সূক্ত 64

64.1

১৭ গয়ঃ প্লাতঃ। বিশ্বে দেবাঃ।জগতী, ১২,১৬,১৭ ত্রিষ্টুপ্।

কথা দেবানাং কতমস্য যামনি সুমন্তু নাম শৃণ্বতাং মনামহে ।
কো মৃলাতি কতমো নো ময়স্করত্কতম ঊতী অভ্যা ববর্ততি ॥১॥

ক্রতূয়ন্তি ক্রতবো হৃত্সু ধীতয়ো বেনন্তি বেনাঃ পতয়ন্ত্যা দিশঃ ।
ন মর্ডিতা বিদ্যতে অন্য এভ্যো দেবেষু মে অধি কামা অয়ংসত ॥২॥

নরা বা শংসং পূষণমগোহ্যমগ্নিং দেবেদ্ধমভ্যর্চসে গিরা ।
সূর্যামাসা চন্দ্রমসা যমং দিবি ত্রিতং বাতমুষসমক্তুমশ্বিনা ॥৩॥

কথা কবিস্তুবীরবান্কয়া গিরা বৃহস্পতির্বাবৃধতে সুবৃক্তিভিঃ ।
অজ একপাত্সুহবেভিৠক্বভিরহিঃ শৃণোতু বুধ্ন্যো৩ হবীমনি ॥৪॥

দক্ষস্য বাদিতে জন্মনি ব্রতে রাজানা মিত্রাবরুণা বিবাসসি ।
অতূর্তপন্থাঃ পুরুরথো অর্যমা সপ্তহোতা বিষুরূপেষু জন্মসু ॥৫॥

তে নো অর্বন্তো হবনশ্রুতো হবং বিশ্বে শৃণ্বন্তু বাজিনো মিতদ্রবঃ ।
সহস্রসা মেধসাতাবিব ত্মনা মহো যে ধনং সমিথেষু জভ্রিরে ॥৬॥

প্র বো বায়ুং রথয়ুজং পুরংধিং স্তোমৈঃ কৃণুধ্বং সখ্যায় পূষণম্ ।
তে হি দেবস্য সবিতুঃ সবীমনি ক্রতুং সচন্তে সচিতঃ সচেতসঃ ॥৭॥

ত্রিঃ সপ্ত সস্রা নদ্যো মহীরপো বনস্পতীন্পর্বতাঁ অগ্নিমূতয়ে ।
কৃশানুমস্তৄন্তিষ্যং সধস্থ আ রুদ্রং রুদ্রেষু রুদ্রিয়ং হবামহে ॥৮॥

সরস্বতী সরয়ুঃ সিন্ধুরূর্মিভির্মহো মহীরবসা যন্তু বক্ষণীঃ ।
দেবীরাপো মাতরঃ সূদয়িত্ন্বো ঘৃতবত্পয়ো মধুমন্নো অর্চত ॥৯॥

উত মাতা বৃহদ্দিবা শৃণোতু নস্ত্বষ্টা দেবেভির্জনিভিঃ পিতা বচঃ ।
ঋভুক্ষা বাজো রথস্পতির্ভগো রণ্বঃ শংসঃ শশমানস্য পাতু নঃ ॥১০॥

রণ্বঃ সংদৃষ্টৌ পিতুমাঁ ইব ক্ষয়ো ভদ্রা রুদ্রাণাং মরুতামুপস্তুতিঃ ।
গোভিঃ ষ্যাম যশসো জনেষ্বা সদা দেবাস ইলয়া সচেমহি ॥১১॥

যাং মে ধিয়ং মরুত ইন্দ্র দেবা অদদাত বরুণ মিত্র যূয়ম্ ।
তাং পীপয়ত পয়সেব ধেনুং কুবিদ্গিরো অধি রথে বহাথ ॥১২॥

কুবিদঙ্গ প্রতি যথা চিদস্য নঃ সজাত্যস্য মরুতো বুবোধথ ।
নাভা যত্র প্রথমং সংনসামহে তত্র জামিত্বমদিতির্দধাতু নঃ ॥১৩॥

তে হি দ্যাবাপৃথিবী মাতরা মহী দেবী দেবাঞ্জন্মনা যজ্ঞিয়ে ইতঃ ।
উভে বিভৃত উভয়ং ভরীমভিঃ পুরূ রেতাংসি পিতৃভিশ্চ সিঞ্চতঃ ॥১৪॥

বি ষা হোত্রা বিশ্বমশ্নোতি বার্যং বৃহস্পতিররমতিঃ পনীয়সী ।
গ্রাবা যত্র মধুষুদুচ্যতে বৃহদবীবশন্ত মতিভির্মনীষিণঃ ॥১৫॥

এবা কবিস্তুবীরবাঁ ঋতজ্ঞা দ্রবিণস্যুর্দ্রবিণসশ্চকানঃ ।
উক্থেভিরত্র মতিভিশ্চ বিপ্রোঽপীপয়দ্গয়ো দিব্যানি জন্ম ॥১৬॥

এবা প্লতেঃ সূনুরবীবৃধদ্বো বিশ্ব আদিত্যা অদিতে মনীষী ।
ঈশানাসো নরো অমর্ত্যেনাস্তাবি জনো দিব্যো গয়েন ॥১৭॥