সূক্ত 66

66.1

১৫ বসুকর্ণো বাসুক্রঃ। বিশ্বেদেবাঃ। জগতী, ১৫ ত্রিষ্টুপ্।

দেবান্হুবে বৃহচ্ছ্রবসঃ স্বস্তয়ে জ্যোতিষ্কৃতো অধ্বরস্য প্রচেতসঃ ।
যে বাবৃধুঃ প্রতরং বিশ্ববেদস ইন্দ্রজ্যেষ্ঠাসো অমৃতা ঋতাবৃধঃ ॥১॥

ইন্দ্রপ্রসূতা বরুণপ্রশিষ্টা যে সূর্যস্য জ্যোতিষো ভাগমানশুঃ ।
মরুদ্গণে বৃজনে মন্ম ধীমহি মাঘোনে যজ্ঞং জনয়ন্ত সূরয়ঃ ॥২॥

ইন্দ্রো বসুভিঃ পরি পাতু নো গয়মাদিত্যৈর্নো অদিতিঃ শর্ম যচ্ছতু ।
রুদ্রো রুদ্রেভির্দেবো মৃলয়াতি নস্ত্বষ্টা নো গ্নাভিঃ সুবিতায় জিন্বতু ॥৩॥

অদিতির্দ্যাবাপৃথিবী ঋতং মহদিন্দ্রাবিষ্ণূ মরুতঃ স্বর্বৃহৎ ।
দেবাঁ আদিত্যাঁ অবসে হবামহে বসূন্রুদ্রান্ত্সবিতারং সুদংসসম্ ॥৪॥

সরস্বান্ধীভির্বরুণো ধৃতব্রতঃ পূষা বিষ্ণুর্মহিমা বায়ুরশ্বিনা ।
ব্রহ্মকৃতো অমৃতা বিশ্ববেদসঃ শর্ম নো যংসন্ত্রিবরূথমংহসঃ ॥৫॥

বৃষা যজ্ঞো বৃষণঃ সন্তু যজ্ঞিয়া বৃষণো দেবা বৃষণো হবিষ্কৃতঃ ।
বৃষণা দ্যাবাপৃথিবী ঋতাবরী বৃষা পর্জন্যো বৃষণো বৃষস্তুভঃ ॥৬॥

অগ্নীষোমা বৃষণা বাজসাতয়ে পুরুপ্রশস্তা বৃষণা উপ ব্রুবে ।
যাবীজিরে বৃষণো দেবয়জ্যয়া তা নঃ শর্ম ত্রিবরূথং বি যংসতঃ ॥৭॥

ধৃতব্রতাঃ ক্ষত্রিয়া যজ্ঞনিষ্কৃতো বৃহদ্দিবা অধ্বরাণামভিশ্রিয়ঃ ।
অগ্নিহোতার ঋতসাপো অদ্রুহোঽপো অসৃজন্ননু বৃত্রতূর্যে ॥৮॥

দ্যাবাপৃথিবী জনয়ন্নভি ব্রতাঽঽপ ওষধীর্বনিনানি যজ্ঞিয়া ।
অন্তরিক্ষং স্ব১রা পপ্রুরূতয়ে বশং দেবাসস্তন্বী৩ নি মামৃজুঃ ॥৯॥

ধর্তারো দিব ঋভবঃ সুহস্তা বাতাপর্জন্যা মহিষস্য তন্যতোঃ ।
আপ ওষধীঃ প্র তিরন্তু নো গিরো ভগো রাতির্বাজিনো যন্তু মে হবম্ ॥১০॥

সমুদ্রঃ সিন্ধূ রজো অন্তরিক্ষমজ একপাত্তনয়িত্নুরর্ণবঃ ।
অহির্বুধ্ন্যঃ শৃণবদ্বচাংসি মে বিশ্বে দেবাস উত সূরয়ো মম ॥১১॥

স্যাম বো মনবো দেববীতয়ে প্রাঞ্চং নো যজ্ঞং প্র ণয়ত সাধুয়া ।
আদিত্যা রুদ্রা বসবঃ সুদানব ইমা ব্রহ্ম শস্যমানানি জিন্বত ॥১২॥

দৈব্যা হোতারা প্রথমা পুরোহিত ঋতস্য পন্থামন্বেমি সাধুয়া ।
ক্ষেত্রস্য পতিং প্রতিবেশমীমহে বিশ্বান্দেবাঁ অমৃতাঁ অপ্রয়ুচ্ছতঃ ॥১৩॥

বসিষ্ঠাসঃ পিতৃবদ্বাচমক্রত দেবাঁ ঈলানা ঋষিবত্স্বস্তয়ে ।
প্রীতা ইব জ্ঞাতয়ঃ কামমেত্যাঽস্মে দেবাসোঽব ধূনুতা বসু ॥১৪॥

দেবান্বসিষ্ঠো অমৃতান্ববন্দে যে বিশ্বা ভুবনাভি প্রতস্থুঃ ।
তে নো রাসন্তামুরুগায়মদ্য যূয়ং পাত স্বস্তিভিঃ সদা নঃ ॥১৫॥