Sukta 64

64.1

17 gayah platah, vishve devah, jagati, 12, 16, 17 trishtup

क॒था दे॒वानां॑ कत॒मस्य॒ याम॑नि सु॒मन्तु॒ नाम॑ शृण्व॒तां म॑नामहे ।
को मृ॑ळाति कत॒मो नो॒ मय॑स्करत्कत॒म ऊ॒ती अ॒भ्या व॑वर्तति ॥१॥

Katha devanam katamasya yamani sumantu nama shrinvatam manamahe
Ko mrilati katamo no mayaskaratkatama uti abhya vavartati

64.2

क्र॒तू॒यन्ति॒ क्रत॑वो हृ॒त्सु धी॒तयो॒ वेन॑न्ति वे॒नाः प॒तय॒न्त्या दिश॑ः ।
न म॑र्डि॒ता वि॑द्यते अ॒न्य ए॑भ्यो दे॒वेषु॑ मे॒ अधि॒ कामा॑ अयंसत ॥२॥

Kratuyanti kratavo hritsu dhitayo venanti venah patayantya dishah
Na mardita vidyate anya ebhyo deveshu me adhi kama ayansata

64.3

नरा॑ वा॒ शंसं॑ पू॒षण॒मगो॑ह्यम॒ग्निं दे॒वेद्ध॑म॒भ्य॑र्चसे गि॒रा ।
सूर्या॒मासा॑ च॒न्द्रम॑सा य॒मं दि॒वि त्रि॒तं वात॑मु॒षस॑म॒क्तुम॒श्विना॑ ॥३॥

Nara va shansam pushanamagohyamagnim deveddhamabhyarchase gira
Suryamasa chandramasa yamam divi tritam vatamushasamaktumashvina

64.4

क॒था क॒विस्तु॑वी॒रवा॒न्कया॑ गि॒रा बृह॒स्पति॑र्वावृधते सुवृ॒क्तिभि॑ः ।
अ॒ज एक॑पात्सु॒हवे॑भि॒ॠक्व॑भि॒रहि॑ः शृणोतु बु॒ध्न्यो॒३ हवी॑मनि ॥४॥

Katha kavistuviravankaya gira brihaspatirvavridhate suvriktibhih
Aja ekapatsuhavebhirikvabhirahih shrinotu budhnyo3 havimani

64.5

दक्ष॑स्य वादिते॒ जन्म॑नि व्र॒ते राजा॑ना मि॒त्रावरु॒णा वि॑वाससि ।
अतू॑र्तपन्थाः पुरु॒रथो॑ अर्य॒मा स॒प्तहो॑ता॒ विषु॑रूपेषु॒ जन्म॑सु ॥५॥

Dakshasya vadite janmani vrate rajana mitravaruna vivasasi
Aturtapanthah pururatho aryama saptahota vishurupeshu janmasu

64.6

ते नो॒ अर्व॑न्तो हवन॒श्रुतो॒ हवं॒ विश्वे॑ शृण्वन्तु वा॒जिनो॑ मि॒तद्र॑वः ।
स॒ह॒स्र॒सा मे॒धसा॑ताविव॒ त्मना॑ म॒हो ये धनं॑ समि॒थेषु॑ जभ्रि॒रे ॥६॥

Te no arvanto havanashruto havam vishve shrinvantu vajino mitadravah
Sahasrasa medhasataviva tmana maho ye dhanam samitheshu jabhrire

64.7

प्र वो॑ वा॒युं र॑थ॒युजं॒ पुरं॑धिं॒ स्तोमै॑ः कृणुध्वं स॒ख्याय॑ पू॒षण॑म् ।
ते हि दे॒वस्य॑ सवि॒तुः सवी॑मनि॒ क्रतुं॒ सच॑न्ते स॒चित॒ः सचे॑तसः ॥७॥

Pra vo vayum rathayujam purandhim stomaih krinudhvam sakhyaya pushanam
Te hi devasya savituh savimani kratum sachante sachitah sachetasah

64.8

त्रिः स॒प्त स॒स्रा न॒द्यो॑ म॒हीर॒पो वन॒स्पती॒न्पर्व॑ताँ अ॒ग्निमू॒तये॑ ।
कृ॒शानु॒मस्तॄ॑न्ति॒ष्यं॑ स॒धस्थ॒ आ रु॒द्रं रु॒द्रेषु॑ रु॒द्रियं॑ हवामहे ॥८॥

Trih sapta sasra nadyo mahirapo vanaspatinparvatam agnimutaye
Krishanumastrintishyam sadhastha a rudram rudreshu rudriyam havamahe

64.9

सर॑स्वती स॒रयु॒ः सिन्धु॑रू॒र्मिभि॑र्म॒हो म॒हीरव॒सा य॑न्तु॒ वक्ष॑णीः ।
दे॒वीरापो॑ मा॒तर॑ः सूदयि॒त्न्वो॑ घृ॒तव॒त्पयो॒ मधु॑मन्नो अर्चत ॥९॥

Sarasvati sarayuh sindhururmibhirmaho mahiravasa yantu vakshanih
Devirapo matarah sudayitnvo ghritavatpayo madhumanno archata

64.10

उ॒त मा॒ता बृ॑हद्दि॒वा शृ॑णोतु न॒स्त्वष्टा॑ दे॒वेभि॒र्जनि॑भिः पि॒ता वच॑ः ।
ऋ॒भु॒क्षा वाजो॒ रथ॒स्पति॒र्भगो॑ र॒ण्वः शंस॑ः शशमा॒नस्य॑ पातु नः ॥१०॥

Uta mata brihaddiva shrinotu nastvashta devebhirjanibhih pita vachah
Ribhuksha vajo rathaspatirbhago ranvah shansah shashamanasya patu nah

64.11

र॒ण्वः संदृ॑ष्टौ पितु॒माँ इ॑व॒ क्षयो॑ भ॒द्रा रु॒द्राणां॑ म॒रुता॒मुप॑स्तुतिः ।
गोभि॑ः ष्याम य॒शसो॒ जने॒ष्वा सदा॑ देवास॒ इळ॑या सचेमहि ॥११॥

Ranvah sandrishtau pitumam iva kshayo bhadra rudranam marutamupastutih
Gobhih shyama yashaso janeshva sada devasa ilaya sachemahi

64.12

यां मे॒ धियं॒ मरु॑त॒ इन्द्र॒ देवा॒ अद॑दात वरुण मित्र यू॒यम् ।
तां पी॑पयत॒ पय॑सेव धे॒नुं कु॒विद्गिरो॒ अधि॒ रथे॒ वहा॑थ ॥१२॥

Yam me dhiyam maruta indra deva adadata varuna mitra yuyam
Tam pipayata payaseva dhenum kuvidgiro adhi rathe vahatha

64.13

कु॒विद॒ङ्ग प्रति॒ यथा॑ चिद॒स्य न॑ः सजा॒त्य॑स्य मरुतो॒ बुबो॑धथ ।
नाभा॒ यत्र॑ प्रथ॒मं सं॒नसा॑महे॒ तत्र॑ जामि॒त्वमदि॑तिर्दधातु नः ॥१३॥

Kuvidanga prati yatha chidasya nah sajatyasya maruto bubodhatha
Nabha yatra prathamam sannasamahe tatra jamitvamaditirdadhatu nah

64.14

ते हि द्यावा॑पृथि॒वी मा॒तरा॑ म॒ही दे॒वी दे॒वाञ्जन्म॑ना य॒ज्ञिये॑ इ॒तः ।
उ॒भे बि॑भृत उ॒भयं॒ भरी॑मभिः पु॒रू रेतां॑सि पि॒तृभि॑श्च सिञ्चतः ॥१४॥

Te hi dyavaprithivi matara mahi devi devanjanmana yagyiye itah
Ubhe bibhrita ubhayam bharimabhih puru retansi pitribhishcha sinchatah

64.15

वि षा होत्रा॒ विश्व॑मश्नोति॒ वार्यं॒ बृह॒स्पति॑र॒रम॑ति॒ः पनी॑यसी ।
ग्रावा॒ यत्र॑ मधु॒षुदु॒च्यते॑ बृ॒हदवी॑वशन्त म॒तिभि॑र्मनी॒षिण॑ः ॥१५॥

Vi sha hotra vishvamashnoti varyam brihaspatiraramatih paniyasi
Grava yatra madhushuduchyate brihadavivashanta matibhirmanishinah

64.16

ए॒वा क॒विस्तु॑वी॒रवाँ॑ ऋत॒ज्ञा द्र॑विण॒स्युर्द्रवि॑णसश्चका॒नः ।
उ॒क्थेभि॒रत्र॑ म॒तिभि॑श्च॒ विप्रोऽपी॑पय॒द्गयो॑ दि॒व्यानि॒ जन्म॑ ॥१६॥

Eva kavistuviravam ritagya dravinasyurdravinasashchakanah
Ukthebhiratra matibhishcha vipropipayadgayo divyani janma

64.17

ए॒वा प्ल॒तेः सू॒नुर॑वीवृधद्वो॒ विश्व॑ आदित्या अदिते मनी॒षी ।
ई॒शा॒नासो॒ नरो॒ अम॑र्त्ये॒नास्ता॑वि॒ जनो॑ दि॒व्यो गये॑न ॥१७॥

Eva plateh sunuravivridhadvo vishva aditya adite manishi
Ishanaso naro amartyenastavi jano divyo gayena