ওষধীঃ পচতি বিশ্বরূপাঃ ॥১০॥

যদেদেনমদধুর্যজ্ঞিয়াসো দিবি দেবাঃ সূর্যমাদিতেয়ম্ ।
যদা চরিষ্ণূ মিথুনাবভূতামাদিত্প্রাপশ্যন্ভুবনানি বিশ্বা ॥১১॥

বিশ্বস্মা অগ্নিং ভুবনায় দেবা বৈশ্বানরং কেতুমহ্নামকৃণ্বন্ ।
আ যস্ততানোষসো বিভাতীরপো ঊর্ণোতি তমো অর্চিষা যন্ ॥১২॥

বৈশ্বানরং কবয়ো যজ্ঞিয়াসোঽগ্নিং দেবা অজনয়ন্নজুর্যম্ ।
নক্ষত্রং প্রত্নমমিনচ্চরিষ্ণু যক্ষস্যাধ্যক্ষং তবিষং বৃহন্তম্ ॥১৩॥

বৈশ্বানরং বিশ্বহা দীদিবাংসং মন্ত্রৈরগ্নিং কবিমচ্ছা বদামঃ ।
যো মহিম্না পরিবভূবোর্বী উতাবস্তাদুত দেবঃ পরস্তাৎ ॥১৪॥

দ্বে স্রুতী অশৃণবং পিতৄণামহং দেবানামুত মর্ত্যানাম্ ।
তাভ্যামিদং বিশ্বমেজত্সমেতি যদন্তরা পিতরং মাতরং চ ॥১৫॥

দ্বে সমীচী বিভৃতশ্চরন্তং শীর্ষতো জাতং মনসা বিমৃষ্টম্ ।
স প্রত্যঙ্বিশ্বা ভুবনানি তস্থাবপ্রয়ুচ্ছন্তরণির্ভ্রাজমানঃ ॥১৬॥

যত্রা বদেতে অবরঃ পরশ্চ যজ্ঞন্যোঃ কতরো নৌ বি বেদ ।
আ শেকুরিত্সধমাদং সখায়ো নক্ষন্ত যজ্ঞং ক ইদং বি বোচৎ ॥১৭॥

কত্যগ্নয়ঃ কতি সূর্যাসঃ কত্যুষাসঃ কত্যু স্বিদাপঃ ।
নোপস্পিজং বঃ পিতরো বদামি পৃচ্ছামি বঃ কবয়ো বিদ্মনে কম্ ॥১৮॥

যাবন্মাত্রমুষসো ন প্রতীকং সুপর্ণ্যো৩ বসতে মাতরিশ্বঃ ।
তাবদ্দধাত্যুপ যজ্ঞমায়ন্ব্রাহ্মণো হোতুরবরো নিষীদন্ ॥১৯॥