সূক্ত 75

75.1

৯ সিন্ধুক্ষিৎ প্রৈয়মেধঃ। নদ্যঃ। জগতী।

প্র সু ব আপো মহিমানমুত্তমং কারুর্বোচাতি সদনে বিবস্বতঃ ।
প্র সপ্তসপ্ত ত্রেধা হি চক্রমুঃ প্র সৃত্বরীণামতি সিন্ধুরোজসা ॥১॥

প্র তেঽরদদ্বরুণো যাতবে পথঃ সিন্ধো যদ্বাজাঁ অভ্যদ্রবস্ত্বম্ ।
ভূম্যা অধি প্রবতা যাসি সানুনা যদেষামগ্রং জগতামিরজ্যসি ॥২॥

দিবি স্বনো যততে ভূম্যোপর্যনন্তং শুষ্মমুদিয়র্তি ভানুনা ।
অভ্রাদিব প্র স্তনয়ন্তি বৃষ্টয়ঃ সিন্ধুর্যদেতি বৃষভো ন রোরুবৎ ॥৩॥

অভি ত্বা সিন্ধো শিশুমিন্ন মাতরো বাশ্রা অর্ষন্তি পয়সেব ধেনবঃ ।
রাজেব যুধ্বা নয়সি ত্বমিত্সিচৌ যদাসামগ্রং প্রবতামিনক্ষসি ॥৪॥

ইমং মে গঙ্গে যমুনে সরস্বতি শুতুদ্রি স্তোমং সচতা পরুষ্ণ্যা ।
অসিক্ন্যা মরুদ্বৃধে বিতস্তয়াঽঽর্জীকীয়ে শৃণুহ্যা সুষোময়া ॥৫॥

তৃষ্টাময়া প্রথমং যাতবে সজূঃ সুসর্ত্বা রসয়া শ্বেত্যা ত্যা ।
ত্বং সিন্ধো কুভয়া গোমতীং ক্রুমুং মেহত্ন্বা সরথং যাভিরীয়সে ॥৬॥

ঋজীত্যেনী রুশতী মহিত্বা পরি জ্রয়াংসি ভরতে রজাংসি ।
অদব্ধা সিন্ধুরপসামপস্তমাঽশ্বা ন চিত্রা বপুষীব দর্শতা ॥৭॥

স্বশ্বা সিন্ধুঃ সুরথা সুবাসা হিরণ্যয়ী সুকৃতা বাজিনীবতী ।
ঊর্ণাবতী যুবতিঃ সীলমাবত্যুতাধি বস্তে সুভগা মধুবৃধম্ ॥৮॥

সুখং রথং যুয়ুজে সিন্ধুরশ্বিনং তেন বাজং সনিষদস্মিন্নাজৌ ।
মহান্হ্যস্য মহিমা পনস্যতেঽদব্ধস্য স্বয়শসো বিরপ্শিনঃ ॥৯॥