সূক্ত 65

65.1

১৫ বসুকর্ণো বাসুক্রঃ। বিশ্বেদেবাঃ। জগতী, ১৫ ত্রিষ্টুপ্।

অগ্নিরিন্দ্রো বরুণো মিত্রো অর্যমা বায়ুঃ পূষা সরস্বতী সজোষসঃ ।
আদিত্যা বিষ্ণুর্মরুতঃ স্বর্বৃহত্সোমো রুদ্রো অদিতির্ব্রহ্মণস্পতিঃ ॥১॥

ইন্দ্রাগ্নী বৃত্রহত্যেষু সত্পতী মিথো হিন্বানা তন্বা৩ সমোকসা ।
অন্তরিক্ষং মহ্যা পপ্রুরোজসা সোমো ঘৃতশ্রীর্মহিমানমীরয়ন্ ॥২॥

তেষাং হি মহ্না মহতামনর্বণাং স্তোমাঁ ইয়র্ম্যৃতজ্ঞা ঋতাবৃধাম্ ।
যে অপ্সবমর্ণবং চিত্ররাধসস্তে নো রাসন্তাং মহয়ে সুমিত্র্যাঃ ॥৩॥

স্বর্ণরমন্তরিক্ষাণি রোচনা দ্যাবাভূমী পৃথিবীং স্কম্ভুরোজসা ।
পৃক্ষা ইব মহয়ন্তঃ সুরাতয়ো দেবাঃ স্তবন্তে মনুষায় সূরয়ঃ ॥৪॥

মিত্রায় শিক্ষ বরুণায় দাশুষে যা সম্রাজা মনসা ন প্রয়ুচ্ছতঃ ।
যয়োর্ধাম ধর্মণা রোচতে বৃহদ্যয়োরুভে রোদসী নাধসী বৃতৌ ॥৫॥

যা গৌর্বর্তনিং পর্যেতি নিষ্কৃতং পয়ো দুহানা ব্রতনীরবারতঃ ।
সা প্রব্রুবাণা বরুণায় দাশুষে দেবেভ্যো দাশদ্ধবিষা বিবস্বতে ॥৬॥

দিবক্ষসো অগ্নিজিহ্বা ঋতাবৃধ ঋতস্য যোনিং বিমৃশন্ত আসতে ।
দ্যাং স্কভিত্ব্য১প আ চক্রুরোজসা যজ্ঞং জনিত্বী তন্বী৩ নি মামৃজুঃ ॥৭॥

পরিক্ষিতা পিতরা পূর্বজাবরী ঋতস্য যোনা ক্ষয়তঃ সমোকসা ।
দ্যাবাপৃথিবী বরুণায় সব্রতে ঘৃতবত্পয়ো মহিষায় পিন্বতঃ ॥৮॥

পর্জন্যাবাতা বৃষভা পুরীষিণেন্দ্রবায়ূ বরুণো মিত্রো অর্যমা ।
দেবাঁ আদিত্যাঁ অদিতিং হবামহে যে পার্থিবাসো দিব্যাসো অপ্সু যে ॥৯॥

ত্বষ্টারং বায়ুমৃভবো য ওহতে দৈব্যা হোতারা উষসং স্বস্তয়ে ।
বৃহস্পতিং বৃত্রখাদং সুমেধসমিন্দ্রিয়ং সোমং ধনসা উ ঈমহে ॥১০॥

ব্রহ্ম গামশ্বং জনয়ন্ত ওষধীর্বনস্পতীন্পৃথিবীং পর্বতাঁ অপঃ ।
সূর্যং দিবি রোহয়ন্তঃ সুদানব আর্যা ব্রতা বিসৃজন্তো অধি ক্ষমি ॥১১॥

ভুজ্যুমংহসঃ পিপৃথো নিরশ্বিনা শ্যাবং পুত্রং বধ্রিমত্যা অজিন্বতম্ ।
কমদ্যুবং বিমদায়োহথুর্যুবং বিষ্ণাপ্বং১ বিশ্বকায়াব সৃজথঃ ॥১২॥

পাবীরবী তন্যতুরেকপাদজো দিবো ধর্তা সিন্ধুরাপঃ সমুদ্রিয়ঃ ।
বিশ্বে দেবাসঃ শৃণবন্বচাংসি মে সরস্বতী সহ ধীভিঃ পুরংধ্যা ॥১৩॥

বিশ্বে দেবাঃ সহ ধীভিঃ পুরংধ্যা মনোর্যজত্রা অমৃতা ঋতজ্ঞাঃ ।
রাতিষাচো অভিষাচঃ স্বর্বিদঃ স্ব১র্গিরো ব্রহ্ম সূক্তং জুষেরত ॥১৪॥

দেবান্বসিষ্ঠো অমৃতান্ববন্দে যে বিশ্বা ভুবনাভি প্রতস্থুঃ ।
তে নো রাসন্তামুরুগায়মদ্য যূয়ং পাত স্বস্তিভিঃ সদা নঃ ॥১৫॥