সূক্ত 85

85.1

৪৭ সাবিত্রী সূর্যা ঋষিকা। ১-৫ সোমঃ, ৬-১৬ সূর্যাবিবাহঃ, ১৭ দেবাঃ, ১৮ সোমার্কৌ, ১৯ চন্দ্রমাঃ, ২০-২৮ নৃণাং বিবাহমন্ত্রা আশীঃপ্রায়াঃ, ২৯-৩০ বধূবাসঃ সংস্পর্শনিন্দা, ৩১ দম্পত্যোর্যক্ষ্মনাশনং, ৩২-৪৭ সূর্যা সাবিত্রী। অনুষ্টুপ্ , ১৪,১৯-২১,২৩-২৪,২৬,৩৬-৩৭,৪৪ ত্রিষ্টুপ্, ১৮,২৭,৪৩ জগতী, ৩৪ উরোবৃহতী।

সত্যেনোত্তভিতা ভূমিঃ সূর্যেণোত্তভিতা দ্যৌঃ । ঋতেনাদিত্যাস্তিষ্ঠন্তি দিবি সোমো অধি শ্রিতঃ ॥১॥

85.2

সোমেনাদিত্যা বলিনঃ সোমেন পৃথিবী মহী । অথো নক্ষত্রাণামেষামুপস্থে সোম আহিতঃ ॥২॥

85.3

সোমং মন্যতে পপিবান্যত্সম্পিংষন্ত্যোষধিম্ । সোমং যং ব্রহ্মাণো বিদুর্ন তস্যাশ্নাতি কশ্চন ॥৩॥

85.4

আচ্ছদ্বিধানৈর্গুপিতো বার্হতৈঃ সোম রক্ষিতঃ । গ্রাব্ণামিচ্ছৃণ্বন্তিষ্ঠসি ন তে অশ্নাতি পার্থিবঃ ॥৪॥

85.5

যত্ত্বা দেব প্রপিবন্তি তত আ প্যায়সে পুনঃ । বায়ুঃ সোমস্য রক্ষিতা সমানাং মাস আকৃতিঃ ॥৫॥

85.6

রৈভ্যাসীদনুদেয়ী নারাশংসী ন্যোচনী । সূর্যায়া ভদ্রমিদ্বাসো গাথয়ৈতি পরিষ্কৃতম্ ॥৬॥

85.7

চিত্তিরা উপবর্হণং চক্ষুরা অভ্যঞ্জনম্ । দ্যৌর্ভূমিঃ কোশ আসীদ্যদয়াত্সূর্যা পতিম্ ॥৭॥

85.8

স্তোমা আসন্প্রতিধয়ঃ কুরীরং ছন্দ ওপশঃ । সূর্যায়া অশ্বিনা বরাঽগ্নিরাসীত্পুরোগবঃ ॥৮॥

85.9

সোমো বধূয়ুরভবদশ্বিনাস্তামুভা বরা । সূর্যাং যত্পত্যে শংসন্তীং মনসা সবিতাদদাৎ ॥৯॥

85.10

মনো অস্যা অন আসীদ্দ্যৌরাসীদুত চ্ছদিঃ । শুক্রাবনড্বাহাবাস্তাং যদয়াত্সূর্যা গৃহম্ ॥১০॥

85.11

ঋক্সামাভ্যামভিহিতৌ গাবৌ তে সামনাবিতঃ । শ্রোত্রং তে চক্রে আস্তাং দিবি পন্থাশ্চরাচারঃ ॥১১॥

85.12

শুচী তে চক্রে যাত্যা ব্যানো অক্ষ আহতঃ । অনো মনস্ময়ং সূর্যাঽঽরোহত্প্রয়তী পতিম্ ॥১২॥

85.13

সূর্যায়া বহতুঃ প্রাগাত্সবিতা যমবাসৃজৎ । অঘাসু হন্যন্তে গাবোঽর্জুন্যোঃ পর্যুহ্যতে ॥১৩॥

85.14

যদশ্বিনা পৃচ্ছমানাবয়াতং ত্রিচক্রেণ বহতুং সূর্যায়াঃ ।
বিশ্বে দেবা অনু তদ্বামজানন্পুত্রঃ পিতরাববৃণীত পূষা ॥১৪॥

85.15

যদয়াতং শুভস্পতী বরেয়ং সূর্যামুপ । ক্বৈকং চক্রং বামাসীত্ক্ব দেষ্ট্রায় তস্থথুঃ ॥১৫॥

85.16

দ্বে তে চক্রে সূর্যে ব্রহ্মাণ ঋতুথা বিদুঃ । অথৈকং চক্রং যদ্গুহা তদদ্ধাতয় ইদ্বিদুঃ ॥১৬॥

85.17

সূর্যায়ৈ দেবেভ্যো মিত্রায় বরুণায় চ । যে ভূতস্য প্রচেতস ইদং তেভ্যোঽকরং নমঃ ॥১৭॥

85.18

পূর্বাপরং চরতো মায়য়ৈতৌ শিশূ ক্রীলন্তৌ পরি যাতো অধ্বরম্ ।
বিশ্বান্যন্যো ভুবনাভিচষ্ট ঋতূঁরন্যো বিদধজ্জায়তে পুনঃ ॥১৮॥

85.19

নবোনবো ভবতি জায়মানোঽহ্নাং কেতুরুষসামেত্যগ্রম্ ।
ভাগং দেবেভ্যো বি দধাত্যায়ন্প্র চন্দ্রমাস্তিরতে দীর্ঘমায়ুঃ ॥১৯॥

85.20

সুকিংশুকং শল্মলিং বিশ্বরূপং হিরণ্যবর্ণং সুবৃতং সুচক্রম্ ।
আ রোহ সূর্যে অমৃতস্য লোকং স্যোনং পত্যে বহতুং কৃণুষ্ব ॥২০॥

85.21

উদীর্ষ্বাতঃ পতিবতী হ্যে৩ষা বিশ্বাবসুং নমসা গীর্ভিরীলে ।
অন্যামিচ্ছ পিতৃষদং ব্যক্তাং স তে ভাগো জনুষা তস্য বিদ্ধি ॥২১॥

85.22

উদীর্ষ্বাতো বিশ্বাবসো নমসেলা মহে ত্বা । অন্যামিচ্ছ প্রফর্ব্যং১ সং জায়াং পত্যা সৃজ ॥২২॥

85.23

অনৃক্ষরা ঋজবঃ সন্তু পন্থা যেভিঃ সখায়ো যন্তি নো বরেয়ম্ ।
সমর্যমা সং ভগো নো নিনীয়াত্সং জাস্পত্যং সুয়মমস্তু দেবাঃ ॥২৩॥

85.24

প্র ত্বা মুঞ্চামি বরুণস্য পাশাদ্যেন ত্বাবধ্নাত্সবিতা সুশেবঃ ।
ঋতস্য যোনৌ সুকৃতস্য লোকেঽরিষ্টাং ত্বা সহ পত্যা দধামি ॥২৪॥

85.25

প্রেতো মুঞ্চামি নামুতঃ সুবদ্ধামমুতস্করম্ । যথেয়মিন্দ্র মীঢ্বঃ সুপুত্রা সুভগাসতি ॥২৫॥

85.26

পূষা ত্বেতো নয়তু হস্তগৃহ্যাঽশ্বিনা ত্বা প্র বহতাং রথেন ।
গৃহান্গচ্ছ গৃহপত্নী যথাসো বশিনী ত্বং বিদথমা বদাসি ॥২৬॥

85.27

ইহ প্রিয়ং প্রজয়া তে সমৃধ্যতামস্মিন্গৃহে গার্হপত্যায় জাগৃহি ।
এনা পত্যা তন্বং১ সং সৃজস্বাধা জিব্রী বিদথমা বদাথঃ ॥২৭॥

85.28

নীললোহিতং ভবতি কৃত্যাসক্তির্ব্যজ্যতে । এধন্তে অস্যা জ্ঞাতয়ঃ পতির্বন্ধেষু বধ্যতে ॥২৮॥

85.29

পরা দেহি শামুল্যং ব্রহ্মভ্যো বি ভজা বসু । কৃত্যৈষা পদ্বতী ভূত্ব্যা জায়া বিশতে পতিম্ ॥২৯॥

85.30

অশ্রীরা তনূর্ভবতি রুশতী পাপয়ামুয়া । পতির্যদ্বধ্বো৩ বাসসা স্বমঙ্গমভিধিত্সতে ॥৩০॥

85.31

যে বধ্বশ্চন্দ্রং বহতুং যক্ষ্মা যন্তি জনাদনু । পুনস্তান্যজ্ঞিয়া দেবা নয়ন্তু যত আগতাঃ ॥৩॥

85.32

মা বিদন্পরিপন্থিনো য আসীদন্তি দম্পতী । সুগেভির্দুর্গমতীতামপ দ্রান্ত্বরাতয়ঃ ॥৩২॥

85.33

সুমঙ্গলীরিয়ং বধূরিমাং সমেত পশ্যত । সৌভাগ্যমস্যৈ দত্ত্বায়াঽথাস্তং বি পরেতন ॥৩৩॥

85.34

তৃষ্টমেতত্কটুকমেতদপাষ্ঠবদ্বিষবন্নৈতদত্তবে । সূর্যাং যো ব্রহ্মা বিদ্যাত্স ইদ্বাধূয়মর্হতি ॥৩৪॥

85.35

আশসনং বিশসনমথো অধিবিকর্তনম্ । সূর্যায়াঃ পশ্য রূপাণি তানি ব্রহ্মা তু শুন্ধতি ॥৩৫॥

85.36

গৃভ্ণামি তে সৌভগত্বায় হস্তং ময়া পত্যা জরদষ্টির্যথাসঃ ।
ভগো অর্যমা সবিতা পুরংধির্মহ্যং ত্বাদুর্গার্হপত্যায় দেবাঃ ॥৩৬॥

85.37

তাং পূষঞ্ছিবতমামেরয়স্ব যস্যাং বীজং মনুষ্যা৩ বপন্তি ।
যা ন ঊরূ উশতী বিশ্রয়াতে যস্যামুশন্তঃ প্রহরাম শেপম্ ॥৩৭॥

85.38

তুভ্যমগ্রে পর্যবহন্ত্সূর্যাং বহতুনা সহ । পুনঃ পতিভ্যো জায়াং দা অগ্নে প্রজয়া সহ ॥৩৮॥

85.39

পুনঃ পত্নীমগ্নিরদাদায়ুষা সহ বর্চসা । দীর্ঘায়ুরস্যা যঃ পতির্জীবাতি শরদঃ শতম্ ॥৩৯॥

85.40

সোমঃ প্রথমো বিবিদে গন্ধর্বো বিবিদ উত্তরঃ । তৃতীয়ো অগ্নিষ্টে পতিস্তুরীয়স্তে মনুষ্যজাঃ ॥৪০॥

85.41

সোমো দদদ্গন্ধর্বায় গন্ধর্বো দদদগ্নয়ে । রয়িং চ পুত্রাঁশ্চাদাদগ্নির্মহ্যমথো ইমাম্ ॥৪১॥

85.42

ইহৈব স্তং মা বি যৌষ্টং বিশ্বমায়ুর্ব্যশ্নুতম্ । ক্রীলন্তৌ পুত্রৈর্নপ্তৃভির্মোদমানৌ স্বে গৃহে ॥৪২॥

85.43

আ নঃ প্রজাং জনয়তু প্রজাপতিরাজরসায় সমনক্ত্বর্যমা ।
অদুর্মঙ্গলীঃ পতিলোকমা বিশ শং নো ভব দ্বিপদে শং চতুষ্পদে ॥৪৩॥

85.44

অঘোরচক্ষুরপতিঘ্ন্যেধি শিবা পশুভ্যঃ সুমনাঃ সুবর্চাঃ ।
বীরসূর্দেবকামা স্যোনা শং নো ভব দ্বিপদে শং চতুষ্পদে ॥৪৪॥

85.45

ইমাং ত্বমিন্দ্র মীঢ্বঃ সুপুত্রাং সুভগাং কৃণু । দশাস্যাং পুত্রানা ধেহি পতিমেকাদশং কৃধি ॥৪৫॥

85.46

সম্রাজ্ঞী শ্বশুরে ভব সম্রাজ্ঞী শ্বশ্র্বাং ভব । ননান্দরি সম্রাজ্ঞী ভব সম্রাজ্ঞী অধি দেবৃষু ॥৪৬॥

85.47

সমঞ্জন্তু বিশ্বে দেবাঃ সমাপো হৃদয়ানি নৌ । সং মাতরিশ্বা সং ধাতা সমু দেষ্ট্রী দধাতু নৌ ॥৪৭॥