সূক্ত 79

79.1

৭ সৌচীকোঽগ্নির্বৈশ্বানরো বা, সপ্তির্বাজংভরো বা। অগ্নিঃ। ত্রিষ্টুপ্।

অপশ্যমস্য মহতো মহিত্বমমর্ত্যস্য মর্ত্যাসু বিক্ষু ।
নানা হনূ বিভৃতে সং ভরেতে অসিন্বতী বপ্সতী ভূর্যত্তঃ ॥১॥

79.2

গুহা শিরো নিহিতমৃধগক্ষী অসিন্বন্নত্তি জিহ্বয়া বনানি ।
অত্রাণ্যস্মৈ পড্ভিঃ সং ভরন্ত্যুত্তানহস্তা নমসাধি বিক্ষু ॥২॥

79.3

প্র মাতুঃ প্রতরং গুহ্যমিচ্ছন্কুমারো ন বীরুধঃ সর্পদুর্বীঃ ।
সসং ন পক্বমবিদচ্ছুচন্তং রিরিহ্বাংসং রিপ উপস্থে অন্তঃ ॥৩॥

79.4

তদ্বামৃতং রোদসী প্র ব্রবীমি জায়মানো মাতরা গর্ভো অত্তি ।
নাহং দেবস্য মর্ত্যশ্চিকেতাঽগ্নিরঙ্গ বিচেতাঃ স প্রচেতাঃ ॥৪॥

79.5

যো অস্মা অন্নং তৃষ্বা৩দধাত্যাজ্যৈর্ঘৃতৈর্জুহোতি পুষ্যতি ।
তস্মৈ সহস্রমক্ষভির্বি চক্ষেঽগ্নে বিশ্বতঃ প্রত্যঙ্ঙসি ত্বম্ ॥৫॥

79.6

কিং দেবেষু ত্যজ এনশ্চকর্থাঽগ্নে পৃচ্ছামি নু ত্বামবিদ্বান্ ।
অক্রীলন্ক্রীলন্হরিরত্তবেঽদন্বি পর্বশশ্চকর্ত গামিবাসিঃ ॥৬॥

79.7

বিষূচো অশ্বান্যুয়ুজে বনেজা ঋজীতিভী রশনাভির্গৃভীতান্ ।
চক্ষদে মিত্রো বসুভিঃ সুজাতঃ সমানৃধে পর্বভির্বাবৃধানঃ ॥৭॥